Kon ginatan-aw mo ang isa ka matahom nga bulak, ang madamo nga bituon sa kalangitan, ukon ang nagahuganas nga busay, nakita mo bala ang mga binuhatan sang Manunuga? Ginasugid sang mga tinuga sa palibot naton ang indi makita nga mga kinaiya ni Jehova. (Ro 1:20) Kon pamalandungan naton sing maayo ang mga butang sa palibot, makita naton ang gahom, gugma, kaalam, kag katarungan sang Dios, pati man ang iya kaalwan.—Sa 104:24.

Ano ang pila sa mga tinuga ni Jehova nga makita mo adlaw-adlaw? Bisan pa sa siudad ka nagaistar, mahimo may makita ka nga mga pispis ukon mga kahoy. Kon panilagan naton sing maayo ang mga tinuga ni Jehova, makapahaganhagan ini sang aton kabalaka, makabulig sa aton nga indi lang magpokus sa problema, kag labi ini nga makapabakod sang aton pagtuo nga masarangan ni Jehova nga atipanon kita asta san-o. (Mat 6:25-32) Kon may kabataan ka, buligi sila nga makita ang wala tupong nga mga kinaiya ni Jehova. Samtang nagadugang ang aton apresasyon sa mga tinuga sa palibot naton, mangin mas malapit man kita sa aton Manunuga.—Sa 8:3, 4.

TAN-AWA ANG VIDEO NGA ANG MAKATILINGALA NGA MGA TINUGA NAGAPAHAYAG SANG HIMAYA SANG DIOS—KAPAWA KAG KOLOR, DAYON SABTI ANG MASUNOD NGA MGA PAMANGKOT:

• Ngaa sarisari nga kolor ang makita naton?

• Ngaa may mga butang nga nagabag-obag-o ang kolor depende sa kon diin ka nga anggulo nagatan-aw?

• Ngaa sarisari ang kolor nga makita naton sa kalangitan?

• Ano nga mga tinuga nga may matahom nga mga kolor ang nakita mo malapit sa inyo balay?

• Ngaa dapat hatagan gid naton sing tion nga panilagan ang mga tinuga sang Dios?