Ang Biblia Nagapabag-o sang Kabuhi

NGAA nangin Saksi ni Jehova ang isa ka madinalag-on nga huwes nga nagdaku sa pamilya nga sarado Katoliko? Ngaa nangin ministro sang relihion ang isa ka terorista? Basaha ang ila ginasiling.

“Mas Nahangpan Ko ang Husto kag Sala.”—SEBASTIÃO ALVES JUNQUEIRA

NATAWO: 1946

PUNGSOD: BRAZIL

KABUHI SANG UNA: SARADO KATOLIKO

ANG AKON NAGLIGAD: Nagaistar ang amon pamilya sa uma nga mga anom ka kilometro halin sa banwa sang Piquete. May gamay nga talamnan ang akon mga ginikanan kag masuplayan kami sini sang amon mga kinahanglanon. Sa Piquete ako nag-eskwela, amo nga nagbakal ako sang daan nga bisikleta para mahapos magpabanwa. Imol lang ang mga tawo sa amon lugar, pero matinlo kag wala gawa sing krimen. Ang kalabanan nga lalaki nagaobra sa isa ka pabrika sang armas para sa militar.

Palatuon ako amo nga nakasulod ako sa Aeronautical Military School sa malapit nga siudad, kag sang 1966 naggradwar ako bilang sarhento. Dayon nag-eskwela ako sa pagkaabogado. Sang ulihi, nag-aplay ako para mangin hepe sang pulisiya. Sang 1976, nakapasar ako sa eksam sang gobierno kag ako ang napili para sa sina nga posisyon. Kon kaisa nalakip sa akon obra ang pagdumala sang prisuhan. Sina nga tion, pirme nagalisensia ang mga Saksi ni Jehova nga magwali sa mga priso. Ginasugiran man nila ako sang mensahe sa Biblia. Ginatahod ko gid ang Dios. Nalipay gid ako sang nahibal-an ko nga may ngalan ang Dios, si Jehova, kag puede kita mangin abyan niya.

Sang ulihi, amat-amat ko nga nalab-ot ang mataas nga posisyon. Sang 1981, nakapasar ako sa isa pa ka eksam sang gobierno kag nangin huwes. Dayon sang 2005, gintangdo ako bilang huwes sang court of appeals sa korte sang São Paulo.

KON PAANO GINBAG-O SANG BIBLIA ANG AKON KABUHI: Wala madugay pagkagradweyt ko sa abogasiya, ginsugdan ko ang pagbasa sang Biblia. Nagpabag-o ini sang akon pagtamod. Sarado Katoliko ako. May obispo kag mga pari sa amon pamilya, kag nagabulig ako sa pari kon may Misa. Antes sia maghatag sang iya sermon, ginabasa ko ang gin-asayn nga bahin sang prayer book. Indi kinabatasan sang mga pamilya nga Katoliko ang pagbasa sang Biblia. Naakig gid si Nanay sang nahibaluan niya nga nagabasa ako sang Biblia. Ginpalas-ay niya ako kag ginsilingan nga basi maglain ang akon ulo. Bisan pa sini, ginpadayon ko ang pagbasa kay wala man ako sing nakita nga malain sa sini.

 Sa banta ko, ang akon pagkamausisaon amo ang nagpahulag sa akon nga padayunon ang pagbasa sang Biblia. Gusto ko mahibaluan ang dugang pa parte sa mga pari kag sa ila papel sa simbahan. Nagbasa man ako parte sa liberation theology movement ukon kahublagan sang relihion, pero ang pangatarungan kag lohiko nga gingamit sang mga nagasakdag sini madamo sing sala, amo nga wala ako sing maintiendihan.

Ginhatagan man ako sang akon dentista nga Budhista sang isa ka libro nga ginhatag sa iya. May tig-ulo ini nga Did Man Get Here by Evolution or by Creation? * Ginbaton ko ini kay sa pensar ko maayo ini basahon upod sa The Origin of Species ni Charles Darwin. Mas mapuersa kag makapakumbinsi ang mga argumento sang Did Man Get Here by Evolution or by Creation? Sigurado gid ako nga ang teoriya sang ebolusyon wala sing basihan.

