Ano ang ginabatyag mo parte sa Disiembre 21, 2012, ang petsa sa kalendaryo sang mga Maya nga ginasiling sang madamo nga magapabag-o sa kalibutan? Depende sa imo ginapaabot, mahimo madula ang imo kahadlok, mapaslawan ka, ukon madulaan ka sing interes. Isa naman bala ini ka sala nga prediksion parte sa katapusan sang kalibutan?

Kamusta naman ang “katapusan sang kalibutan” nga ginsambit sa Biblia? (Mateo 24:3, Ang Pulong sang Dios, APD) Ang pila nahadlok nga basi masunog ang duta. Ang iban nalangkag sa matabo sa katapusan sang kalibutan. Ang iban naman natak-an na sa paghulat. Pero ini bala mga reaksion sa sugidsugid lang ukon sa kamatuoran?

Mahimo makibot ka nga mahibaluan ang ginasiling sang Biblia parte sa katapusan sang kalibutan. Wala lamang ini nagahatag sang mga rason nga dapat naton paabuton ang katapusan kundi ginapaathag man sini nga ang pila nagabatyag nga daw kadugay gid sang katapusan kag natak-an sila sa paghulat. Ginaagda ka namon nga binagbinagon ang mga sabat sang Biblia sa pila ka kinaandan nga pamangkot parte sa katapusan sang kalibutan.

ANG SABAT SANG BIBLIA: “[Ang Dios] nagpasad sang mga sadsaran sang duta, agud nga ini indi mationg sa gihapon.”—SALMO 104:5.

Indi malaglag ang duta sang kalayo ukon sang bisan ano. Sa baylo, ginatudlo sang Biblia nga ini nga planeta istaran sang mga tawo asta san-o. Ang Salmo 37:29 nagasiling: “Ang mga matarung magapanubli sang duta, kag magapuyo dira sa gihapon.”—Salmo 115:16; Isaias 45:18.

Pagkatapos gintuga sang Dios ang duta, nagsiling sia nga ini “tama gid kaayo,” kag amo sina gihapon ang iya ginabatyag. (Genesis 1:31) Sa baylo nga gub-on ini, nagpromisa sia “sa paglaglag sa mga nagalaglag sang duta” kag amligan niya ini nga indi mahalitan sing permanente.—Bugna 11:18.

Pero mahimo mamangkot ka parte sa ginasiling sang 2 Pedro 3:7: “Ang langit kag ang duta karon ginatigana sa kalayo.” Indi bala nga ginapakita sini nga masunog ang duta? Ang matuod, nagagamit ang Biblia kon kaisa sang mga termino nga “langit,” “duta,” kag “kalayo” sing simbuliko. Halimbawa, sang nagsiling ang Genesis 11:1: “Ang bug-os nga duta isa sing hambal,” ang “duta” nagapatuhoy sa katawhan.

Ang mga teksto antes sang 2 Pedro 3:7 nagapakita nga ang mga langit, duta, kag kalayo simbuliko. Ang bersikulo 5 kag 6 nagapaanggid sa Anaw sang panahon ni Noe. Sina nga tion, nalaglag ang kalibutan sadto, pero wala madula ang aton planeta. Sa baylo, gindula sang Anaw ang masingki nga katawhan, ukon ang “duta.” Gindula man sini ang isa ka sahi sang “langit”—ang mga tawo nga nagagahom sa katawhan. (Genesis 6:11) Sa amo man nga paagi, ginatagna sang 2 Pedro 3:7 ang permanente nga kalaglagan nga daw subong bala nga ginasunog sang kalayo ang malaut nga katawhan kag ang korap nga mga gobierno sini.

ANG SABAT SANG BIBLIA: “Ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.”—1 JUAN 2:17.

“Ang kalibutan” nga magataliwan indi ang duta kundi ang kalibutan sang katawhan nga wala nagasunod sa kabubut-on sang Dios. Pareho sa doktor nga mahimo magkuha sang tumor para  maluwas ang pasyente, “utdon” sang Dios ang mga malaut para mangin malipayon ang maayo nga mga tawo sa duta. (Salmo 37:9) Sa sina nga kahulugan, ang “katapusan sang kalibutan” isa ka maayo nga butang.

Ining positibo nga pagtamod sa “katapusan sang kalibutan” ginapakita sang mga translation sang Biblia, nga nagagamit sini nga ekspresyon nga “katapusan sang sistema sang mga butang” ukon “katapusan sang panuigon.” (Mateo 24:3; Ang Biblia sang Philippine Bible Society) Bangod maluwas ang katawhan kag indi maguba ang duta, rasonable bala nga magabulos ang bag-o nga panag-on, isa ka bag-o nga sistema sang mga butang? Huo ang sabat sang Biblia, kay nagasambit ini sa “nagapakari nga sistema sang mga butang.”—Lucas 18:30.

