Hunahunaa nga nagkadto ka sa iban nga pungsod sa una nga tion. Makakita ka sang mga tawo, kustombre, pagkaon, kag kuarta nga indi pamilyar sa imo. Natural lang nga mamag-uhan ka.

Mahimo amo man sini ang imo batyagon sa una mo nga pagbasa sing Biblia. Nagabalik ka sa dumaan nga panahon nga indi pamilyar sa imo. Makita mo didto ang mga tawo nga ginatawag Filistinhon, ang indi kinaandan nga kinabatasan nga ‘paggisi sang bayo,’ ukon ang pagkaon nga ginatawag manna kag ang sensilyo nga drakma. (Exodo 16:31; Josue 13:2; 2 Samuel 3:31; Lucas 15:9) Tanan ini mahimo nga makalilibog. Pareho sang pagbisita sa iban nga pungsod, indi bala malipay ka kon may isa nga magpaathag sa imo sini nga mga butang?

Sang una nga ginsulat ang sagrado nga mga sinulatan sang ika-16 nga siglo B.C.E., may nagbulig agod mahangpan sang mga tawo ang ginsulat. Halimbawa, “ginpaathag ni Moises,” ang una nga lider sang pungsod sang Israel, ang sinulatan.—Deuteronomio 1:5.

Pagligad sang mga napulo ka siglo, may kalipikado gihapon nga mga manunudlo sang Kasulatan. Sang 455 B.C.E., ang daku nga grupo sang mga Judiyo, lakip ang madamo nga kabataan, nagtipon sa plasa sang siudad sang Jerusalem. May mga manunudlo sang Biblia didto nga ‘nagabasa sing mabaskog [sining sagrado nga] libro.’ Pero wala lang sila nagbasa. “Ginbuligan nila ang katawhan nga mahangpan ang ginabasa.”—Nehemias 8:1-8.

Pagligad sang lima ka siglo, amo man sini ang ginhimo nga pagpanudlo ni Jesucristo. Ang matuod, kilala gid sia sang mga tawo subong manunudlo. (Juan 13:13) Nagtudlo sia sa daku nga kadam-an subong man sa mga indibiduwal. Isa ka bes, namulongpulong sia sa daku nga kadam-an, kag ginsaysay niya ang bantog nga Sermon sa Bukid, kag “ang mga tawo nahayanghag sa iya paagi sang pagpanudlo.” (Mateo 5:1, 2; 7:28) Sang tigpamulak sang 33 C.E., nagpakig-istorya si Jesus sa duha niya ka disipulo samtang nagalakat sila sa dalan pakadto sa isa ka baryo malapit sa Jerusalem, kag ‘ginbuksan [“ginapaathag sing maayo,” footnote] niya sa ila ang Kasulatan.’—Lucas 24:13-15, 27, 32.

Ang mga disipulo ni Jesus mga manunudlo man sang Pulong sang Dios. Isa ka bes, ang opisyal halin sa Etiopia nagabasa sang teksto sa Kasulatan. Ang disipulo nga si Felipe nagpalapit sa iya kag namangkot: “Nahangpan mo gid bala ang imo ginabasa?” Nagsabat ang Etiopianhon: “Paano ko ini mahangpan kon wala sing magpaathag sa akon?” Dayon ginpaathag ni Felipe sa iya ang kahulugan sang iya ginabasa.—Binuhatan 8:27-35.

Pareho sang mga manunudlo sang Biblia sang una nga panahon, ang mga Saksi ni Jehova karon nagapakigbahin sa pagpanudlo sang Biblia sa 239 ka kadutaan sa bilog nga kalibutan. (Mateo 28:19, 20) Kada semana, ginabuligan nila ang sobra siam ka milyon ka tawo agod mahangpan ang Biblia. Madamo sang nagatuon ang indi mga Cristiano. Ini nga mga pagtuon wala sing bayad kag mahimo mahiwat sa puluy-an ukon sa iban nga kombeniente nga lugar. Ang iban nagatuon pa gani paagi sa telepono ukon video, nga nagagamit sang kompyuter ukon gadyet.

Palihug kontaka ang bisan sin-o sa mga Saksi ni Jehova para sa detalye kon paano ka makabenepisyo sa sini nga kahimusan. Mahibaluan mo nga indi matuod nga ang Biblia indi mahangpan kundi “mapuslanon sa pagpanudlo, sa pagsabdong, sa pagtadlong, sa pagdisiplina sa pagkamatarong,” agod “may ikasarang [ka] gid, kag nasangkapan sing bug-os para sa tagsa ka maayong buhat.”—2 Timoteo 3:16, 17.