Napahulag ako sang akon nabasa nga libro parte sa pagpanuga nga mangusisa sing dugang pa. Gusto ko nga makakuha pa gid sing dugang nga libro sang mga Saksi ni Jehova. May nagsugid sa akon nga ang mekaniko sa eskwelahan sang piloto isa ka Saksi ni Jehova. Nakigsugilanon ako sa iya, kag ginhatagan niya ako sang pila ka libro. Wala ko sadto ginbaton ang pagtuon sang Biblia upod sa mga Saksi. Sa pensar ko, masarangan ko nga magtuon nga ako lang.

Sang nagsugod ako sa pagbasa sang Biblia, nagdesisyon ako nga basahon ini upod sa akon pamilya. Nagatuon kami nga pamilya kada semana kag nagabasa sang Biblia. Bilang Katoliko, ginarespeto gid sang amon pamilya ang mga pari kag obispo. Gani napukaw ang akon atension sa nabasahan ko sa Juan 14:6: “Si Jesus nagsiling sa iya [kay disipulo Tomas]: ‘Ako amo ang dalan kag ang kamatuoran kag ang kabuhi. Wala sing makakadto sa Amay kon indi paagi sa akon.’” Pagkatapos nga mausisa ko ini sing maayo, nakumbinsi ako nga ang aton kaluwasan naghalin kay Jehova paagi kay Jesus. Ginpapati kami nga ang amon kaluwasan paagi sa mga pari.

Duha pa ka teksto sa Biblia ang nagpabag-o sang akon pagtamod sa Iglesia Katolika kag sa mga panudlo sini. Ang isa amo ang Hulubaton 1:7, nga nagasiling: “Ang kahadluk sa GINOO amo ang kamunoan sang ihibalo; apang ang buangbuang nagatamay sang kaalam kag sang pagtudlo.” Kag ang isa pa amo ang Santiago 1:5, nga nagasiling: “Kon may isa sa inyo nga kulang sang kaalam, padayon sia nga magpangayo sa Dios, kay maalwan Sia nga nagahatag sa tanan kag wala nagapangita sang sayop; kag ihatag ini sa iya.” Uhaw gid ako sa ihibalo kag kaalam, kag indi ini mapaumpawan paagi sa pagkadto sa simbahan. Gani nag-untat ako sa pagtambong.

Sang 1980, ang akon asawa nagtuon sa Biblia upod sa mga Saksi. Kon ara ako sa balay, nagaupod ako sa iya. Sang ulihi, nagtuon man ako sa Biblia. Pero madugay pa kag magdesisyon kami nga magpabawtismo bilang mga Saksi ni Jehova. Ginbawtismuhan ang akon asawa sang 1994, kag ako sang 1998.

MGA BENEPISYO: Ang apat ko ka kabataan nakabenepisyo kay ginpadaku sila sa mga talaksan ni Jehova. (Efeso 6:4) Ang duha ko ka bata nga lalaki nagapanikasog gid sa pagbulig sa espirituwal nga kinahanglanon sang iban nga Saksi sa kongregasyon nga ginatambungan nila. Ang duha ko ka bata nga babayi mapisan gid sa pagwali sa iban. Ang akon asawa nagahinguyang sing madamo nga oras sa pagbulig sa iban nga makatuon parte sa Biblia, kag isa ako ka manugdumala sa amon kongregasyon.

Sang nangin Saksi ni Jehova ako, mas nahangpan ko ang husto kag sala. Bilang huwes, ginatinguhaan ko nga ilugon ang paagi ni Jehova sa nagkalainlain nga sitwasyon sa korte—ginabinagbinag ang tanan nga sirkunstansia,  mangin makatarunganon, kag mangin maluluy-on kon may dapat kaluuyan.

