May Kahulugan nga Kabuhi—Nagpahamtang si Jesus sang Halimbawa
“Magpadayon sa paglakat subong sang paglakat sinang isa.”—1 Juan 2:6.
SUBONG sang ginbinagbinag naton sa nagligad nga artikulo, may kahulugan ang kabuhi ni Jesus. Gani para may kahulugan man ang aton kabuhi, maayo nga ilugon naton ang iya halimbawa kag pamatian ang iya laygay.
Ang matuod, ginapalig-on kita ni Jehova nga himuon ina, kaangay sang ginapakita sang teksto sa ibabaw. Ang paglakat subong sang paglakat ni Jesus nagalakip sang pagpahisuno sang aton bilog nga pagkabuhi sa iya halimbawa kag mga panudlo. Paagi sini, matigayon naton ang kahamuot sang Dios kag ang may kahulugan nga kabuhi.
Ang mga panudlo ni Jesus nagalakip sang mga prinsipio nga makabulig sa aton nga maglakat subong sang iya paglakat. Mabasa naton ang madamo sa sini sa iya bantog nga Sermon sa Bukid. Binagbinagon naton ang pila sa sini kag kon paano naton ini maaplikar sa aton kabuhi.
PRINSIPIO: “Malipayon ang mga mahunahunaon sang ila espirituwal nga kinahanglanon.”—Mateo 5:3.
KON PAANO INI MAKABULIG NGA MATIGAYON ANG MAY KAHULUGAN NGA KABUHI:
Ginpakita ni Jesus nga duna sa mga tawo ang handum nga makilala ang Dios. Gusto naton mahibaluan ang sabat sa mga pamangkot pareho sang: Ngaa ari kita diri? Ngaa kadamo gid sang pag-antos diri sa duta? Nagaulikid gid bala ang Dios sa aton? May kabuhi bala pagkatapos sang kamatayon? Dapat mahibaluan naton ang sabat sa sini nga mga pamangkot para matigayon naton ang may kahulugan nga kabuhi. Nahibaluan ni Jesus kon diin naton makita ang masaligan nga mga sabat—sa Pulong sang Dios. Sa iya pangamuyo sa iya Amay, sia nagsiling: “Ang imo pulong kamatuoran.” (Juan 17:17) Mabuligan gid bala kita sang Pulong sang Dios nga makilala ang Dios kag mangin malipayon?
HALIMBAWA:
Bilang lead singer sang bantog nga banda, may kahigayunan gid si Esa nga mangin kilala. Pero, indi gihapon sia malipayon. “Bisan pa nalipay ako nga mangin bahin sang banda, may kulang gihapon sa akon kabuhi,” siling niya. Sang ulihi, nakilala niya ang isa sa mga Saksi ni Jehova. “Ginpaarakan ko sia sing pamangkot,” siling ni Esa. “Ang iya lohiko kag base sa Biblia nga mga sabat nagpainteres sa akon, gani nagtuon ako sa Biblia upod sa iya.” Ang iya mga natun-an sa Biblia nagtandog gid sang iya tagipusuon kag nagpahulag sa iya nga idedikar ang iya kabuhi kay Jehova. “Sang una, madamo ako sang problema kag kabudlayan nga ginaatubang,” siling niya. “Pero subong, may matuod na nga katuyuan ang akon kabuhi.” *
PRINSIPIO: “Malipayon ang mga maluluy-on.”—Mateo 5:7.
KON PAANO INI MAKABULIG NGA MATIGAYON ANG MAY KAHULUGAN NGA KABUHI:
Ang kaluoy nagalakip sang pagpakita sing kaawa, kaayo, kag konsiderasyon. Nagpakita si Jesus sing kaluoy sa mga nagakinahanglan. Ginpahaganhagan niya ang pag-antos sang iban kay naluoy sia sa ila. (Mateo 14:14; 20:30-34) Kon ilugon naton ang iya pagkamaluluy-on, mangin may kahulugan ang aton kabuhi, kay ang kaluoy nagaresulta sa kalipay. (Binuhatan 20:35) Makapakita kita sing kaluoy sa iban paagi sa aton maayo nga mga pulong kag buhat, nga nagalugpay sa mga nagakinahanglan sang aton bulig. Ang pagpakita bala sing kaluoy magapauswag gid sang aton kabuhi?
Sanday Maria kag Carlos
HALIMBAWA:
Maayo nga halimbawa sang pagkamaluluy-on si Maria kag ang iya bana nga si Carlos. Balo na ang amay ni Maria, kag sining karon lang indi na sia makabangon. Gindala sia nanday Maria kag Carlos sa ila balay kag gin-aman ang tanan niya nga kinahanglanon. Pirme sila indi makatulog kon gab-i, kag ginahingagaw nila sia sa ospital kon atakehon sia sang iya diabetes. Nagsiling sila nga ginakapoy na gid sila kon kaisa. Pero malipayon sila, pareho sang ginsiling ni Jesus, bangod nahibaluan nila nga ginaamanan nila ang amay ni Maria sang iya mga kinahanglanon.
