Ngaa nalipay gid kita magtambong sa aton mga kombension kada tuig? Pareho sa mga Israelinhon sang una, ang mga kombension naton subong nagahatag sing kahigayunan nga masimba si Jehova upod ang ginatos, ukon linibo pa gani naton nga kauturan. Nalipay kita nga saluhan ang bugana nga espirituwal nga pagkaon upod ang aton mga abyan kag pamilya. Ang aton daku nga apresasyon ang nagapahulag sa aton nga tambungan ang tatlo ka adlaw nga kombension.

Sa aton pagtilipon, wala lang naton ginapamensar ang aton kaayuhan kundi kon paano man kita makapakita sang gugma sa iban. (Ga 6:10; Heb 10:24, 25) Kon buksan naton ang puertahan para sa kauturan ukon i-reserba ang aton lang kinahanglan nga pulungkuan, mapakita naton nga ginauna naton ang kaayuhan sang iban. (Fil 2:3, 4) Ang mga kombension nagahatag sing maayo nga mga kahigayunan para makakilala kita sing bag-o nga mga abyan. Antes kag pagkatapos sang programa kag kon nagapanyaga, mahimo nga makapakig-istorya kita sa mga indi pa naton kilala. (2Co 6:13) Mahimo nga ang aton makilala, mangin abyan naton sing wala sing katapusan! Labaw sa tanan, kon makita sang iban nga nagahigugmaanay kita, mahimo man sila mag-upod sa aton nga alagaron si Jehova.—Ju 13:35.

TAN-AWA ANG VIDEO NGA “ANG GUGMA WALA SING KATAPUSAN”! NGA MGA INTERNASYONAL NGA KOMBENSION, DAYON SABTI ANG MASUNOD NGA MGA PAMANGKOT:

• Paano ginpakitaan sang gugma ang mga delegado sang 2019 nga mga internasyonal nga kombension?

• Ngaa talalupangdon gid ang paghiusa kag gugma sa tunga sang katawhan ni Jehova?

• Ano nga mga aspekto sang Cristianong gugma ang ginpadaku sang mga miembro sang Nagadumala nga Hubon?

• Paano ginhiusa sang Cristianong gugma ang aton mga utod sa Germany kag South Korea?

• Ano dapat ang aton determinasyon?