SI Jonathan, nga isa ka Korean-American, biktima sang pagpasulabi sa rasa sang bata pa sia. Samtang nagadaku, nangita sia sang lugar nga indi sia paghukman base lamang sa iya hitsura ukon rasa. Nangin doktor sia sa isa ka banwa sa naaminhan sang Alaska, U.S.A., diin ang iya hitsura kaanggid sa madamo niya nga pasyente. Nagalaum sia nga didto, sa matugnaw nga hangin sang Arctic Circle, makapalagyo na sia sa mas matugnaw nga hangin sang pagpasulabi.

Pero ini nga paglaum naalimunaw sang ginbulong niya ang 25 anyos nga babayi. Sang nakabugtaw na ini sa coma, nagtulok sia kay Jonathan kag namuyayaw kay gintudluan sia halin sang iya pagkabata nga dumtan ang mga Koreano. Para kay Jonathan, ini nga hitabo isa ka masakit nga pahanumdom nga indi sia makapalagyo sa pagpasulabi bisan pa sang iya pagpaninguha nga magsaylo kag makigbagay.

Ang eksperiensia ni Jonathan nagapadaku sang masakit nga kamatuoran. Ang pagpasulabi ara bisan diin. Daw ginapakita sini nga basta may tawo, may pagpasulabi.

 Pero makalilibog nga bisan pa lapnag ang pagpasulabi, madamo ang nagapakamalaut sa sini. Paano nangin tuman kalapnag ang butang nga ginakaugtan gid? Maathag nga madamo sang nagapakamalaut sang pagpasulabi ang wala makahibalo nga ginahimo na gali nila ini. Ikaw man bala? Ano ang masiling mo?

Narealisar man naton ini ukon wala, mabudlay naton mahibaluan kon bala may pagpasulabi na kita sa aton tagipusuon. Ginapaathag sang Biblia kon ngaa amo sini: “Ang tagiposoon malimbongon labaw sa tanan nga butang.” (Jeremias 17:9) Gani, mahimo malimbungan naton ang aton kaugalingon sa pagpati nga wala kita sing may ginapasulabi. Ukon mahimo kita mangatarungan nga may nagakaigo kita nga rason kon ngaa negatibo ang aton pagtamod sa pila ka grupo.

Sa pag-ilustrar sa hangkat sang paghibalo kon bala may natago kita nga pagpasulabi, imadyina ini nga kahimtangan: Nagalakat ka nga isahanon sa madulom nga kalye. Duha ka pamatan-on nga lalaki nga indi mo kilala ang masugata mo. Daw makusog sila kag daw may ginakaptan ang isa.

Mahinakop ka bala nga delikado ka sa ila? Ibutang ta nga bangod sang imo mga eksperiensia sadto dapat ka maghalong, pero yadtong mga eksperiensia magapakamatarong bala sang imo konklusion nga ining duha ka pamatan-on makatalagam? Ang mas makapahunahuna nga pamangkot amo, Ano nga rasa ukon grupo sa banta mo ining mga lalaki? Ang sabat mo sa sini nga pamangkot mahimo nagapakita kon bala may pagpasulabi ka.

Kon bunayag kita sa aton kaugalingon, mahimo nga batunon naton nga tanan kita may ara gid sang pagpasulabi. Bisan ang Biblia nagakilala sang kinaandan gid nga sahi sang pagpasulabi sang nagsiling ini: “Ang tawo nagatan-aw lang sa hitsura.” (1 Samuel 16:7, Ang Pulong sang Dios, APD) Bangod tanan kita naimpluwensiahan sining tawhanon nga huyog—nga sa masami may makahalalit nga mga epekto—may posibilidad pa bala nga madaug ukon madula naton ang pagpasulabi? Kag posible pa ayhan nga madula ang pagpasulabi sa bilog nga kalibutan?