PRINSIPIO: “Malipayon ang mga makihidaiton.”—Mateo 5:9.
KON PAANO INI MAKABULIG NGA MATIGAYON ANG MAY KAHULUGAN NGA KABUHI:
Ang “makihidaiton” literal nga nagakahulugan sang “manugpahidait.” Paano mangin mas may kahulugan ang aton kabuhi kon manugpahidait kita? Mangin maayo ang aton kaangtanan sa mga tawo sa palibot naton. Maayo gid nga dumdumon naton ang laygay sang Biblia: “Tubtob sa masarangan ninyo, magpakighidait sa tanan nga tawo.” (Roma 12:18) Ang “tanan nga tawo” nagalakip sa mga miembro sang pamilya kag sa iban nga tuhay sa aton sang relihion. Mangin mas may kahulugan gid bala ang aton kabuhi kon makighidait kita sa “tanan nga tawo”?
Si Nair
HALIMBAWA:
Binagbinaga ang halimbawa ni Nair. Sa sulod sang tinuig, nakaatubang sia sing madamo nga kabudlayan nga nagtilaw sang iya ikasarang sa pagpakighidait, ilabi na sa iya mismo pamilya. Sugod sang ginbayaan sia sang iya bana mga 15 ka tuig na ang nagligad, sia na lang ang nagsagod sa iya mga kabataan. Ang isa sang mga bata niya nga lalaki nangin adik kag masami nga indi makontrol. Ginapahog niya si Nair kag ang bata niya nga babayi. Nagapati si Nair nga ang iya natun-an sa Biblia amo ang naghatag sa iya sang kusog nga makighidait, bisan sa sining mabudlay nga mga kahimtangan. Ginalikawan niya nga magbais ukon magbato. Ginatinguhaan niya nga magpakita sing kaayo, simpatiya, kag paghangop sa iban. (Efeso 4:
GINAHUNAHUNA ANG PALAABUTON
Kon sundon naton ang maayo nga laygay ni Jesus, makasapo kita sing kalipay kag pagkakontento. Pero, kinahanglan nga mahibaluan man naton ang matabo sa palaabuton para matigayon naton ang may kahulugan nga kabuhi. Kay man, ano ang kapuslanan sang may kahulugan nga kabuhi kon ang nahibaluan lamang naton amo nga magatigulang kita, magabalatian, kag dayon mapatay? Pero amo sini ang aton kabuhi sa sini nga kalibutan.
Apang may maayo nga balita! May gintigana nga mga pagpakamaayo si Jehova sa tanan nga nagapanikasog nga ‘magpadayon sa paglakat subong sang paglakat ni Jesus.’ Nagapromisa si Jehova nga malapit na lang niya paluntaron ang matarong nga bag-o nga kalibutan, diin ang matutom nga mga tawo mabuhi sing wala katapusan nga may perpekto nga panglawas subong sang gintuyo ni Jehova para sa ila. Ang Biblia nagasiling: “Yari karon! Ang tolda sang Dios yara sa mga tawo, kag magapuyo sia kaupod nila, kag sila mangin iya mga katawhan. Kag ang Dios mismo mangin kaupod nila. Kag pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”
Si Maria, ang 84 anyos nga babayi nga ginsambit sa una nga artikulo, malipayon nga nagahulat nga matuman ini nga mga pulong. Kamusta sa imo bahin? Gusto mo bala mahibaluan ang dugang pa parte sa “matuod nga kabuhi”
^ par. 8 Mabasa mo ang bilog nga sugilanon ni Esa sa artikulo nga “Ang Biblia Nagapabag-o sang Kabuhi—Kalain Gid sang Akon Batasan.”
^ par. 18 Ang libro nga Ano Gid ang Ginatudlo Sang Biblia?, nga ginhimo sang mga Saksi ni Jehova, nakabulig sa madamo nga matun-an ang ginasiling sang Biblia sa lainlain nga topiko.
Basi Manamian Ka Man
SABAT SA MGA PAMANGKOT SA BIBLIA
Ano ang Kahulugan sang Kabuhi?
Napamangkot mo na bala, ‘Ano ang katuyuan sang kabuhi?’ Hibalua kon paano ginasabat sang Biblia ini nga pamangkot.
SABAT SA MGA PAMANGKOT SA BIBLIA
Ano ang Himuon sang Ginharian sang Dios?
Hibalua kon ano ang matabo sa paggahom sang gobierno sang Dios sa duta.