Nakauyat ako sang madamo nga kaso sang kasingki, pag-abuso sa bata, kag iban pa nga mabug-at nga krimen. Pero bisan pa sa sini, wala nagtig-a ang akon balatyagon. Kon magtan-aw ako sang balita, naugot gid ako sa lapnag nga imoralidad kag inhustisya sa kalibutan. Nagapasalamat gid ako kay Jehova kay naintiendihan ko ang rason sang paglapnag sang krimen, kag sa paglaum nga mangin maayo ang aton kahimtangan.

“Ang Prisuhan Wala Nakapabag-o sa Akon.”—KEITH WOODS

NATAWO: 1961

PUNGSOD: NORTHERN IRELAND

KABUHI SANG UNA: TERORISTA

ANG AKON NAGLIGAD: Natawo ako sang 1961 sa Portadown, isa ka masako nga banwa sa Northern Ireland. Protestante kami, kag nagdaku ako sa isa ka lugar nga nagaupdanay ang Katoliko kag Protestante. Imol ang kalabanan nga pamilya, pero maayo ang amon pagtamdanay kag suod kami sa amon mga kaingod.

Indi ko mapabugal ang kabuhi ko sadto. Sang 1974, nadalahig ako sa “Troubles” ukon ginamo sa relihion kag pulitika nga nagluntad sa Northern Ireland. Sina nga tion, naglala ang kahimtangan sa amon komunidad. Halimbawa, sang isa ka gab-i, ginahanas ni Tatay, nga isa ka manedyer sang Ulster * Carpet Factory, ang duha ka solterito nga Katoliko nga kaingod namon sang may naghaboy sang bomba sa bintana sang sala sang ila balay. Napatay ang ila amay, iloy, kag manghod nga lalaki.

Naglala pa gid ang mga problema, kag nagsugod ang inaway. Ginsunog ang mga balay sang Protestante sa lugar sang mga Katoliko, kag gingamo ang mga Katoliko sa lugar sang mga Protestante. Protestante ang kalabanan nga nabilin sa amon lugar. Wala madugay gindakop ako kag ginpamatbatan sing tatlo ka tuig nga pagkabilanggo kay nadalahig ako sa pagpamomba.

Samtang sa prisuhan, nangin amigo ko ang isa ka kilala nga miembro sang “loyalists.” Daw mag-utod na kami, kag sang ginkasal sia ako ang iya best man. Ang prisuhan wala nakapabag-o sa akon ukon sa iya. Sang ginhilway kami, nagbalik kami sa amon hublag, kag nag-aktibo pa gid. Bangod sini, napriso liwat ang akon amigo kag ginpatay sia didto.

Gintuyo man ako nga patyon, kag isa ka bes, ginbombahan ang akon salakyan. Pero labi nga nagpag-on ang akon pamat-od nga mangin aktibo pa gid sa kampanya para sa “God and Ulster.”

 Sa sini nga tion, nagbulig ako sa paghimo sang dokumentaryo parte sa “Troubles” nga ginpagua sa British TV. Bangod sini, nadugangan pa gid ang problema ko. Halimbawa, sang pagpauli ko isa ka gab-i, naglayas na ang akon asawa. Wala madugay, ginkuha man sa akon ang akon bata nga lalaki. Nadumduman ko nga nagatan-aw ako sa espiho kag nagasiling, “Kon may Dios gid man, buligi ako.”

Sang masunod nga Sabado, nagkitaay kami sang akon kilala nga si Paul, nga isa na ka Saksi ni Jehova. Ginsugiran niya ako parte sa Biblia. Duha ka adlaw sang ulihi, ginpadal-an niya ako sang Ang Lalantawan. Ang isa ka artikulo sa sina nga magasin nagkutlo sang pulong ni Jesus sa Juan 18:36. Sia nagsiling: “Ang akon ginharian indi bahin sini nga kalibutan. Kon ang akon ginharian bahin sini nga kalibutan, ang akon mga alagad nakig-away kuntani agod indi ako matugyan sa mga Judiyo. Apang, ang matuod, ang akon ginharian indi gikan sa sini.” Daku gid ang epekto sini sa akon. Nagpabag-o ini sang akon kabuhi.

