Ang gugma amo ang nagapasuod sa pamilya. Kon wala sing gugma, wala man sing paghiusa kag kooperasyon sa sulod sang pamilya. Paano mapakita sang mga bana, asawa, kag kabataan ang gugma sa ila pamilya?

Ginatalupangod sang mapinalanggaon nga bana ang mga kinahanglanon, opinyon, kag balatyagon sang iya asawa. (Efe 5:28, 29) Ginaaman niya ang materyal kag espirituwal nga kinahanglanon sang iya pamilya lakip na ang regular nga Pangpamilya nga Pagsimba. (1Ti 5:8) Ang mapinalanggaon nga asawa nagapasakop kag may “tudok nga pagtahod” sa iya bana. (Efe 5:22, 33; 1Pe 3:1-6) Dapat handa gid sila nga patawaron sing kinabubut-on ang kada isa. (Efe 4:32) Ang mapinalanggaon nga mga ginikanan nagapakita sing personal nga interes sa ila tagsa ka kabataan kag nagatudlo sa ila nga higugmaon si Jehova. (Deu 6:6, 7; Efe 6:4) Ano nga mga kabudlayan ang ginaatubang sang ila kabataan sa eskwelahan? Paano nila ginaatubang ang peer pressure? Kon may gugma sa pamilya, mabatyagan sang kada isa ang proteksion kag seguridad.

TAN-AWA ANG VIDEO NGA IPAKITA ANG WALA NAGAKAPASLAWAN NGA GUGMA SA IMO PAMILYA, DAYON SABTI ANG MASUNOD NGA MGA PAMANGKOT:

• Paano ang mapinalanggaon nga bana nagaatipan kag nagapadungog sa iya asawa?

• Paano ang mapinalanggaon nga asawa nagatahod sa iya bana?

• Paano mapatudok sang mapinalanggaon nga mga ginikanan ang Pulong sang Dios sa ila kabataan?