Malapit na lang maubos ang pasensia ni Jehova sa sini nga kalibutan. Sa indi madugay, malaglag ang butig nga relihion. Sunod, ang naghimbon nga mga pungsod magasalakay sa katawhan sang Dios. Dayon, laglagon ni Jehova ang mga malauton sa Armageddon. Ginapaabot gid sang mga Cristiano ining importante nga mga hitabo.

Siempre, wala kita kabalo sang tanan nga detalye parte sa dakung kapipit-an. Halimbawa, wala kita kabalo kon san-o ini masugod. Wala kita kabalo kon ngaa salakayon sang pulitikal nga organisasyon ang relihion. Wala kita kabalo kon ano kadugay ang pagsalakay sang mga pungsod sa katawhan sang Dios kag kon paano nila ini himuon. Kag wala man kita kabalo kon ano ang gamiton ni Jehova sa paglaglag sang mga malauton sa Armageddon.

Pero, ginasugid sang Kasulatan ang tanan nga impormasyon nga kinahanglan naton para may kaisog kita kag pagsalig sa pag-atubang sa mga matabo sa palaabuton. Halimbawa, kabalo kita nga nagakabuhi na kita “sa katapusan nga mga adlaw.” (2Ti 3:1) Kabalo kita nga “palip-uton” ang pag-atake sa relihion para maluwas ang matuod nga relihion. (Mat 24:22) Kabalo kita nga luwason ni Jehova ang iya katawhan. (2Pe 2:9) Kag kabalo kita nga ang ginpili ni Jehova nga magalaglag sa mga malauton kag magaluwas sa daku nga kadam-an sa Armageddon matarong kag gamhanan.—Bug 19:11, 15, 16.

Bangod sa mga matabo sa palaabuton, “magakapunaw sa kahadlok” ang mga tawo. Pero, kon basahon naton kag pamalandungan kon paano ginluwas ni Jehova ang iya katawhan sang una kag kon ano ang ginasugid niya parte sa palaabuton, ‘magatindog kita kag ihangad ang aton ulo,’ bangod nagasalig kita nga malapit na ang aton kaluwasan.—Lu 21:26, 28.