Pagkasalimpapaw! Madula Pa Bala Ini?
SI Panayiota nagdaku sa isa ka isla sa Mediteraneo. Sang tin-edyer sia, interesado na sia sa pulitika. Sang ulihi, nangin sekretarya sia sang isa ka partido sang pulitika sa ila baryo. Nagapamalaybalay pa sia gani agod makatipon sing pundo para sa partido. Apang sang ulihi, nadulaan sing gana si Panayiota sa sini. Bisan pa ginakabig nila ang isa kag isa subong amigo, yara gihapon ang nepotismo, ambisyon, bangigay, kag kahisa.
Nagdaku si Daniel sa relihioso katama nga pamilya sa Ireland. Pero makapasubo nga maathag gihapon sa iya panumduman ang pagkasalimpapaw sang mga pari nga nagapahubog, nagapanahor, kag nagakawat sang mga ginakolekta nga kuarta, samtang nagawali man sila nga sunugon sa impierno ang mga makasasala.
Si Jeffery madugay na nga nagaobra subong ahente sang mga tag-iya sang mga barko sa lainlain nga pungsod nga nakabase sa United Kingdom kag Estados Unidos. Madumduman pa niya ang madamo nga beses nga nagapangdaya ang mga kliyente kag mga kakompetensia kon naganegosyar sa mga opisyales sang gobierno. Nagabinutig sila kag nagatinikal agod lang makuha ang kontrata.
Makapasubo nga nagakatabo ini bisan diin lang. Kinaandan na lang karon ang pagkasalimpapaw sa halos tanan nga hilikuton sang tawo—sa pulitika, relihion, kag negosyo. Nagakaigo nga ang Ingles nga tinaga nga “hypocrite” (salimpapaw) naghalin sa Griego nga tinaga nga nagapahangop sing isa ka humalambal ukon artista sa entablado nga masami nagasuksok sang maskara. Sang ulihi, ang tinaga nagapatuhoy kay bisan sin-o nga nagapakunokuno agod dayaan ang iban ukon agod makapamentaha sa iban.
Ang mga apektado sang pagkasalimpapaw nagabatyag sing mabaskog nga emosyon, lakip ang kaugot, kaakig, kag hinakit. Ang mga biktima mahimo na lang magsiling: “Pagkasalimpapaw! Madula pa bala ini?” Maayo lang kay ang Pulong sang Dios nagahatag sa aton sing mga rason nga magpati nga madula ini.
ANG PAGTAMOD SANG DIOS KAG SANG IYA ANAK SA PAGKASALIMPAPAW
Suno sa Biblia, ang pagkasalimpapaw nagsugod, indi sa mga tawo kundi sa indi makita nga espiritu nga tinuga. Sa pagsugod sang maragtas sang tawo, gingamit ni Satanas nga Yawa ang man-ug bilang maskara kag nagpakunokuno sia nga mabinuligon agod patalangon ang una nga babayi nga si Eva. (Genesis 3:1-5) Sugod sadto, madamo nga tawo ang nagapakunokuno, kag ginahimo nila ini agod dayaan ang iban kag agod makapamentaha.
Sang ang dumaan nga pungsod sang Israel naghimo sing butig nga pagsimba kag pagkasalimpapaw sa espirituwal, sulitsulit nga ginpaandaman sila sang Dios tuhoy sa mga resulta sini. Paagi kay manalagna Isaias 29:13) Sang wala magbag-o ang pungsod, gintugutan sang Dios ang iban nga gamhanan nga pungsod nga laglagon ang sentro sang relihion sang Israel—ang Jerusalem kag ang templo sini—una paagi sa Babilonia sang 607 B.C.E. kag sang ulihi paagi sa mga soldado sang Roma sang 70 C.E. Maathag nga wala ginakunsinti sang Dios nga magpadayon ang pagkasalimpapaw.
Isaias, nagsiling si Jehova nga Dios: “Ini nga katawhan nagpalapit sa akon paagi sa ila baba kag ginhimaya nila ako paagi sa ila bibig, apang ang ila tagipusuon malayo sa akon.” (Sa pihak nga bahin, ginapabaloran gid sang Dios kag sang iya Anak nga si Jesus ang mga tawo nga bunayag kag sinsero. Halimbawa, sa una nga bahin sang ministeryo ni Jesus, nagpalapit sa iya si Natanael. Sang makita sia, nagsiling si Jesus: “Tan-awa, ang matuod nga Israelinhon nga wala nagapangdaya.” (Juan 1:47) Si Natanael, nga kilala man nga si Bartolome, nangin isa sang 12 ka apostoles ni Jesus.—Lucas 6:13-16.
