Sin-o ang Manugpamati sang Pangamuyo?

KON may Manugpamati sang pangamuyo, wala sing liwan kundi ang Manunuga. Sin-o pa abi ang makabasa sang imo panghunahuna kon indi ang Isa nga nagdesinyo mismo sang utok sang tawo? Sin-o pa abi ang makasabat sang mga pangamuyo kag makabulig sa mga tawo? Pero mahimo mamangkot ka, ‘Makatarunganon bala nga magpati sa isa ka Manunuga?’

Madamo ang nagahunahuna nga para magpati ka sa isa ka Manunuga, dapat mo ipanghiwala ang ebidensia sang moderno nga siensia. Pero indi matuod ang pagpati nga wala nagaugyunay ang pagpati sa Dios kag ang siensia. Binagbinaga ang masunod.

▪ Sa isa ka pagtuon sining karon lang sa 1,646 ka propesor sang siensia sa 21 ka bantog nga unibersidad sa Estados Unidos, nadiskobrehan nga isa lamang sa kada tatlo sa ila ang nagsiling nga “wala ako nagapati sa Dios.”

Ang matuod, madamo nga sientipiko ang nagapati sa pagluntad sang Dios.

Ebidensia nga May Isa ka Manunuga

Dapat bala naton batunon nga may Manugpamati sang pangamuyo bisan wala sing ebidensia? Indi gid. Sala ang pagpati nga ang pagtuo wala na nagakinahanglan sing ebidensia. Ginalaragway sang Biblia ang pagtuo bilang “ang maathag nga pagpasundayag sang mga katunayan bisan indi makita.” (Hebreo 11:1) Ang isa pa ka translation nagasiling nga ang pagtuo amo ang “kasigurohan sang mga butang nga indi naton makita.” (Maayong Balita nga Biblia, HPV) Halimbawa, indi mo makita ang hangin pero makita mo ang epekto sini sa mga dahon kon maghuyop ini. Gani nagapati ka nga may hangin gid. Sing kaanggid, bisan indi naton makita ang Manugpamati sang pangamuyo, mausisa  naton ang mga ebidensia nga makapati kita nga nagaluntad sia.

Diin naton makita ang ebidensia nga may Dios? Sa aton palibot. Amo sini ang pangatarungan sang Biblia: “Sa pagkamatuod, ang tagsa ka balay may nagtukod, apang sia nga nagtukod sang tanan nga butang amo ang Dios.” (Hebreo 3:4) Nagaugyon ka bala sa sini? Mahimo nga kon ginahunahuna mo ang kahim-ong sang uniberso, ang ginhalinan sang kabuhi, ukon ang pinakamasibod nga desinyo sa duta nga amo ang utok sang tawo, makapangatarungan ka nga may nagaluntad nga mas maalam pa sa tawo. *

Pero limitado lang ang matudlo sa aton sang kinaugali parte sa Dios. Ang pag-obserbar sang ebidensia nga may Dios sa pagpanuga daw pareho lang sa pagkabati sang mga lapaklapak sang isa nga nagapadulong sa puertahan. Nahibaluan mo nga may tawo, pero sin-o sia? Para mabal-an mo, dapat mo buksan ang puertahan. Dapat amo man sina ang himuon naton para makilala naton ang Isa nga nagtuga sang tanan nga butang.

Ang Biblia daw puertahan sang ihibalo parte sa Dios. Kon buksan mo ini kag binagbinagon ang pila ka detalyado nga mga tagna kag ang katumanan sini, makita mo ang ebidensia nga nagaluntad ang Dios. * Pero indi lang ina, ang rekord sang pagpakig-angot sang Dios sa mga tawo nagapakita mismo sang personalidad sang Manugpamati sang pangamuyo.

 Ano ang Personalidad sang Manugpamati sang Pangamuyo?

Ginapakita sang Biblia nga ang Manugpamati sang pangamuyo isa ka persona nga mahimo mo makilala. Ang persona lamang ang makapamati nga may paghangop. Makapalig-on nga mabasa: “O ikaw nga Manugpamati sang mga pangamuyo, ang tanan nga sahi sang tawo magapalapit sa imo.” (Salmo 65:2, NW) Ginapamatian niya ang mga nagapangamuyo sa iya nga may pagtuo. Kag may ngalan sia. * Ang Biblia nagasiling nga si Jehova “malayo sa malauton, apang nagapamati sia sang pangamuyo sang matarung.”—Hulubaton 15:29.

