Natawo ako sa Paddington, isa ka lugar sa London, England nga daku ang populasyon. Upod ko ang akon iloy kag tatlo ka magulang nga babayi. Ginpabay-an kami ni Tatay bangod sang iya pagkapalahubog.

Sang bata pa ako, gintudluan ako ni Nanay nga mangamuyo kada gab-i. May gamay ako nga Biblia nga Salmo lang ang unod, kag ginahimuan ko ini sing tono para makanta ko. Nadumduman ko nga may nabasa ako sa isa ka sekular nga libro nga indi ko gid malipatan: “Sa ulihi wala na sing palaabuton.” Bangod sina nga mga tinaga, indi ako makatulog kon gab-i sa pagpamensar parte sa palaabuton. ‘Sigurado ako nga indi lang amo sini ang kabuhi,’ hunahuna ko. ‘Ano ang katuyuan sang akon kabuhi?’ Indi ko gusto mapatay!

Nangin interesado gid ako sa espiritismo. Gintestingan ko nga makig-istorya sa patay, nagkadto kami sang akon mga barkada sa eskwelahan sa mga patyo, kag nagtan-aw kami sing kahaladlukan nga mga pelikula. Naghunahuna kami sadto nga masadya gid ini bisan pa makahaladlok.

Nangin rebelyuso ako sang dies anyos pa lang ako. Nagsugod ako sa pagpanigarilyo kag naadik sa sini. Sang ulihi, nagsuyop na ako sing marijuana. Sang 11 anyos ako, nagtilawtilaw na ako inom. Bisan wala ako nanamitan sang sabor sini, nanamian ako mahubog. Mahilig ako sa musika kag saot. Nagakadto ako sa mga party kag naytklab basta may tsansa. Pirme ako nagaiskapo kon gab-i kag nagahingagaw pauli antes magsanag. Bangod kapoy ako pagkaaga, pirme lang ako nagaligoy sa klase. Kon magsulod gid man ako sa klase, pirme lang ako hubog.

Kanubo sang akon grado sa eskwelahan sang manugtapos na ako. Bangod wala nakahibalo si Nanay kon daw ano na ako ka rebelyuso, nagalalain gid sia kag naakig. Nag-away kami, gani naglayas ako sa balay. Sang primero, nag-upod ako sa akon nobyo nga si Tony. Nadalahig sia sa mga pagpangawat, nagabaligya sing mga droga, kag nakilala nga tama ka bayolente. Sang ulihi, nagbusong ako, kag sa edad nga 16 anyos nagbun-ag ako sing bata nga lalaki.

Una ko nga nakilala ang mga Saksi ni Jehova sang nagaistar pa ako sa dalayunan para sa mga babayi nga may bata pero  wala sing bana. Ginpaistar ako didto sang gobierno sa isa ka kuarto. Duha ka babayi nga Saksi ang regular nga nagabisita sa pila ka pamatan-on nga mga iloy. Isa ka bes, nag-upod ako sa ila pag-istoryahanay. Gusto ko pamatud-an nga sala ang mga Saksi. Pero kalmado kag maathag nila nga ginsabat base sa Biblia ang tanan ko nga pamangkot. Mainayuhon gid sila, kag nanamian ako sa ila. Gani nagpasugot ako nga tudluan nila ako parte sa Biblia.

Wala madugay, may natun-an ako sa Biblia nga nagpabag-o sang akon kabuhi. Halin sang gamay pa ako, nahadlok na ako mapatay. Pero natun-an ko ang panudlo ni Jesus parte sa pagkabanhaw! (Juan 5:28, 29) Natun-an ko man nga nagaulikid ang Dios sa akon. (1 Pedro 5:7) Natandog gid ako sa ginsiling sang Jeremias 29:11: “‘Kay nahibaluan ko kon ano ang himuon ko sa inyo,’ siling ni Jehova, ‘hatagan ko kamo sing paghidait kag indi sing kalaglagan, agod may maayo kamo nga palaabuton kag paglaum.’” Sugod sadto, nagapati ako nga mahimo ako mabuhi sing dayon sa Paraiso sa duta.—Salmo 37:29.

