Nakahibalo si Jacob nga si Jehova lang gid ang dapat simbahon, bisan wala pa Sia sadto sing ginhatag nga kasuguan batok sa pagsimba sa mga diosdios. (Ex 20:3-5) Gani sa tapos sia ginsilingan ni Jehova nga magbalik sa Betel, ginsugo ni Jacob ang tanan nga kaupod niya nga kuhaon ang ila mga diosdios. Dayon ginlubong ni Jacob ang ila mga diosdios, lakip na ang ila mga aritos, nga posible ginahimo nila nga mga anting-anting. (Ge 35:1-4) Sigurado gid nga nalipay si Jehova sa ginhimo ni Jacob.

Paano naton mapakita subong nga si Jehova lang ang aton ginasimba? Ang isa nga dapat naton himuon amo ang paglikaw sa bisan ano nga may labot sa mga diosdios ukon espiritismo. Mahimo nagalakip ini sang paghaboy sa bisan ano nga butang nga may labot sa espiritismo kag pag-usisa sing maayo sa aton mga kalingawan. Halimbawa, pamangkuta ang imo kaugalingon: ‘Nanamian bala ako sa mga libro ukon pelikula nga parte sa mga bampira, zombie, ukon indi mapaathag nga mga butang? Ginapakita bala sang akon mga kalingawan nga indi malain ang madyik, pagpanghiwit, ukon pagpaniwtiw?’ Dapat kita magpalayo sa bisan ano nga ginadumtan ni Jehova.—Sa 97:10.

IPATAN-AW ANG VIDEO NGA “PAMATUKI ANG YAWA,” DAYON SABTI ANG MASUNOD NGA MGA PAMANGKOT:

• Ano ang problema sang Bible study nga si Palesa?

• Ngaa maalamon gid nga magpabulig sa mga gulang kon may mga problema parte sa espiritismo?

• Ano ang dapat naton likawan para proteksionan kita ni Jehova?

• Ano ang importante nga desisyon nga ginhimo ni Palesa?

• Sa inyo lugar, ano ang pila ka paagi nga malikawan mo ang impluwensia sang mga demonyo?