Nagdaku ako sa isa ka pigado nga bahin sang siudad sang Montreal. Sang anom pa lang ako ka bulan, napatay si Tatay, gani si Nanay ang nag-abaga sang tanan nga responsibilidad sa panimalay. Ako ang kinagot sa walo ka kabataan.

Samtang nagadaku ako, adlaw-adlaw ako nga nadalahig sa droga, sugal, kasingki, kag pagpakig-upod sa mga kriminal. Sa edad nga dies anyos, nangin bugaw ako sang mga prostityut kag nagtrabaho sa mga nagapautang sing sakaan nga sobra kataas ang interes. Pirme ako nagabinutig kag nanamian sa pagtunto sa mga tawo. Daw droga ini para sa akon.

Sang 14 anyos ako, maayo na ako magpanunto sa mga tawo. Halimbawa, mangumpra ako sing gold-plated nga mga relo, pulseras, kag singsing, kag ginamarkahan ini nga 14-carat nga bulawan, kag ibaligya sa mga kalye kag sa mga palarkingan sang mga balaligyaan. Nawili ako sa mahapos nga pagpangita sing kuarta. Isa ka bes, nakakuarta ako sing $10,000 sa isa lang ka adlaw!

Sang ginpagua ako sa isa ka institusyon sa pagreporma sa edad nga 15, wala na ako sing maistaran. Nagtulog ako sa mga kalye, mga parke, ukon sa mga balay sang mga kilala ko.

Bangod sang akon pagpanunto, pirme ako ginainterogar sang pulis. Pero wala ako nagabaligya sang kinawatan, gani wala ako nakaagi priso. Apang daku ang multa ko bangod sa pagpanunto, pagpangdaya, kag pagbaligya nga wala sing permit. Bangod wala ako sing ginakahadlukan, nangin kolektor pa gani ako sang mga nagapautang. Delikado gid ina, kag kon kaisa nagadala ako sing pusil. Pila ka beses ako nga nag-obra sa sindikato.

Una ko nga nabasa ang Biblia sang 17 anyos ako. Ginapuyo ko ang akon nobya sang nagtuon sia sing Biblia sa mga Saksi ni Jehova. Pero indi ako komporme sa mga ginadumili sang Biblia, gani ginbiyaan ko sia kag ginpuyo ang isa pa ka babayi nga ginadeyt ko.

 Pero nagbag-o ang tanan sang nagtuon man sa mga Saksi ang akon ikaduha nga nobya! Nagbag-o sia, kag nagdayaw gid ako kay nangin mas mabuot sia kag mapinasensiahon. Ginbaton ko ang pangagda nga magtambong sa Kingdom Hall sang mga Saksi ni Jehova. Gin-abiabi ako sang disente kag mabuot nga mga tawo. Kabaliskaran gid ini sa kalibutan nga akon nabal-an. Wala ko nabatyagan nga bahin ako sang isa ka pamilya; nagdaku ako nga wala gid nakabatyag sang ila pagpalangga. Ang mainit nga pag-abiabi sa akon sang mga Saksi ni Jehova amo gid ang akon ginahandum. Sang gintanyagan ako sang mga Saksi nga magtuon sang Biblia, ginbaton ko ini dayon.

Ang akon ginatun-an sa Biblia mahimo nagluwas sa akon kabuhi. Nagaplano kami sang duha ko pa ka upod nga mangawat agod mabayaran ang mga utang ko sa sugal, nga nagabalor sing sobra $50,000. Apang maayo lang gid nga wala ako nag-upod sa ila! Gindayon nila ang pagpangawat. Naaresto ang isa sa ila, kag ang isa napatay.

Samtang nagapadayon ako sa pagtuon sing Biblia, nakita ko nga madamo ako sing dapat bag-uhon. Halimbawa, natun-an ko ang ginasiling sang Biblia sa 1 Corinto 6:10: Ang “mga kawatan, mga makagod, mga palahubog, mga nagatamay sa iban, kag mga manugkilkil indi makapanubli sang Ginharian sang Dios.” Sang nabasa ko ini nga teksto, nakahibi gid ako bangod sang akon kahimtangan. Narealisar ko nga kinahanglan ko gid ang daku nga pagbag-o. (Roma 12:2) Masingki ako kag maisog, kag ang akon bug-os nga kabuhi puno sing kabutigan.

Apang, natun-an ko man sa Biblia nga si Jehova maluluy-on kag mapinatawaron. (Isaias 1:18) Nangamuyo ako sing hanuot, nga nagapakitluoy kay Jehova nga buligan ako nga mabayaan ang akon pagkabuhi sadto. Paagi sa iya bulig, amat-amat ko nga nabag-o ang akon personalidad. Ang isa ka daku nga pagbag-o nga nahimo ko amo ang pagpakasal sa akon nobya.

Beinte kuatro anyos ako, may asawa kag tatlo ka bata. Kinahanglan ko karon mangita sing disente nga trabaho. Pero wala ako sing tinapusan kag wala man sing magarekomendar sa akon. Nangamuyo ako liwat sing hanuot kay Jehova. Dayon nangita ako sing obra. Ginasugiran ko ang posible nga mangin amo ko nga gusto ko bag-uhon ang akon kabuhi kag mag-obra sing bunayag. Kon kaisa, ginapaathag ko nga nagatuon ako sing Biblia kag handum ko nga mangin isa ka maayo nga banwahanon. Madamo ang wala magbaton sa akon. Sang ulihi, sa tapos ko masugid ang akon inagihan sa isa pa ka interbyu, nagsiling sa akon ang nagainterbyu: “Indi ko mahangpan, pero daw may nagasiling sa akon nga batunon ko ikaw.” Sabat gid ini sa akon mga pangamuyo! Sang ulihi, nabawtismuhan kami sang akon asawa subong mga Saksi ni Jehova.

Buhi ako subong bangod sa pag-aplikar sang mga prinsipio sang Biblia kag pagkabuhi subong Cristiano. May malipayon ako nga pamilya. Bangod kumbinsido ako nga ginpatawad na ako ni Jehova, wala na ako ginakonsiensia.

Sa sulod sang 14 ka tuig, nagaalagad ako subong bug-os tion nga ministro, nga nagabulig sa iban nga matun-an ang ginatudlo sang Biblia, kag sining karon lang, nag-alagad man sing bug-os tion subong ministro ang akon asawa. Sa sulod sang 30 ka tuig, nalipay ako nga nabuligan ko ang 22 ka kaupod ko sa trabaho nga magsimba kay Jehova. Nagakadto gihapon ako sa mga balaligyaan—pero indi sa pagpanunto sa mga tawo pareho sang ginhimo ko sadto. Kon nagakadto ako didto subong, ginasugid ko sa ila ang akon ginatuuhan. Gusto ko ihatag ini sa ila: ang paglaum nga mabuhi sa bag-o nga kalibutan nga wala na sing manugtunto.—Salmo 37:10, 11.