May Nagapamati Bala sa mga Pangamuyo?

“Nagaduhaduha ako sadto kon may Dios gid man. Pero nagapangamuyo ako gihapon kon kaisa. Ambot kon may nagapamati gid man, pero nagalaum ako nga may ara. Indi ako malipayon kag wala sing katuyuan ang akon kabuhi. Nahadlok ako nga magpati sa Dios kay para sa akon mga mahuyang lang nga tawo ang nagapati sa Dios.”—PATRICIA, * IRELAND.

PAREHO man bala kay Patricia ang imo nabatyagan? Nagapangamuyo ka bala bisan pa indi ka sigurado kon may Dios gid man? Kon huo, indi lang ikaw ang nagabatyag sina. Binagbinaga ang masunod.

▪ Ginapakita sang isa ka surbe sa 2,200 ka taga-Britanya nga 22 porsiento lamang ang nagapati nga may Dios nga nagtuga sang kalibutan kag nagapamati sa mga pangamuyo. Pero 55 porsiento sa ila ang talagsa lang nagapangamuyo.

▪ Suno sa isa ka surbe sa 10,000 ka tawo sa apat ka kontinente nga nagasiling nga atiesta sila, halos 30 porsiento ang nagapangamuyo.

Ngaa Nagaduhaduha Sila?

Ang taga-England nga si Allan nagsiling: “Ginsiling ko sadto nga wala ako nagapati sa Dios kay abi ko gintukod ang relihion para kontrolon ang mga tawo kag para makapanguarta. Kag kon may Dios gid man, rason ko, tani wala sing inhustisya. Pero kon kaisa nagapungko ako kag ‘may’ ginaistorya. Ginapamangkot ko man ang akon kaugalingon, ‘Ngaa ari ako diri?’”

Ang kada isa nga nagabatyag sini may mga rason kon ngaa nagaduhaduha sila kon ginasabat bala ang mga pangamuyo. Sa masami, ang pagpangduhaduha resulta sang mga pamangkot nga wala nasabat pareho sang:

▪ May Manunuga bala?

▪ Ngaa ang relihion amo sa masami ang ginabangdan sang kalainan?

▪ Ngaa ginatugutan sang Dios ang pag-antos?

Kon mahibaluan mo ang sabat sa sini nga mga pamangkot, magaduhaduha ka pa bala sa pagpangamuyo?

[Nota]