Naghinguyang si Jesus sing tion upod sa iya mga sumulunod, kag gintudluan niya sila sang panghunahuna sang Dios. Dapat indi sila salimpapaw. Bilang paandam sa ila, ginpakamalaut ni Jesus ang pagkasalimpapaw sang mga lider sang relihion sadto. Binagbinaga ang pila sang ginahimo nila.
Naghimo sila sing pakitakita nga “pagkamatarong.” Ginsilingan ni Jesus ang tagpalamati niya: “Mag-andam kamo nga ang inyo pagkamatarong indi lamang pakitakita sa mga tawo . . . kaangay sang ginahimo sang mga salimpapaw.” Ginsilingan man niya sila nga kon maghatag sila sing dulot tungod sa kaluoy dapat “sa tago,” ukon indi pakitakita. Dapat mangamuyo sila sa tago, kag indi agod lang makita sang mga tawo. Sa amo, ang ila pagtuo mangin matuod gid kag ginapabaloran sang iya Amay.—Mateo 6:1-6.
Nagapangmulay sila dayon. Nagsiling si Jesus: “Salimpapaw! Kuhaa anay ang balayan sa imo mata, agod makakita ka sing maayo sa pagkuha mo sing dagami sa mata sang imo utod.” (Mateo 7:5) Ang isa ka tawo nagapakunokuno lang kon sin-o gid sia paagi sa pagtalupangod sa sala sang iban samtang mas daku ang iya mismo sala. Kay ang matuod, “ang tanan nakasala kag wala makalab-ot sa himaya sang Dios.”—Roma 3:23.
Indi maayo ang ila mga motibo. Isa ka bes, ang mga disipulo sang mga Fariseo kag ang partido sang mga Herodes nagpalapit kay Jesus kag namangkot parte sa buhis. Nagapanginto nga ginsilingan nila si Jesus: “Manunudlo, nahibaluan namon nga tampad ka kag nagatudlo sang dalanon sang Dios suno sa kamatuoran.” Dayon gusto nila sia tiplangon paagi sa pagpamangkot: “Ginatugot bala sang kasuguan ang pagbayad sing buhis sa Cesar ukon ginadumili ini?” Nagsabat si Jesus: “Mga salimpapaw, ngaa ginatilawan ninyo ako?” Husto gid nga gintawag sila ni Jesus nga mga salimpapaw bangod ang matuod indi nila kinahanglan ang sabat sa ila pamangkot kundi luyag nila nga “madakop [sia] paagi sa iya ginahambal.”—Mateo 22:15-22.
Ang matuod nga mga Cristiano nagapakita sing gugma nga “may matinlo nga tagipusuon kag maayo nga konsiensia kag indi salimpapaw nga pagtuo.”—1 TIMOTEO 1:5.
Sang gintukod ang Cristianong kongregasyon sang Pentecostes 33 C.E., nagluntad ang isa ka kahimtangan diin naglambo ang kamatuoran kag pagkabunayag. Ginpanikasugan sang matuod nga mga Cristiano nga dulaon ang mga huyog sang pagkasalimpapaw sa ila personalidad. Halimbawa, ginpalig-on ni Pedro, isa sang 12 ka apostoles, ang mga Cristiano nga ipakita ang ‘pagkamatinumanon sa kamatuoran nga may utudnon nga pagpalangga nga indi salimpapaw.’ (1 Pedro 1:22) Ginlaygayan ni apostol Pablo ang iya mga kaupod nga manugpangabudlay nga ‘maghigugma sila nga may matinlo nga tagipusuon kag maayo nga konsiensia kag indi salimpapaw nga pagtuo.’—1 Timoteo 1:5.
