Mas madamo na gid ang kalamidad subong. Kon matabo ini, kinahanglan naorganisar kag naplano sing maayo ang paghatag sing bulig. Gani, ang Nagadumala nga Hubon nag-organisar sang Disaster Relief Department sa kada branch office.

Kon mabal-an sang mga utod sa sini nga department nga may natabo nga kalamidad, kontakon nila dayon ang mga gulang sa sina nga lugar para mahibaluan kon ano nga bulig ang kinahanglan sang mga kauturan. Kon daku gid ang halit sang kalamidad nga indi ini masarangan sang mga kauturan, magaasayn ang branch sang mga brother nga magadumala sa paghatag sing bulig. Mahimo kinahanglan nila ang mga boluntaryo ukon donasyon sang pila ka butang. Mahimo man sila magbakal sang mga suplay kag ipanagtag ini.

Madamo gid sing benepisyo kon naorganisar ini sing maayo. Malikawan ang pagdoble sang obra, pagsalasala, kag pag-uyang sang pondo kag mga materyal, nga mahimo resulta kon nagamatumato lang bulig ang kada isa.

Ang mga brother nga gin-asayn sang branch amo ang magadesisyon kon pila ang kinahanglan nga kuarta kag mga boluntaryo. Puede man nila makontak ang mga opisyal sa sina nga lugar para mapadasig pa gid ang paghatag sing bulig. Gani indi kita dapat magmatumato sa pagtipon sang pondo, pagpadala sang mga suplay, ukon pagkadto sa apektado nga lugar luwas lang kon ginpangabay kita.

Siempre, gusto gid naton magbulig kon may kalamidad. (Heb 13:16) Palangga gid naton ang mga kauturan! Ano ang puede naton himuon? Ang pinakaimportante sa tanan, puede naton malakip sa aton pangamuyo ang mga biktima sang kalamidad kag ang mga nagabulig sa ila. Puede man kita makahatag sing donasyon paagi sa worldwide work. Base sa instruksion sang Nagadumala nga Hubon, ang mga branch office ang mas nakahibalo kon diin mas kinahanglan nga gamiton ang pondo. Kag kon gusto gid naton magbulig sing personal, mahimo kita magpil-ap sang Local Design/Construction Volunteer Application (DC-50).

TAN-AWA ANG VIDEO NGA GRABE NGA PAGBAHA SA BRAZIL, DAYON SABTI ANG MASUNOD NGA PAMANGKOT:

Ano gid ang nanamian mo sa pagbulig sang mga Saksi ni Jehova pagkatapos sang grabe nga pagbaha sa Brazil sang 2020?