Ang korapsion sa gobierno amo ang pag-abuso sa awtoridad para sa kaugalingon nga kaayuhan. Madugay na ini nga ginahimo. Halimbawa, sang nagligad nga 3,500 ka tuig, ginadumili na sang kasuguan sa Biblia ang hamham sa hudisyal nga mga kaso. (Exodo 23:8) Ang korapsion wala lamang nagapatuhoy sa pagbaton sing hamham. Kon kaisa, ang korap nga mga opisyal nagapamentaha, nagapangawat sa mga pundo kag sing mga butang. Mahimo pa gani nila gamiton ang ila posisyon agod paboran ang ila mga abyan kag mga paryente.

Bisan pa may korapsion sa mga organisasyon sang tawo, ang korapsion sa gobierno amo ang pinakamalala. Suno sa report sang Global Corruption Barometer sang 2013 nga ginbalhag sang Transparency International, para sa mga tawo sa bilog nga kalibutan, ang lima ka pinakakorap nga institusyon amo ang mga partido sa pulitika, pulisiya, mga opisyal sang gobierno, lehislatura, kag hudikatura. Talupangda ang pila ka report parte sini.

• APRIKA: Sang 2013, ginkasuhan ang mga 22,000 ka opisyal sang gobierno sa Bagatnan nga Aprika bangod sang korapsion.

• AMERIKA: Sang 2012, ginpriso ang 25 ka tawo sa Brazil kay gingamit nila ang pundo sang publiko agod baklon ang boto sang mga tawo. Lakip sa napriso ang anay chief of staff sang presidente nga amo ang ikaduha sa pinakagamhanan nga tawo sa sini nga pungsod.

• ASIA: Sa Seoul, South Korea, 502 ka tawo ang napatay sang narumpag ang daku nga balaligyaan sang 1995. Nasapwan sang mga imbestigador nga ginhamhaman sang mga kontraktor ang mga opisyal sang siudad para hilway sila sa paggamit sing pigaw nga mga materyales kag sa paglapas sa mga pagsulundan agod malikawan ang mga katalagman.

• EUROPA: “Malala na gid ang problema [sa korapsion sa Europa],” suno sa European Commission Home Affairs Commissioner nga si Cecilia Malmström. Nagsiling pa sia nga “indi makita ang panikasog sang gobierno nga dulaon ang korapsion.”

Grabe na gid ang korapsion sa gobierno. Si Propesor Susan Rose-Ackerman, nga eksperto sa mga isyu sa pagdula sang korapsion, nagsulat nga kinahanglan “bag-uhon sang gobierno ang ila paghimo sing mga transaksion.” Bisan pa daw wala na sing paglaum ang kahimtangan, ginapakita sang Biblia nga ang daku nga pagbag-o indi lamang posible kundi pat-od nga matabo.