BISAN pa ang aton pagkamakasasala, ang kalibutan nga aton ginaistaran, kag ang Yawa nagapabudlay sa aton, sarang naton mabatuan ang ila impluwensia! Paano? Paagi sa pagpakigsuod sa Dios kag sa pagsunod sa wala nagadaan nga mga prinsipio sa iya Pulong, ang Biblia. Binagbinaga ang duha ka halimbawa.

PRINSIPIO SA BIBLIA: “Indi kamo magsunod sa mga pagginawi sang mga tawo sa sini nga kalibutan.”—Roma 12:2, Ang Pulong sang Dios, APD.

Eksperiensia: Si Guilherme isa ka madinalag-on nga negosyante sa Brazil. Gin-ako niya nga indi mahapos nga mangin bunayag. “Kahapos lang para sa isa ka negosyante nga magdinaya, ayhan para malab-ot ang tulumuron sang kompanya ukon para indi mapierde sang iban,”  siling niya. “Normal lang para sa madamo nga maghatag kag magbaton sang hamham. Kon bag-uhan ka pa lang nga negosyante kag may daku nga balayran, mabudlay gid nga mangin tampad.”

Bisan pa sa sini, nakapabilin nga tampad si Guilherme. Nagsiling sia: “Bisan pa sa indi tampad nga kahimtangan sa negosyo, posible gihapon nga mangin bunayag. Dapat malig-on ang imo panindugan. Nakabulig sa akon ang Biblia nga makita ang mga bentaha sang pagkabunayag. Ang isa nga bunayag may matinlo nga konsiensia, kalinong, kag pagtahod sa kaugalingon. May maayo sia nga impluwensia sa iban.”

PRINSIPIO SA BIBLIA: “Ang mga tawo nga gusto magmanggaranon indi mahimo nga indi mahulog sa mga pagsulay. Masiod sila sa mga wala sing pulos kag malain nga mga handom nga amo ang nagaguba kag nagadala sa mga tawo sa kalaglagan. Kay kon kuwarta na gani ang aton palabihon, amo ina ang halinan sang tanan nga klase sang kalainan.”—1 Timoteo 6:9, 10, APD.

Eksperiensia: Si André, tag-iya sang kompanya nga nagapanakod sang mga security system. Ang isa sang iya mga kliyente amo ang daku nga soccer club. Isa ka bes, sa tapos sang hampang, nagkadto si André sa opisina sang tagdumalahan kag ginhatag ang bill para sa iya serbisyo. Masako gihapon sila sa pag-isip sang ila kinitaan. Gab-i na, amo nga dalidali nga ginbayran sang superbisor ang mga suplayer, lakip si André.

“Sang nagapauli na ako, natalupangdan ko nga sobra ang ginbayad sang superbisor,” siling niya. “Mahimo nga indi na niya mahibaluan kon sin-o ang nakabaton sang sobra nga kuarta. Pero nahibaluan ko man nga sia ang manabunan! Gani nagbalik ako. Nanagil-ot ako sa mga tumalan-aw para ibalik ang sobra nga kuarta. Nakibot gid ang superbisor. Wala pa gid sang may nakauli sa iya sang kuarta.”

“Ginrespeto ako sang superbisor bangod sang akon ginhimo,” padayon ni André. “Pila na ka tuig ang nagligad, pero sa mga kadungan ko nga suplayer, ako na lang ang nabilin nga may kontrata sa club. Nagapasalamat gid ako nga ang pagsunod ko sa mga prinsipio sa Biblia nakahatag sa akon sang maayo nga reputasyon.”

Makapalig-on nga mahibaluan nga sa bulig sang Dios, sarang naton mabatuan ang malain nga mga impluwensia. Pero kon sa aton lang, indi naton madula ang tanan nga korapsion. Ang kabangdanan sini indi masolusyunan sang indi perpekto nga mga tawo. Buot bala silingon nga indi na gid madula ang korapsion? Ang katapusan nga artikulo sa sini nga serye magahatag sang sabat sang Biblia.