Natawo ako sa Moundsville, isa ka malinong nga banwa sa pangpang sang Ohio River sa naaminhan nga West Virginia, U.S.A. Ikaduha ako sa apat ka kabataan, kag tatlo sini ang lalaki, amo nga pirme lang masadya sa balay. Mapisan kag bunayag ang akon mga ginikanan, kag palangga man nila ang iban. Indi gid man kami manggaranon, pero wala man kami nagakawad-an. Bilang mga Saksi ni Jehova, gintinguhaan gid sang akon mga ginikanan nga tudluan kami sang mga prinsipio sa Biblia sang bata pa kami.

Pero sang nagpamatan-on na ako, nagpalayo na ang akon tagipusuon sa gintudlo sa akon. Ginduhaduhaan ko kon bala may pulos ukon makaalayaw ang kabuhi nga ginatuytuyan sang mga prinsipio sa Biblia. Abi ko mangin malipayon gid ako kon hilway ko nga mahimo ang gusto ko. Wala magdugay, nag-untat ako sa pagtambong sa Cristiano nga mga pagtilipon. Nagrebelde man ang duha ko ka utod. Gintinguhaan gid sang akon ginikanan nga buligan kami, pero wala namon ini ginbaton.

Wala ko gid ginpaabot nga maadik ako sang makapagusto na ako. Isa ka adlaw samtang nagapauli ako halin sa eskwelahan, gintanyagan ako sang akon amigo sang sigarilyo. Ginbaton ko ini. Sugod sadto, gintilawan ko ang iban pa nga bisyo. Sang ulihi, nangin adik ako sa droga kag alkohol kag nangin imoral. Sa sulod sang pila ka tuig, gintilawan ko ang mas maisog nga mga droga kag nangin adik ako sa sini. Para masuportahan ko ang akon nagalala nga bisyo, nagbaligya ako sang droga.

Bisan pa wala ko ginasapak ang akon konsiensia, ginapahanumdom ako sini pirme nga sala ang akon pagkabuhi. Pero kay nabasa na ako, naligo na lang ako. Bisan pa madamo ako sing kaupod sa mga party kag konsierto, pamatyag ko nagaisahanon lang ako. Kon kaisa, ginapamensar ko nga disente kag maayo ang akon mga ginikanan pero ngaa kalain gid sa akon.

Bisan pa nga nadulaan na ako sing paglaum nga magbag-o, indi amo sina ang ginabatyag sang iban para sa akon. Sang 2000, gin-agda ako sang akon mga ginikanan nga magtambong sa distrito nga kombension sang mga Saksi ni Jehova. Napilitan ako nga mag-upod. Nakibot ako kay nagtambong man ang duha ko ka rebelde nga utod.

Samtang sa kombension, nadumduman ko nga diri man ginhiwat ang rock concert sang nagligad nga mga isa ka tuig. Natandog gid ako sang daku nga kinatuhayan. Sa konsierto, puno sang basura kag aso sang sigarilyo ang pasilidad. Kalabanan sang nagtambong indi mainabyanon, kag makapasubo ang mga musika. Pero sa kombension, kaupod ko ang malipayon gid nga mga tawo, nga nag-abiabi sa akon, bisan dugay na nga wala kami magkit-anay. Matinlo ang pasilidad, kag ang mensahe nga ginpresentar parte sa maayo nga palaabuton. Naghinulsol ako kon ngaa ginsikway ko pa ang maayo nga epekto sang kamatuoran sa Biblia!—Isaias 48:17, 18.

Pagkatapos gid sang kombension, nagdesisyon ako nga magbalik sa Cristiano nga kongregasyon. Namat-od man ang duha ko ka utod nga magbalik kay natandog man sila sang kombension. Nagbaton kami sang pagtuon sa Biblia.

Ang isa ka teksto sa Biblia nga nagpahulag gid sa akon amo ang Santiago 4:8, nga nagasiling: “Magpalapit kamo sa Dios, kag magapalapit sia sa inyo.” Narealisar ko nga kon gusto ko mangin suod sa Dios, dapat tinluan ko ang akon kabuhi. Lakip sa sini nga mga pagbag-o, dapat untatan ko ang pagpanigarilyo kag ang pag-abuso sa droga kag alkohol.—2 Corinto 7:1.

Ginbiyaan ko ang akon mga abyan kag ginbuslan sila sang mga sumilimba ni Jehova. Ginbuligan man ako sang manugdumala sa kongregasyon nga nagtudlo sa akon sa Biblia. Pirme niya ako ginatawgan kag nagahapit sia sa balay para kamustahon ako. Isa sia sang akon suod nga mga abyan bisan subong.

Sang tigpamulak sang 2001, nagdedikar ako sa Dios kag nagpabawtismo, amo man ang akon duha pa ka utod. Nalipay gid ang akon mga ginikanan kag ang isa ko ka matutom nga manghod sang nangin Saksi ni Jehova kami tanan.

Abi ko sadto tuman kaistrikto sang mga prinsipio sa Biblia, pero ginatamod ko na ini subong nga daku nga pangamlig. Ginhatagan ako sang kusog sang Biblia nga untatan ang paggamit kag pagbaligya sang mga droga kag mangin mas maayo nga tawo.

Pribilehiyo ko nga mangin isa sa mga sumilimba ni Jehova sa bilog nga kalibutan. Ini sila nagahigugmaanay gid sa isa kag isa, kag nahiusa sila sa pag-alagad sa Dios. (Juan 13:34, 35) Lakip sa sina nga mga sumilimba amo ang pinasahi gid nga pagpakamaayo—ang akon asawa, si Adrianne, nga akon gid ginapalangga kag ginapabaloran. Nalipay gid kami nga magkaupod sa pag-alagad sa aton Manunuga.

Sa baylo nga magkabuhi sing maiyaiyahon, gingamit ko ang akon madamo nga tion sa pagwali, nga nagatudlo sa mga tawo kon paano man sila makabenepisyo sa Pulong sang Dios. Ini gid ang labing makalilipay nga hilikuton para sa akon. Makasiling gid ako nga ginbag-o sang Biblia ang akon kabuhi. Nasapwan ko gid man ang matuod nga kahilwayan.