KON PAANO GINBAG-O SANG BIBLIA ANG AKON KABUHI: Gintun-an ako ni Paul sa Biblia. Sang ulihi, si Bill nga isa man ka Saksi, nagpadayon sa pagtuon sa akon. Nahibaluan ko nga mabudlay ako tudluan; madamo ako sing pamangkot! Madamo man nga ministro sang relihion ang ginapakadto ko sa balay para pamatud-an nga sala si Bill. Pero nakita ko ang kamatuoran sa Pulong sang Dios.

Nadumduman ko isa ka bes nga ginsilingan ko si Bill nga indi magkadto sa balay kay may barikada sa alagyan kag sigurado gid nga kompiskahon kag sunugon ang iya salakyan. Pero nag-abot gihapon si Bill para magtuon kami. Ginbilin niya ang iya salakyan kag nagbisikleta lang. Sin-o ang makompiskar sina? Sang isa pa ka bes, samtang nagatuon kami ni Bill sa balay, gin-aresto ako sang mga pulis kag soldado. Samtang ginadala nila ako, nagsiling si Bill nga magsalig ako kay Jehova. Yadtong mga hitabo may daku gid nga epekto sa akon.

Mahimo nga nakibot gid ang pila ka Saksi ni Jehova sang una ko nga pagtambong sa Kingdom Hall. Malaba ang akon buhok, nagapangaritos, kag nagadyaket sang panit nga nagapakilala sa akon nga miembro sang isa ka hublag sa pulitika. Pero daw indi ako makapati sa pagtratar sa akon sang mga Saksi. Natandog gid ako sa ila kaayo.

Bisan pa nga nagatuon ako sa Biblia, nagapakig-upod gihapon ako sa akon mga barkada. Pero amat-amat nga nagsalop sa akon tagipusuon ang kamatuoran nga akon natun-an sa Biblia. Narealisar ko nga kon gusto ko alagdon si Jehova, dapat ko bag-uhon ang akon pagtamod sa pulitika kag mga kaupdanan. Indi ini mahapos. Pero samtang nagadugang ang akon ihibalo sa Biblia kag nagasalig kay Jehova, nahimo ko ini. Nagpagunting ako, ginkakas ang akon aritos, kag nagbakal sang amerikana. Nangin maayo man ang akon pagtamod sa mga tawo bangod sang akon natun-an.

MGA BENEPISYO: Kriminal kag terorista ako sadto. Kilala ako sang mga awtoridad. Pero subong nagbag-o na ang tanan. Halimbawa, sang nagtambong ako sa una nga tion sa kombension sang mga Saksi ni Jehova sa banwa sang Navan, gin-eskortan ako sang awtoridad pakadto-pauli sa Ireland kag Northern Ireland. Pero subong, wala na ako ginaeskortan. Hilway na ako nga mag-upod sa akon masigka-Saksi nga sanday Paul kag Bill kag sa iban pa sa kongregasyon kon magwali.

Samtang nagabag-o ang akon kabuhi, nabatyagan ko nga bahin gid ako sang kongregasyon. Diri ko nakilala ang isa ka Saksi nga si Louise, kag nagpakasal kami. Dugang pa, nag-updanay kami liwat sang akon bata.

Kon panumdumon ko ang akon nagligad, ginhinulsulan ko nga ginhalitan ko ang iban. Pero napamatud-an ko nga ang Biblia makabulig gid sa mga tawo nga nagtalang pareho sa akon nga magbag-o padulong sa kabuhi nga may katuyuan kag paglaum.

[Mga Nota]

[Blurb sa pahina 12]

Naakig gid si Nanay sang nahibaluan niya nga nagabasa ako sang Biblia