Ang mga Saksi ni Jehova nagpakita sa akon sing matuod gid nga gugma. Sang una nga bes nga nagtambong ako sa ila mga miting, mapinalanggaon gid sila kag maabiabihon—ang tanan mainabyanon gid! (Juan 13:34, 35) Lain gid ini sa naeksperiensiahan ko sa simbahan sa amon lugar. Gin-abiabi ako sang mga Saksi bisan pa sa akon kahimtangan. Ginhatagan nila ako sing tion, pag-ulikid, atension, kag praktikal nga bulig. Pamatyag ko daw bahin ako sang isa ka daku kag mahigugmaon nga pamilya.

Bangod sa natun-an ko sa Biblia, narealisar ko nga kinahanglan ko bag-uhon ang akon kabuhi para malab-ot ang mataas nga mga talaksan sang Dios sa moral. Indi mahapos ang pag-untat ko sa pagpanigarilyo. Narealisar ko man nga may pila ka musika nga nagapukaw sang akon gana nga mag-marijuana, gani gin-islan ko ang ginapamatian ko nga mga musika. Para malikawan ko ang pagpahubog, wala na ako nagakadto sa mga party kag naytklab kay basi matentar ako. Kag nangita man ako sing bag-o nga mga abyan nga makabulig sa akon nga magbag-o.—Hulubaton 13:20.

Sadto nga tion, ginatudluan man sang mga Saksi ni Jehova si Tony parte sa Biblia. Sang ginsabat sang mga Saksi base sa Biblia ang iya mga pamangkot, nakumbinsi sia nga ang iya ginatun-an amo ang kamatuoran. Naghimo sia sing daku nga pagbag-o sa iya kabuhi: wala na sia nagpakig-upod sa bayolente niya nga mga abyan, wala na sia nagahimo sing krimen, kag gin-untatan na niya ang pag-marijuana. Para mapahamut-an sing bug-os si Jehova, nakita namon nga kinahanglan namon untatan ang imoral nga pagkabuhi kag magpakita sing maayo nga halimbawa sa amon bata. Gani, nagpakasal kami sang 1982.

Nadumduman ko pa nga nagapangita ako sing mga artikulo sa Lalantawan kag Magmata! * parte sa mga eksperiensia sang mga tawo nga nagmadinalag-on sa paghimo sing mga pagbag-o nga gusto ko himuon. Napabakod gid ako sang ila mga halimbawa! Napalig-on ako nga padayon nga magpanikasog kag indi mangampo. Pirme ako nagapangamuyo kay Jehova nga indi niya ako pagbiyaan. Nabawtismuhan kami ni Tony bilang mga Saksi ni Jehova sang Hulyo 1982.

Ang pagpakig-abyan ko kay Jehova nga Dios nagluwas sang akon kabuhi. Naeksperiensiahan man namon ni Tony ang bulig ni Jehova sa mabudlay nga mga tion. Natun-an namon nga magsalig sa Dios sa tion sang mga kabudlayan, kag nabatyagan namon nga pirme niya ginabuligan kag ginasakdag ang amon pamilya.—Salmo 55:22.

Nalipay gid ako nga buligan ang amon kabataan nga makilala man nila si Jehova. Nalipay man ako subong nga makita nga ang ila kabataan nagauswag sa ila nahibaluan parte sa Dios.

Makatulog na ako kay wala na ako nabalaka parte sa palaabuton kag kamatayon. Masako kami subong ni Tony sa pagbiyahe kag pagkadto sa lainlain nga kongregasyon sang mga Saksi ni Jehova kada semana para palig-unon sila. Nagaupod kami sa ila sa pagtudlo sa iban nga kon magtuo sila kay Jesus, mabaton man nila ang kabuhi nga wala sing katapusan.