Sang natapos ang World War II sang 1945, grabe gid ang agi sini sa Germany. Guba ang mga siudad, wala sing tawo ang mga eskwelahan, indi magamit ang mga ospital, kag nagalinapta lang ang wala naglupok nga mga bomba. Dugang pa, kulang ang suplay sang pagkaon amo nga mahal ini kaayo. Halimbawa, sa ilegal nga baligyaanay, ang bili sang tunga sa kilo nga mantikilya katumbas sang anom ka semana nga sueldo!

 Nalakip sa mga apektado sini ang ginatos ka Saksi ni Jehova nga ginpriso sing tinuig sa mga prisuhan kag mga concentration camp bangod sa ila pagtuo. Sang ginpagua sila sang 1945, wala sila sing bisan ano kundi ang ila lamang ginasuksok nga bayo. Ang iban nga mga Saksi nadulaan sing propiedad kag pagkabutang. May iban naman nga nakaeksperiensia sang grabe gid nga gutom amo nga nagakalipong sila sa Cristianong mga miting.

 Ang mga Saksi ni Jehova sa iban nga bahin sang kalibutan insigida nga nagpanghikot para mapadala ang kinahanglanon gid nga pagkaon kag bayo. Ginpangabay sang mga kauturan sa world headquarters sa United States ang branch office sa Bern, Switzerland, para mabuligan ang mga kauturan sa Germany. Si Nathan H. Knorr, nga representante sang headquarters nagkadto sa Europe para organisahon kag padasigon ang mga relief operation.

 Ang mga Saksi sa Switzerland maalwan nga naghatag sing pagkaon, bayo, kag kuarta. Ginpadala ini anay sa Bern, para mapainpain kag ma-repack antes ginpadala sa Germany. Ang mga Saksi sa iban nga pungsod, pati sa Sweden, Canada, kag United States nagbulig man. Nakabenepisyo gid sa sini indi lamang ang mga taga-Germany kundi pati man ang mga kauturan sa madamo nga pungsod sa Europe kag Asia nga ginhalitan man sang inaway.

 Sa sulod sang pila ka bulan, ang branch sa Switzerland nagpadala sing kape, gatas, kalamay, uga nga prutas, utan, kag de-lata nga karne kag isda. Kag nagpadala man sila sing kuarta.

 Dugang pa, ang mga Saksi sa Switzerland nagpadala sing lima ka tonelada nga mga bayo, pati sang mga overcoat, pangbabayi nga mga bayo, kag mga amerikana. Ang Enero 15, 1946, nga Ang Lalantawan nagsiling: “Ang ginhatag sang mga kauturan indi daan ukon wala na nila ginagamit, kundi kon ano ang ila pinakamaayo. Daku gid nga sakripisyo ang ila ginhimo para makabulig sila sa ila mga kauturan sa Germany.”

 Ang mga Saksi sa Switzerland nag-donate man sing halos 1,000 ka sapatos, nga ginsigurado gid nga wala sing guba antes ginpadala. Ang mga kauturan sa Wiesbaden, Germany, nga nagbukas sang mga kahon nagdayaw gid bangod sarisari ini kag de-kalidad. “Sigurado ako nga wala sing balaligyaan sang bayo sa Germany nga may amo sini kanami nga mga produkto,” sulat sang isa ka Saksi.

 Nagpadayon ang pagpadala sang bulig asta sang Agosto 1948. Kon totalon, ang mga Saksi sa Switzerland nakapadala sing 444 ka dalagku nga mga kahon nga bulig, nga nagabug-at sing 25 ka tonelada, sa ila mga kauturan sa Germany. Sa nasiling na, indi lang mga Saksi sa Switzerland ang nagbulig. Ang matuod, sila ang isa sa pinakadiutay sa mga grupo nga nagbulig kay sina nga tion, 1,600 pa lang ang mga Saksi sa Switzerland.

 Si Jesucristo nagsiling: “Paagi sini mahibaluan sang tanan nga mga disipulo ko kamo, kon nagahigugmaanay kamo.” (Juan 13:34, 35) Ang gugma amo ang nagpahulag sa katawhan ni Jehova nga ihatag indi lamang kon ano ang sobra nila kundi ang ila pinakamaayo gid. (2 Corinto 8:1-4) Ang isa ka sulat halin sa Zurich nagsiling nga “madamo nga kauturan ang wala man sing makaon, pero gusto gid nila magbulig, gani ginhatag nila ang [ila] mga ration card kag kuarta.”

 Ang katawhan ni Jehova sa Germany madasig nga naulian sa mga halit sang paghingabot sa ila kag sang inaway. Ang isa ka rason sa sini amo ang naorganisar sing maayo kag maalwan nga bulig sang ila mga kauturan nga nagpakita sang matuod kag nagasakripisyo nga gugma.