Ang mga visual aid nagabulig para makuha ang atension sang nagatan-aw kag para maintiendihan kag madumduman niya ang iya natun-an. Si Jehova, ang aton Dakung Instruktor, naggamit sing mga visual aid para itudlo ang importante nga mga leksion. (Ge 15:5; Jer 18:1-6) Gingamit man ini sang Daku nga Manunudlo nga si Jesus. (Mat 18:2-6; 22:19-21) Ang isa ka klase sang visual aid nga nakabulig gid sining mga tinuig amo ang video. Ginagamit mo bala ang mga video sa pagtudlo sa imo mga estudyante sa Biblia?

Napulo ka video ang ginhanda para buligan kita sa pagtudlo sa mga leksion sa brosyur nga Maayong Balita Halin sa Dios! Sa masami, ang tig-ulo sang kada video naangot sa isa sa mga pamangkot nga nasulat sa madukot nga letra sa brosyur. Ang elektroniko nga pormat sang brosyur may mga link para mahibaluan kon san-o ipatan-aw ang video. May mga video man nga makabulig kon ginatun-an ang iban pa nga publikasyon nga ginagamit sa pagtuon nga makita sa aton Teaching Toolbox.

Nabudlayan bala sa pag-intiende ang imo estudyante sa isa ka topiko sa Biblia? Ukon may ginaatubang bala sia nga pagtilaw? Mangita sing video sa jw.org® kag JW Broadcasting® nga makabulig gid sa iya. Puede ninyo tan-awon kag binagbinagon ini nga video.

Kada bulan, may bag-o nga mga video nga ginapagua. Samtang ginatan-aw mo ini, hunahunaa kon paano mo ini magamit sa pagtudlo sa iban.