Parte sa pagpatay kay Jesus kag sa duha ka kriminal sa usok sang pag-antos, ang Ebanghelyo nagasiling: “Ginpangabay sang mga Judiyo si Pilato nga balbagon ang mga batiis sang mga tawo kag kuhaon ang ila bangkay.”—Juan 19:31.

May kasuguan ang mga Judiyo nga ang lawas sang kriminal sa usok pagkatapos sang iya kamatayon “indi magpabilin sa kahoy sa bug-os nga gab-i.” (Deuteronomio 21:22, 23) Amo man sini ang ginpatuman sang mga Judiyo sa mga ginpatay sa usok sang mga Romano. Sa sini nga higayon, ang pagbalbag sang mga batiis sini nga mga tawo magapadasig sang ila kamatayon amo nga malubong sila antes magsugod ang Adlaw nga Inugpahuway sa pagtunod sang adlaw.

Sa pareho sini nga pagpatay, ang isa ka ginpakamalaut nga tawo ginalansangan ang kamot kag tiil sa kahoy. Kon patindugon na ang kahoy, tuman kasakit ang iya ginabatyag, bangod sang lansang nga nagadala sang kabug-aton sang iya lawas. Agod makaginhawa sia, dapat iduso niya ang iya kaugalingon pababaw. Pero kon bali na ang iya tul-an sa batiis, indi na niya mahimo ini. Amo nga mapatay sia dayon tungod indi na sia makaginhawa.

Ang labyog amo ang gingamit ni David para patyon ang higante nga si Goliat. Mahimo nga nangin hanas si David sa paggamit sini sang batan-on pa sia bilang manugbantay sang karnero.—1 Samuel 17:40-50.

Makita ang labyog sa mga art sa Egipto kag Asiria sa tion sang Biblia. Ini nga hinganiban may bulutangan sang bato nga panit ukon tela nga naangot sa duha ka higot. Mahimo ibutang sang nagagamit sang labyog ang tipulon nga bato nga mga 5 tubtob 7.5 sentimetros ang kadakuon nga nagabug-at sing mga 250 ka gramo. Palibuton dayon niya ang labyog sa ibabaw sang iya ulo kag buy-an ang isa ka higot, amo nga magalupad ang bato nga tuman kabaskog kag maigo ang iya iliguon.

May nakutkutan nga madamo nga bato nga ginagamit sa labyog sa Middle East nga halin pa sa mga inaway sang una. Ang hanas nga hangaway mahimo maglabyog nga may kabaskugon nga 160 tubtob 240 kilometros kada oras. Wala nagaugyon ang mga iskolar nga pareho katayog ang labyog sa pana, pero pareho lang ini nga duha nga makamamatay.—Hukom 20:16.