Si Naoko, nga ginsambit sa nagabukas nga artikulo, nagsiling parte sa iya pag-­untat sa pagpanigarilyo, “Nabag-o ko ang akon kabuhi bangod sang akon natun-an nga kamatuoran parte sa mga kinaiya kag katuyuan sang Dios.” Ang iya mga natun-an makita sa Biblia. Bisan pa wala ginsambit sang Biblia ang parte sa tabako, nagabulig ini sa aton nga maintiendihan ang pagtamod sang Dios sa pagpanigarilyo. * Para sa madamo, ina nga ihibalo nagahatag sa ila sang rason para mabatuan ukon mauntatan ini nga bisyo. (2 Timoteo 3:16, 17) Binagbinagon naton ang tatlo ka bantog nga halit sang pagpanigarilyo kag hibaluon naton kon ano ang ginasiling sang Biblia parte sa sini.

Ang tabako may makapaadik gid nga droga—ang nikotina. Ginagamit ini nga pangpapagsik kag pangpakalma. Madasig kag sulitsulit nga nagakadto sa utok ang nikotina kon nagapanigarilyo. Bangod ang isa ka pagsuyop nagasuplay sang isa ka dose sang nikotina, ang isa ka pakete kada adlaw nga ginasigarilyo katumbas sang 200 ka dose kada adlaw, nga mas mataas sangsa bisan ano nga droga nga ginagamit. Gani makapaadik gid ini. Kon naadik na ang isa, pangitaon niya ini kon kulang sia sang nikotina.

Ginabuligan kita sang Biblia nga makatigayon sing husto nga pagtamod sa sini. Ini nagasiling: “Wala bala kamo makahibalo nga kon padayon ninyo nga ginatugyan ang inyo kaugalingon sa bisan kay sin-o subong mga ulipon sa pagtuman sa iya, mga ulipon kamo niya bangod ginatuman ninyo sia?” (Roma 6:16) Kon ang panghunahuna kag buhat sang isa ginakontrol na sang iya handum sang tabako, mangin ulipon na sia sining mahigko nga buhat. Pero, luyag sang Dios, nga ang ngalan si Jehova, nga mangin hilway kita indi lamang sa mga buhat nga nagahalit sa aton lawas kundi sa nagahalit man sang aton espiritu, ang aton panimuot. (Salmo 83:18; 2 Corinto 7:1) Gani, samtang nagadugang ang apresasyon kag pagtahod sang isa kay Jehova, mahangpan niya nga takus si Jehova sang iya pinakamaayo kag indi niya ini mahimo sa Dios samtang ulipon sia sining makamamatay nga bisyo. Ini nga pagtamod makabulig sa iya nga mapakigbatuan ining makahalalit nga mga handum.

Si Olaf, nga nagaistar sa Germany, nakalandas sa 16 ka tuig nga pagkaadik sa sigarilyo nga nagsugod sang 12 anyos sia. “Daw wala lang sing epekto ang una nga sigarilyo,” siling niya. “Pero pagligad sang mga tuig grabe na ang epekto sini. Isa ka bes sang naubusan ako sang sigarilyo, naglalain gid ako amo nga gintipon ko ang tanan nga upos sa ash­tray, ginkuha ang nagkalabilin nga tabako, kag ginlikit ini sa papel. Narealisar ko nga makahuluya gid ini.” Pero paano niya nalandas ang pagkaadik sa sigarilyo? “Ang importante gid nga rason amo ang akon handum nga pahamut-an si Jehova,” siling niya. “Ang gugma ni Jehova sa mga tawo kag ang ginahatag niya nga paglaum amo ang nagpalig-on sa akon nga untaton na ang akon pagkaadik.”

“Ang pagpanigarilyo . . . napamatud-an na sang siensia nga makahalit sang halos tanan nga organo sang lawas kag nagapadamo sang nagabalatian kag nagakapatay,” siling sang The Tobacco Atlas. Ang pagpanigarilyo nagaresulta sang indi makalalaton nga balatian pareho sang kanser, balatian sa tagipusuon kag baga. Pero suno sa ­World ­Health Organiza­tion (WHO), ang pagpanigarilyo amo man ang panguna nga ginatunaan sang kamatayon bangod sa makalalaton nga mga balatian pareho sang anos.

Paagi sa iya Pulong, ang Biblia, ginatudluan kita ni Jehova nga Dios nga tamdon sing nagakaigo ang aton kabuhi, lawas, kag ikasarang. Ginpadaku ini sang iya Anak, nga si Jesus, sang nagsiling sia: “Higugmaon mo si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” (Mateo 22:37) Maathag nga luyag sang Dios nga gamiton naton sing nagakaigo ang aton kabuhi kag lawas kag tahuron ang iban. Samtang ginatun-an naton ang parte kay Jehova kag sa iya mga saad, labi naton nga ginahigugma kag ginapabaloran ang tanan nga ginhimo niya para sa aton. Amo ini ang magapahulag sa aton nga likawan ang bisan ano nga makapahigko sa aton lawas.

