Mga Milagro nga Malapit Na Lang Matabo

KON ang isa ka doktor magahimo sing komplikado nga operasyon sa imo, ano ang batyagon mo kon nahibaluan mo nga wala pa gid sia nakahimo sini? Sigurado gid nga mabalaka ka. Pero ano abi kon nahibaluan mo nga eksperto gali sia kag ginatos na ka operasyon pareho sang himuon niya sa imo ang nahimo niya sing madinalag-on? Indi bala nga magasalig ka gid nga mabuligan ka niya?

Ang nagamasakit nga kalibutan subong nagakinahanglan sing insigida nga “operasyon.” Paagi sa iya Pulong, ang Biblia, nagpromisa si Jehova nga Dios nga himuon niya liwat ang duta nga Paraiso. (2 Pedro 3:13) Pero para matabo ina, dapat anay madula ang kalainan. (Salmo 37:9-11; Hulubaton 2:21, 22) Ang tanan nga malain nga kahimtangan sa palibot naton dapat anay madula antes ibalik ang paraiso. Nagakinahanglan ini sang milagro!—Bugna 21:4, 5.

Nagapati ang mga Saksi ni Jehova nga ining daku nga mga pagbag-o matabo sa indi madugay. Ngaa? Bangod ang mga milagro nga nahimo na ni Jehova nagapamatuod nga may gahom sia sa pagtuman sang iya mga promisa. Ikomparar ang anom lamang ka milagro sa Biblia sa mga ginpromisa nga matabo sa palaabuton.

 Kabay nga padayon ka nga magtuon parte sa mga promisa sang Biblia para sa palaabuton. Samtang nagabakod ang imo pagtuo, magabakod man ang imo paglaum—ang paglaum nga mabuhi sa tion nga maeksperiensiahan mo mismo ang mga milagro nga himuon ni Jehova.

 [Kahon/Mga Retrato sa pahina 9, 10]

MILAGRO:

GINPAKAON NI JESUS ANG LINIBO PAAGI SA PILA KA TINAPAY KAG ISDA.—MATEO 14:13-21; MARCOS 8:1-9; JUAN 6:1-14.

PROMISA:

“Ang duta naghatag sang iya patubas; ang Dios, ang aton kaugalingon nga Dios, magapakamaayo sa aton.”—SALMO 67:6.

KAHULUGAN PARA SA ATON:

WALA NA SING MAGAANTOS SA GUTOM.

MILAGRO:

GINPASAG-ULI NI JESUS ANG PANULOK SANG BULAG.—MATEO 9:27-31; MARCOS 8:22-26.

PROMISA:

“Ang mga mata sang mga bulag pamuklaton.”—ISAIAS 35:5.

KAHULUGAN PARA SA ATON:

ANG TANAN NGA BULAG MAKAKITA NA.

MILAGRO:

GIN-AYO NI JESUS ANG MGA MAY SABLAG.—MATEO 11:5, 6; JUAN 5:3-9.

PROMISA:

“Ang piang magalumpat subong sang usa.”—ISAIAS 35:6.

KAHULUGAN PARA SA ATON:

ANG TANAN NGA KASABLAGAN MAGAAYO.

MILAGRO:

GIN-AYO NI JESUS ANG LAINLAIN NGA BALATIAN.—MARCOS 1:32-34; LUCAS 4:40.

PROMISA:

“Ang pumuluyo indi magsiling, ‘Nagamasakit ako.’”—ISAIAS 33:24.

KAHULUGAN PARA SA ATON:

ANG TANAN NGA BALATIAN MADULA NA. MATIGAYON NATON ANG PERPEKTO NGA PANGLAWAS.

MILAGRO:

GINKONTROL NI JESUS ANG MGA ELEMENTO.—MATEO 8:23-27; LUCAS 8:22-25.

PROMISA:

“Magapatindug sila sing mga balay kag puy-an sila; magatanum sila sing mga ulubasan kag magakaon sang bunga nila. Indi sila magpangabudlay sa walay pulus.”—ISAIAS 65:21, 23.

“Magalayo ka . . . sa kakugmat, kay indi ini magpalapit sa imo.”—ISAIAS 54:14.

KAHULUGAN PARA SA ATON:

WALA NA SING KALAMIDAD.

MILAGRO:

GINBANHAW NI JESUS ANG PATAY.—MATEO 9:18-26; LUCAS 7:11-17.

PROMISA:

“Ang tanan nga yara sa handumanan nga mga lulubngan . . . magagua.”—JUAN 5:28, 29.

“Ginhatag sang dagat ang mga patay nga yara sa sini, kag ginhatag sang kamatayon kag Lulubngan ang mga patay nga yara sa sini.”—BUGNA 20:13.

KAHULUGAN PARA SA ATON:

MABANHAW ANG ATON NAPATAY NGA MGA HINIGUGMA.