▪ Ang isa ka sinsero nga tawo mahimo mamangkot sini, kay wala man sing sugo sa Biblia nga nagasambit parte sa sigarilyo. Nagakahulugan bala ini nga indi naton mahibaluan ang pagtamod sang Dios sa sini? Indi.

Ang Biblia nagasiling nga ang “bug-os nga Kasulatan gintuytuyan sang Dios.” (2 Timoteo 3:16) Ang Kasulatan nagaunod sing maathag nga mga prinsipio kag impormasyon nga nagapakita kon ano ang gusto sang Dios nga pag-atipan sa aton lawas. Una, repasuhon naton ang nadiskobrehan sang mga researcher parte sa epekto sang pagpanigarilyo sa aton lawas. Dayon binagbinagon naton kon paano ang mga prinsipio sa Biblia naangot sa ila mga natukiban.

Ang sigarilyo makahalit sa lawas sang nagagamit sini kag amo ang panguna nga kabangdanan sang kamatayon nga puede tani mapunggan. Sa Estados Unidos, ang pagpanigarilyo amo ang kabangdanan sang kamatayon sang 1 sa kada 5 nga napatay. Sa sina nga pungsod, mas madamo ang napatay sa sini sangsa “gintingob nga kamatayon tuga sang alkohol, droga, pagpatay, paghikog, aksidente sa salakyan, kag AIDS,” siling sang isa ka report sang National Institute on Drug Abuse.

Ginahalitan sang mga nagapanigarilyo ang iban. Makahalit bisan ang diutay lang nga aso sang sigarilyo. Asta sa 30 porsiento ang posibilidad nga makatigayon sang kanser sa baga kag balatian sa tagipusuon ang mga wala nagapanigarilyo nga makahaklo sang aso. Sang nagligad lang nga mga tinuig, natukiban sang mga doktor ang isa pa ka katalagman nga ginatawag nila “third-hand smoke.” Nagapatuhoy ini sa mga kemikal nga mabilin sa mga bayo, karpet, kag iban pa nga lugar nga ginatapikan sang aso. Ining makahililo nga mga kemikal ilabi na nga makahalit sa mga kabataan kag makapahinay sang ila ikasarang sa pagtuon.

Makapaadik ang pagpanigarilyo. Ang mga nagapanigarilyo mangin ulipon sa sini nga bisyo. Ang matuod, nagapati ang mga researcher nga ang pagkaadik sa nikotina, ang panguna nga kemikal sa sigarilyo, amo ang pinakamabudlay untatan.

Paano ang mga prinsipio sa Biblia naangot sa sini nga mga impormasyon? Binagbinaga ang masunod:

Gusto sang Dios nga respetuhon naton ang kabuhi. Sa Kasuguan nga ginhatag sang Dios sa pungsod sang Israel, ginsambit niya nga ang mga gusto magpahamuot sa iya dapat magrespeto sang kabuhi sang tawo. (Deuteronomio 5:17) Ang mga Israelinhon dapat magbutang sang alubaybay sa atop sang ila balay. Ngaa? Ang mga atop didto matapan kag ginagamit sang pamilya. Ang alubaybay nagasagang para sila kag ang iban indi mahulog kag mahalitan ukon mapatay. (Deuteronomio 22:8) Dugang pa, dapat siguraduhon sang mga Israelinhon nga indi makapanghalit ang ila mga sapat sa iban. (Exodo 21:28, 29) Ginasupak sang isa nga nagapanigarilyo ang mga prinsipio nga nagasuporta sini nga mga kasuguan. Hungod niya nga ginahalitan ang iya lawas. Dugang pa, ang iya pagpanigarilyo makahalit sa panglawas sang ara sa palibot niya.

Ginapaabot sang Dios nga higugmaon naton sia kag ang aton isigkatawo. Si Jesucristo nagsiling nga dapat tumanon sang iya mga sumulunod ang duha ka pinakadaku nga sugo. Dapat nila higugmaon ang Dios sa bug-os nila nga tagipusuon, kalag, hunahuna, kag kusog kag higugmaon nila ang ila isigkatawo pareho sang ila kaugalingon. (Marcos 12:28-31) Bangod ang kabuhi regalo halin sa Dios, ang isa nga nagapanigarilyo wala gid nagatahod sini nga regalo kag gani wala sing gugma sa Dios. (Binuhatan 17:26-28) Ini nga bisyo sang isa makahalit gid sa iban, gani ginapanghiwala niya nga ginahigugma niya ang iya isigkatawo.

Ginapatuman sang Dios nga likawan naton ang indi matinlo nga mga buhat. Ang Biblia nagalaygay sa mga Cristiano nga tinluan ang ila kaugalingon “sa tanan nga dagta sang unod kag espiritu.” (2 Corinto 7:1) Maathag nga ang pagpanigarilyo nagadagta sa isa. Ang mga gusto mag-untat sa pagpanigarilyo para pahamut-an ang Dios nagaatubang sang mabudlay nga hangkat. Pero sa bulig sang Dios, mahimo sila mangin madinalag-on sa pag-untat sini nga bisyo.