Ini nga palaabuton gintawag ni Jesus nga “Bag-o nga Panahon.” Sina nga tion, ipasag-uli niya ang kahimtangan sang mga tawo suno sa una nga gintuyo sang Dios sa ila. (Mateo 19:28, Maayong Balita nga Biblia) Matigayon dayon naton ang

• Paraiso sa duta nga may kalinong kag kabuganaan.—Isaias 35:1; Miqueas 4:4.
• Makalilipay kag makaalayaw nga hilikuton. —Isaias 65:21-23.
• Pag-ayo sang tanan nga balatian.—Isaias 33:24.
• Pagdula sang katigulangon.—Job 33:25.
• Pagbanhaw sa mga patay.—Juan 5:28, 29.

Kon himuon naton ang “kabubut-on sang Dios,” ang ginapatuman niya sa aton, indi kita mahadlok sa katapusan sang kalibutan. Sa baylo, paabuton pa naton ini.

ANG SABAT SANG BIBLIA: “Kon makita ninyo nga nagakahanabo ini nga mga butang, mahibaluan ninyo nga ang ginharian sang Dios malapit na.”—LUCAS 21:31.

Sa libro nga The Last Days Are Here Again, si Propesor Richard Kyle nagsulat nga ang “hinali nga pagbag-o kag kinagamo sa kalibutan magatiklod sa mga tawo nga magpakot sang katapusan sang kalibutan.” Amo ini ang matabo ilabi na kon kabudlay gid ipaathag ang pagbag-o kag mga kinagamo.

Pero ang mga propeta sa Biblia nga nagahambal parte sa katapusan wala nagatinguha nga ipaathag ang malain nga mga hitabo sadto. Sa baylo, gintuytuyan sila sang Dios para ipaathag ang mga kahimtangan nga nagapakita nga malapit na ang katapusan sang kalibutan. Binagbinaga ang pila sa sini nga mga tagna kag tan-awa kon bala nagakatuman ini subong.

•   Mga inaway, gutom, linog, kag paglapnag sang makamamatay nga balatian.—Mateo 24:7; Lucas 21:11.
• Tumalagsahon nga pagdamo sang krimen.—Mateo 24:12.
• Paglaglag sang mga tawo sa duta.—Bugna 11:18.
• Mga tawo nga mahigugmaon sang kaugalingon, kuarta, kag kalipay pero wala sing gugma sa Dios. —2 Timoteo 3:2, 4.
• Pagkaguba sang pamilya.—2 Timoteo 3:2, 3.
• Indi pagsapak sang ebidensia nga malapit na lang ang katapusan.—Mateo 24:37-39.
• Pagbantala sang maayong balita sang Ginharian sang Dios sa bilog nga kalibutan.—Mateo 24:14.

Subong sang ginsiling ni Jesus, “ini tanan nga butang” nagapahibalo sa aton nga ang katapusan sang kalibutan malapit na. (Mateo 24:33) Ang mga Saksi ni Jehova nagapati nga masaligan gid ang mga ebidensia, kag ginasugid nila sa iban ang ila pagtuo paagi sa pagwali sa 236 ka kadutaan.

ANG SABAT SANG BIBLIA: “Sa tion nga magsiling sila: ‘Paghidait kag kalig-unan!’ nian magaabot sa ila ang hinali nga kalaglagan subong sang pagpasakit sang isa ka babayi nga nagabusong; kag indi gid sila makapalagyo.”—1 TESALONICA 5:3.

Ginapaanggid sang Biblia ang pagkalaglag sang kalibutan sa pagsugod sang pagpasakit sang manugbata—indi malikawan sang iloy ang kasakit kag gulpi ini nagaabot. Ang tion nga nagapadulong sa katapusan daw pareho sa pagbusong, kay nahibaluan sang manugbata ang mga palatandaan nga malapit na sia magbata. Mahimo banta-bantaon sang doktor ang petsa sang pagbata; pero, bisan pa maatrasar ini, sigurado sia nga magagua gid ang bata. Sing kaanggid, ang bisan ano nga sala nga pagpaabot parte sa katapusan wala nagabag-o sa maathag nga mga pamatuod sining “katapusan nga mga adlaw.”—2 Timoteo 3:1.

‘Kon maathag gid ang tanda nga malapit na ang katapusan,’ mahimo mamangkot ka, ‘ngaa madamo ang wala nagasapak sini?’ Ginapakita sang Biblia nga kon malapit na ang katapusan, madamo ang magapakadiutay sang ebidensia. Sa baylo nga kilalahon ang dalagku nga mga pagbag-o sa katapusan nga mga adlaw, mahimo magsiling sila: “Sugod sang nagtulog sa kamatayon  ang aton mga katigulangan, ang tanan nga butang nagapadayon nga amo gid gihapon kutob sa ginsuguran sang pagpanuga.” (2 Pedro 3:3, 4) Buot silingon, bisan pa maathag na ang tanda sang katapusan nga mga adlaw, madamo ang magasikway sini.—Mateo 24:38, 39.

Ginbinagbinag sini nga artikulo ang pila lang sa mga ebidensia sa Biblia nga malapit na ang katapusan. * Gusto mo bala mahibaluan ang dugang pa? Kon huo, palihug pangabaya ang mga Saksi ni Jehova nga tun-an ka sing libre sa Biblia. Puede ini hiwaton sa imo balay, sa iban nga lugar nga gusto mo, ukon bisan gani sa telepono. Kinahanglan mo lang ang tion, pero daku gid ang imo benepisyo.