Natawo ako sa Santo Domingo, Dominican Republic. Ako ang kinagot sa apat ka mag-ulutod. Edukado ang akon mga ginikanan kag gusto nila nga padakuon kami sa isa ka maayo nga palibot. Apat ka tuig antes ako matawo, nakilala sang akon mga ginikanan ang mga misyonero nga Mormon. Nagdayaw gid sila sa kahipid kag maayo nga batasan sining mga pamatan-on nga lalaki amo nga nagdesisyon sila nga ang amon pamilya amo ang mangin una nga mga miembro sang Church of Jesus Christ of Latter-day Saints, ukon Mormon Church sa amon lugar.

Samtang nagadaku ako, nagpakigbahin ako sa mga hilikuton sang simbahan kag importante sa akon ang pagkabuhi sang pamilya kag maayo nga pamatasan bilang Mormon. Ginapabugal ko nga isa ako ka Mormon kag handum ko nga mangin misyonero.

Sang 18 anyos na ako, nagsaylo ang amon pamilya sa Estados Unidos para makaeskwela ako sa maayo nga unibersidad. Pagligad sang mga isa ka tuig, ang akon tiyo kag tiya nga mga Saksi ni Jehova, nagbisita sa amon sa Florida. Gin-agda nila kami nga magtambong sa kombension. Nagdayaw gid ako bangod ang tanan nagabukad sang ila Biblia kag nagakuha sang nota. Gani naghulam man ako sang ballpen kag papel.

Pagkatapos sang kombension, ang akon tiyo kag tiya nagsiling nga bangod interesado ako nga mangin misyonero, buligan nila ako nga magtuon sa Biblia. Nagustuhan ko ini nga ideya bangod sadto nga tion, mas madamo ako sang nahibaluan sa Book of Mormon sangsa Biblia.

Kon nagaistoryahanay kami sa telepono parte sa Biblia, pirme ako ginapalig-on sang akon tiyo kag tiya nga ikomparar ang akon mga pagpati sa ginatudlo sang Biblia. Gusto nila nga hibaluon ko mismo ang kamatuoran.

 Madamo sa mga panudlo sang Mormon ang ginabaton ko, pero indi ako sigurado kon bala ginaugyunan ini sang Biblia. Ginpadal-an ako sang akon tiya sang Nobiembre 8, 1995 nga isyu sang Awake! nga magasin, nga ginhimo sang mga Saksi ni Jehova. Nagalakip ini sang pila ka artikulo parte sa mga pagpati sang Mormon. Nakibot gid ako nga madamo pa gali ako sing wala nahibaluan sa mga panudlo sang Mormon. Bangod sini, nag-research ako sa opisyal nga Web site sang Mormon para siguraduhon kon bala matuod ang ginasiling sang Awake! Matuod ini, kag ginpamatud-an pa gid ini sang nagbisita ako sa mga museum sang Mormon sa Utah.

Ginapatihan ko sadto nga wala nagakontradik ang Book of Mormon kag ang Biblia. Pero sang ginbasa ko sing maayo ang Biblia, natalupangdan ko nga nagakontradik ang mga panudlo sang Mormon kag ang ginasiling sang Biblia. Halimbawa, sa Ezequiel 18:4, ang Biblia nagasiling nga ang kalag nagakapatay. Pero ang Book of Mormon sa Alma 42:9 nagasiling: “Ang kalag indi mapatay.”

Wala labot sini, naligban ako sa nasyonalistiko nga mga ideya nga ginatudlo sang Mormon. Halimbawa, ginatudlo sang Mormon nga ang hardin sang Eden ara sa Jackson County, Missouri, U.S.A. Kag ang mga propeta sini nagatudlo nga “ang Ginharian sang Dios magagahom sa ulihi sa bilog nga duta paagi sa gobierno sang Estados Unidos.”

Nagapalibog ako kon bala ang ginatudlo sang Mormon matabo man sa iban nga pungsod, pareho sa pungsod nga akon natawhan. Gin-istoryahan namon ini nga topiko sang isa ka lamharon nga Mormon nga ginhanas para magmisyonero sang gintawgan niya ako isa ka gab-i. Ginpamangkot ko sia kon handa sia makig-away sa pareho niya nga Mormon sa iban nga pungsod. Nakibot ako sang nagsiling sia nga huo! Nangusisa pa gid ako sa mga panudlo sang akon relihion kag ginkonsulta ko man ang mga lider sang Mormon Church. Ginsilingan nila ako nga ang mga sabat sa akon mga pamangkot mga misteryo nga mangin maathag sa ulihi samtang nagasanag ang kapawa.

Bangod nalugaw-an ako sa ila paathag, gin-usisa ko sing maayo ang akon kaugalingon kag kon ngaa gusto ko mangin misyonero sang Mormon. Narealisar ko nga gusto ko mangin misyonero kay luyag ko magbulig sa iban. Dugang pa, gusto ko nga tahuron ako sang mga tawo. Pero kon parte sa Dios, halos wala ako sing nahibaluan. Bisan pa nga nabasa ko na ang Biblia sadto, wala ko gid ini ginpabaloran. Wala ako sing ideya sa katuyuan sang Dios para sa duta ukon sa mga tawo.

Paagi sa pagtuon ko sang Biblia sa mga Saksi ni Jehova, natun-an ko ang ngalan sang Dios, ang nagakatabo sa aton kon mapatay kita, kag ang papel ni Jesus sa katumanan sang katuyuan sang Dios. Nangin pamilyar na gid man ako sa sining hamili nga libro, kag nalipay ako nga isugid sa iban ang akon natun-an. Nahibaluan ko na sadto pa nga nagaluntad ang Dios, pero subong makapangamuyo na ako sa iya bilang akon pinakasuod nga Abyan. Nabawtismuhan ako bilang Saksi ni Jehova sang Hulyo 12, 2004, kag pagligad sang anom ka bulan, gingamit ko ang akon madamo nga tion sa ministeryo.

Sa sulod sang lima ka tuig, nagtrabaho ako sa ulong talatapan sang mga Saksi ni Jehova sa Brooklyn, New York. Nalipay gid ako nga makabulig ako sa paghimo sang mga Biblia kag base sa Biblia nga mga literatura nga makabulig sa minilyon sa bilog nga duta, kag padayon ko nga ginabuligan ang iban nga makatuon parte sa Dios.