Si Jayavanth, doktor sa India, nagpanigarilyo sing 38 ka tuig. Nagsiling sia: “Nahibaluan ko ang mga katalagman sang pagpanigarilyo sa mga balasahon parte sa medisina. Nahibaluan ko nga sala ini, kag ginlaygayan ko ang akon mga pasyente nga untatan ini nga bisyo. Pero indi ko man ini mauntatan, bisan pa gintilawan ko na sing lima ukon anom ka beses.” Ano ang nakabulig sa iya nga untatan ini? Nagsiling sia: “Nag-­untat ako sa pagpanigarilyo kay nagtuon ako sa Biblia. Luyag ko gid nga pahamut-an si Jehova amo nga napahulag ako nga untatan dayon ini nga bisyo.”

Makahililo ang ginabuga nga aso kag ang aso nga halin sa nagasiga nga sigarilyo. Ang paghaklo sini magaresulta sa kanser kag iban pa nga balatian, kag kada tuig nagapatay ini sing 600,000 ka wala nagapanigarilyo, nga sa masami mga babayi ukon kabataan. Ang WHO nagapaandam: “Makatalagam gid ang paghaklo sang aso nga halin sa nagapanigarilyo.”

Suno kay Jesus, ang gugma sa isigkatawo—sa aton pamilya, abyan, kag iban pa sa palibot naton—ikaduha lang sa aton gugma sa Dios. “Higugmaon mo ang  imo isigkatawo subong sang imo kaugalingon,” siling niya. (Mateo 22:39) Kon padayunon naton ang bisyo nga makahalit sa mga suod sa aton, wala kita nagapakita sing gugma sa aton isigkatawo. Ang matuod nga gugma magapahulag sa aton nga tumanon ang laygay sang Biblia: “Padayon nga pangitaon sang kada isa, indi ang iya kaugalingon nga kaayuhan, kundi ang iya sang iban nga tawo.”—1 Corinto 10:24.

Si Armen, nga nagaistar sa Armenia, naghinumdom: “Nakitluoy ang akon pamilya nga untatan ko ang pagpanigarilyo kay naapektuhan sila sini. Pero indi ko luyag batunon nga makahalit ini sa ila.” Ginpaathag niya kon ano ang nagpabag-o sang iya pagtamod: “Ang akon nahibaluan sa Biblia kag gugma kay Jehova nagbulig sa akon nga untatan ang pagpanigarilyo kag batunon nga makahalalit ini indi lang sa akon kundi pati man sa mga tawo sa akon palibot.”

Ang Biblia nakabulig kanday Olaf, Jayavanth, kag Armen nga untaton ang malain nga bisyo nga makahalalit sa ila kag sa iban. Nagmadinalag-on sila indi lamang bangod nahibaluan nila nga makahalalit ini kundi bangod natun-an nila nga higugmaon si Jehova kag handum nila nga pahamut-an sia. Ang importante nga papel sang gugma ginpadaku sa 1 Juan 5:3, nga nagasiling: “Amo ini ang kahulugan sang gugma sa Dios, nga tumanon naton ang iya mga sugo; apang ang iya mga sugo indi mabug-at.” Siempre, indi pirme mahapos ang pagtuman sang mga prinsipio sang Biblia, pero kon ang isa napahulag bangod sang iya mabakod nga gugma sa Dios, indi mabudlay ang pagtuman.

Paagi sa kampanya sa edukasyon sa bug-os nga kalibutan, ginabuligan ni Jehova nga Dios ang minilyon nga mahilway kag makalikaw sa pagkaulipon sa tabako. (1 Timoteo 2:3, 4) Sa indi madugay, paagi sa iya Ginharian—isa ka gobierno sa langit sa idalom sang paggahom sang iya Anak, si Jesucristo—dulaon ni Jehova ang makagod nga sistema sang komersio nga amo ang rason sang pagkaulipon sang minilyon sa tabako. Dulaon niya ang halit sang pagpanigarilyo kag atipanon niya ang matinumanon nga mga tawo asta nga mangin himpit sila sa lawas kag hunahuna.—Isaias 33:24; Bugna 19:11, 15.

Kon nabudlayan ka nga untaton ang pagpanigarilyo, indi mangampo. Paagi sa pagtuon nga higugmaon si Jehova kag sundon ang iya pagtamod sa pagpanigarilyo, makakita ka man sing motibasyon nga kinahanglan para mangin madinalag-on. Nalipay gid ang mga Saksi ni Jehova nga hatagan ka sing praktikal nga bulig nga matun-an kag maaplikar ang mga prinsipio sang Biblia. Makasalig ka nga kon luyag mo sang bulig ni Jehova para mauntatan ang pagkaadik sa tabako, hatagan ka niya sing ikasarang kag kusog nga kinahanglanon mo.—­Filipos 4:13.