May balatyagon si Jehova. Sia ang “Dios sang gugma” kag ginatawag sia nga “malipayon nga Dios.” (2 Corinto 13:11; 1 Timoteo 1:11) Parte sa iya reaksion sang naglapnag sadto ang kalautan, ang Biblia nagasiling: “Nagpasakit ini sa iya tagiposoon.” (Genesis 6:5, 6) Indi matuod ang pagpati nga ang Dios amo ang kabangdanan sang pag-antos para tilawan ang mga tawo. Ang Biblia nagasiling: “Malayo sa Dios nga maghimo sia sing pagkamalaut.” (Job 34:10) Pero mahimo mamangkot ka, ‘Kon ang Dios amo ang labing gamhanan nga Manunuga, ngaa ginatugutan niya nga magpadayon ang pag-antos?’

Ginhatagan ni Jehova ang mga tawo sing kahilwayan sa pagpili, kag ginapakita sini kon ano sia nga sahi sang Dios. Ginapabaloran bala naton ang aton kahilwayan sa pagpili kon paano kita magkabuhi? Pero makapasubo nga madamo nga tawo ang nag-abuso sang ila kahilwayan kag nagtuga sang pag-antos sa ila kag sa iban. Gani amo ini ang pamangkot nga dapat naton binagbinagon sing maayo: Paano dulaon sang Dios ang pag-antos nga wala ginakuha ang kahilwayan sang tawo? Binagbinagon naton ini sa masunod nga artikulo.

[Mga Nota]

[Kahon sa pahina 5]

Nagaduhaduha Ka Bala nga May Dios Bangod sang Relihion?

Makapasubo nga bangod sa relihion madamo ang nagaduhaduha kon bala may ara maluluy-on nga Manugpamati sang pangamuyo. Bangod nadalahig ang relihion sa inaway, terorismo, kag nagatugot sa pag-abuso sa kabataan, nakasiling bisan ang mga tawo nga pirme nagapangamuyo nga “Wala ako nagapati sa Dios.”

Ngaa ang relihion amo sa masami ang ginabangdan sang kalainan? Ang sabat: Ang malain nga mga tawo nagahimo sing malain nga mga butang sa ngalan sang relihion. Gintagna sang Biblia nga kontrolon sang iban ang Cristianismo kag gamiton ini sa pagsupak sang kabubut-on sang Dios. Si apostol Pablo nagsiling sa Cristiano nga mga manugdumala: “Gikan sa inyo mismo may mga tawo nga magalutaw kag magahambal sang tiko nga mga butang agod ipahilayo ang mga disipulo kag pasundon sa ila.”—Binuhatan 20:29, 30.

Nangil-ad gid ang Dios sa butig nga relihion. Ang matuod, ang Pulong sang Dios, ang Biblia, nagasiling nga ang butig nga relihion amo ang responsable sa “dugo . . . sang tanan nga ginpatay sa duta.” (Bugna 18:24) Bangod napaslawan ang butig nga relihion sa pagtudlo sa mga tawo parte sa matuod nga Dios, nga ang panguna nga kinaiya amo ang gugma, may salabton sila sa Dios.—1 Juan 4:8.

Ang Manugpamati sang pangamuyo nagaulikid sa mga biktima sang mapintas nga relihion. Sa indi madugay, ang gugma sang Dios sa mga tawo magapahulag sa iya nga hukman ang tanan nga nagapakunokuno nga relihioso paagi kay Jesus. Si Jesus nagsiling: “Madamo ang magasiling sa akon sa sina nga adlaw, ‘Ginuo, Ginuo, wala bala kami nagpanagna sa imo ngalan?’ . . . Apang isiling ko sa ila: Wala gid ako makakilala sa inyo! Palayo sa akon, kamo nga mga manugbuhat sang pagkamalinapason.”—Mateo 7:22, 23.