Sabat sa mga Pamangkot sa Biblia
Ano ang Adlaw sang Paghukom?
Ngaa ang adlaw sang paghukom isa ka malipayon nga tion?
Sang panahon sang Biblia, gingamit sang Dios ang mga hukom sa pagluwas sa iya katawhan gikan sa inhustisya. (Hukom 2:18) Ginalaragway sang Biblia ang Adlaw sang Paghukom nga magaabot subong makalilipay nga tion diin si Jehova, ang Hukom sa bug-os nga duta, magaluwas sa katawhan gikan sa inhustisya.—Basaha ang Salmo 96:12, 13; Isaias 26:9.
Gintangdo sang Dios si Jesus nga maghatag sing hustisya sa mga buhi kag sa mga patay. (Binuhatan 10:42; 17:31) Madamo nga tawo ang napatay nga wala nakakilala sa Dios. Sa Adlaw sang Paghukom, banhawon ni Jesus ini nga mga tawo agod makilala nila kag mahigugma ang matuod nga Dios.—Basaha ang Binuhatan 24:15.
Ngaa ang Adlaw sang Paghukom magalawig sing isa ka libo ka tuig?
Ang mga patay banhawon sa tion sang isa ka libo ka tuig. (Bugna 20:4, 12) Nagakinahanglan sila sing tion agod makatuon sa mga dalanon sang Dios kag magtuman sa iya. Indi pareho sa pirme mabatian nga opinyon, ginapakita sang Biblia nga ang mga tawo hukman base sa kon ano ang ila himuon sa tapos sila banhawon.—Basaha ang Roma 6:7.
Ginalaragway man sang Biblia ang adlaw sang paghukom nga gulpi lang matabo antes magsugod ang isa ka libo ka tuig. Ina nga adlaw ginatawag man nga katapusan, subong sang ginbinagbinag sa mga artikulo sa kober sini nga isyu. Sa sina nga adlaw, laglagon sang Dios ang tanan nga indi diosnon kag malaut nga mga tawo. (2 Pedro 3:7) Gani, dapat naton pamatud-an ang aton gugma sa Dios.—Basaha ang 2 Pedro 3:9, 13.
