Makatarunganon bala nga magpaabot si David nga ulikdan sia sang Dios? Nagaulikid bala ang Dios sa imo? Madamo ang indi makapati nga interesado ang labing gamhanan nga Dios sa ila. Ngaa?

Ang isa ka rason amo nga ang Dios tuman kataas sangsa mga tawo. Kon ikumparar sa iya mataas nga posisyon, ang mga tawo daw “subong sang isa ka tolo gikan sa timba, kag ginaisip subong sang diotay nga yab-ok sang timbangan.” (Isaias 40:15) Ang isa ka manunulat nga nagapangduhaduha naghinakop nga “indi gid mapatihan nga may Dios nga interesado sa imo mga ginahimo.”

Ang iban naman nagabatyag nga indi sila takus nga ulikdan sang Dios bangod sang ila mga ginahimo. Halimbawa, si Jim nagsiling: “Pirme ako nagapangamuyo sang kalinong kag pagpugong sa kaugalingon, pero dugaydugay, akig naman ako. Sang ulihi, naghinakop ako nga tuman gid ako kalain amo nga wala ako ginbuligan sang Dios.”

Tuman bala ka layo ang Dios sa mga tawo amo nga wala sia nagaulikid sa aton? Ano gid bala ang iya pagtamod sa iya mga tinuga nga indi himpit? Kon indi pag-isugid sang Dios ang parte sa iya kaugalingon, wala sing tawo nga makasugid parte sa iya kag makasabat sa sini nga mga pamangkot. Pero, ang Biblia nga amo ang mensahe nga gingiyahan sang Dios para sa katawhan, nagapasalig sa aton nga nagaulikid gid sia sa aton. “Ang matuod,” siling sang Biblia, “indi sia malayo sa tagsa sa aton.” (Binuhatan 17:27) Sa masunod nga apat ka artikulo, binagbinagon naton kon ano ang ginasugid sang Dios parte sa iya pag-ulikid sa mga tawo kag kon paano niya ini ginapakita sa imo.