Epektibo ang laygay sang Biblia kon paano magmalipayon ang pag-asawahay kay naghalin ini kay Jehova nga Dios, ang Tagtukod sang pag-asawahay. Nagatudlo ini sa aton nga palambuon ang mga kinaiya para magmalipayon ang pag-asawahay kag nagapaandam sang mga batasan nga makaguba sini. Ginatudluan man kita sini sang ikasarang sa pagkomunikar nga makadugang sang kalipay sa pag-asawahay.—Basaha ang Colosas 3:8-10, 12-14.

Dapat padunggan kag tahuron sang mga bana kag asawa ang isa kag isa. Kon sundon nila ang tagsa ka katungdanan sa pag-asawahay nga ginhatag sa ila sang Dios, mangin malipayon sila.—Basaha ang Colosas 3:18, 19.

Indi magbulagay ang mag-asawa kon nagahigugmaanay sila. Ginatudluan kita sang Dios kon paano maghigugma. Sia kag ang iya Anak nga si Jesus amo ang himpit nga halimbawa sang gugma nga may pagsakripisyo.—Basaha ang 1 Juan 4:7, 8, 19.

Kon tamdon sang mag-asawa nga ang pag-asawahay halin sa Dios, indi sila magbulagay. Gintukod sang Dios ang pag-asawahay nga mangin permanente para mangin malig-on ang pamilya. Mangin madinalag-on ang pag-asawahay kay gintuga sang Dios ang lalaki kag babayi nga may ikasarang nga makigbagay sa isa kag isa sa pisikal kag emosyon. Gintuga man niya sila sa iya laragway, nga may ikasarang nga ilugon ang iya gugma.—Basaha ang Genesis 1:27; 2:18, 24.