Ginapatuman sang Mosaikong Kasuguan nga kon ang isa ka lalaki nagahunahuna nga diborsiohan ang iya asawa dapat sia maghimo sing sertipiko sang diborsio. Makabulig ini para indi magpadalidali sa pagdiborsio ang mga mag-asawa. Pero sang panahon ni Jesus, ginpahapos sang mga lider sang relihion ang pagdiborsio. Puede bulagan sang mga lalaki ang ila asawa sa bisan ano nga rason. (“certificate of dismissal” nga study note sa nwtsty-E para sa Mar 10:4; “divorces his wife,” “commits adultery against her” nga study note sa nwtsty-E para sa Mar 10:11) Ginpadaku ni Jesus nga si Jehova mismo ang naghatag sing pahanugot kag nagpasad sang pag-asawahay. (Mar 10:2-12) Ang bana kag asawa mangin “isa ka unod” kag permanente ini nga kaangtanan. Suno sa sinulatan ni Mateo, ang basihan lamang sa pagdiborsio nga ginatugot sa Kasulatan, amo ang “seksuwal nga imoralidad.”—Mat 19:9.

Subong, ang pagtamod sang madamo sa pag-asawahay indi na pareho sa pagtamod ni Jesus, kundi pareho sa pagtamod sang mga Fariseo. Sa kalibutan, kon may problema ang mag-asawa, nagabulagay sila dayon. Pero para sa Cristiano nga mga mag-asawa, ang panumpa sang pag-asawahay serioso gid kag ginatinguhaan nila nga solbaron ang mga problema paagi sa pag-aplikar sa mga prinsipio sang Biblia. Sa tapos ninyo matan-aw ang video nga Gugma kag Pagtahod Nagapahiusa sa Pamilya, sabti ang masunod nga mga pamangkot:

• Paano ninyo maaplikar ang Hulubaton 15:1 sa inyo pag-asawahay, kag ngaa importante ini?

• Ngaa malikawan ninyo ang mga problema kon sundon ninyo ang Hulubaton 19:11?

• Kon daw maguba na ang inyo pag-asawahay, imbes nga magpensar nga, ‘Bulagan ko bala sia?’ ano nga mga pamangkot ang dapat mo binagbinagon?

• Paano ka mangin mas maayo nga bana ukon asawa kon sundon mo ang Mateo 7:12?