ANG GAHOM SANG PULONG SANG DIOS
Ang mga panudlo ni Jesus kag sang mga apostoles, nga mabasa sa Biblia, epektibo gid karon pareho sang unang siglo. Tuhoy sa sini, nagsulat si apostol Pablo: “Ang pulong sang Dios buhi kag gamhanan kag matalom pa sa bisan ano nga espada nga duha sing sulab kag nagadulot tubtob sa paghamulag sang kalag kag espiritu, kag sang mga lutalutahan sa utok sa tul-an, kag sarang makahantop sang mga panghunahuna kag mga tinutuyo sang tagipusuon.” (Hebreo 4:12) Ang paghibalo sa mga panudlo sang Biblia kag ang pagpanikasog nga iaplikar ini nakabulig sa madamo nga talikdan ang pagkasalimpapaw kag tinguhaan gid nga mangin sinsero kag bunayag. Binagbinaga ang eksperiensia sang tatlo ka tawo nga ginsambit sa umpisa sini nga artikulo.
‘Nakita ko ang matuod nga gugma kag pagpakita sing interes sa isigkatawo.’—PANAYIOTA
Nagbag-o ang kabuhi ni Panayiota sang ginbaton niya ang imbitasyon nga magtambong sa pagtilipon sa Kingdom Hall sang mga Saksi ni Jehova. Wala sia sing nakita nga nagapakitakita nga matarong agod lang magpadayaw sa iban. Nagsiling sia: “Nakita ko didto ang matuod nga gugma kag pagpakita sing interes sa isigkatawo, nga wala ko gid makita sa tinuig nga aktibo ako sa pulitika.”
Nagtuon sing Biblia si Panayiota kag nag-uswag sia asta nga mabawtismuhan. Treinta ka tuig na ina nga nagligad. Nagsiling sia karon: “Nasapwan ko ang matuod nga katuyuan sang kabuhi, indi sang nagapamalaybalay ako nga may ginatib-ong nga partido sa pulitika, kundi sang nagabantala ako parte sa Ginharian sang Dios—ang lamang nga paagi nga matigayon naton ang matarong nga kalibutan.”
“Indi ko masarangan magpakunokuno sa mga kaupod ko nga Cristiano.”—DANIEL
Nag-uswag si Daniel sa Cristianong kongregasyon kag nahatagan sing pila ka responsibilidad. Pagligad sang pila ka tuig, nakahimo sia sing sayop nga desisyon kag ginkonsiensia sia. “Bangod nadumduman ko ang pagkasalimpapaw nga nakita ko sa simbahan sadto,” siling niya, “wala ako sing mahimo kundi buy-an ko ang akon pribilehiyo sa pag-alagad. Indi ko masarangan magpakunokuno sa mga kaupod ko nga Cristiano.”
Makalilipay kay sa tapos sang mga pagbag-o, nagbatyag si Daniel nga makapadayon sia sa iya mga pribilehiyo sa pag-alagad nga may maayo nga konsiensia, kag ginbaton niya liwat ang mga responsibilidad sa kongregasyon. Ini nga pagkabunayag kinaandan na sa mga nagaalagad sa Dios nga wala sing pagkasalimpapaw. Natun-an nila nga ‘kuhaon ang balayan’ sa ila mata antes ‘kuhaon ang dagami’ sa mata sang ila utod.
“Indi ako dapat mangdaya, kag magtinikal. . . . Ginakonsiensia ako.”—JEFFERY
Si Jeffery nga masako gid sa negosyo, nagsiling: “Samtang nagauswag ako sa akon ihibalo sa Biblia, narealisar ko nga indi ako dapat mangdaya, kag magtinikal agod lang makuha ang kontrata. Ginakonsiensia ako bangod sang ginasiling sang mga bersikulo sa Biblia pareho sang Hulubaton 11:1, nga nagasiling sa aton nga ‘ginakangil-aran ni Jehova ang indi bunayag nga timbangan.’” Indi pareho sang mga namangkot kay Jesus parte sa buhis, wala na nagapangdaya si Jeffery sa iya pareho nga mga Cristiano kag sa mga indi tumuluo.
Minilyon ka mga Saksi ni Jehova sa bilog nga kalibutan ang nagatinguha sa pag-aplikar sang ila natun-an sa Biblia. Nagapanikasog gid sila nga “isuklob ang bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.” (Efeso 4:24) Ginapalig-on namon kamo nga hibaluon kon sin-o ang mga Saksi ni Jehova, kon ano ang ila ginapatihan, kag kon paano sila makabulig sa imo nga matun-an ang saad sang Dios parte sa bag-ong kalibutan. Didto “magapuyo ang pagkamatarong” kag wala na sing pagkasalimpapaw.—2 Pedro 3:13.