“Nagdaku ako sa uma,” siling ni Agostinho, nga taga-Brazil. “Pigado gid kami katama. Nag-untat ako sa pag-eskwela para mag-obra kag makabulig sa amon pamilya.” Nakabalo lang si Agostinho magbasa kag magsulat sang 33 anyos na sia. “Sang kabalo na ako magbasa kag magsulat, nagdugang ang akon respeto sa kaugalingon kag mas may kompiansa na ako.”

 Si Agostinho isa sa sobra 250,000 ka tawo nga gintudluan sang mga Saksi ni Jehova kon paano magbasa kag magsulat sa sulod sang nagligad nga 70 ka tuig. Ngaa ginahimo ini sang mga Saksi ni Jehova? Paano nakabenepisyo ang mga tawo sa sini nga pagtudlo?

 Sang 1935, ang mga Saksi ni Jehova nagabantala na sa 115 ka kadutaan. Para mabantalaan ang mga tawo nga nagahambal sang sarisari nga mga lenguahe, ginapatokar sang mga misyonero ang ginrekord nga mga pamulongpulong sa Biblia nga na-translate sa lokal nga mga lenguahe. Kag nagatanyag sila sang mga literatura sa lokal nga mga lenguahe kon may ara. Bisan pa madamo ang interesado sa Biblia, kalabanan sa ila nabudlayan magtuon kay indi sila kabalo magbasa kag magsulat.

 Kon indi sila kabalo magbasa sang Biblia, mabudlayan sila mag-aplikar sang mga prinsipio sini. (Josue 1:8; Salmo 1:2, 3) Mabudlayan man sila maghimo sang ila mga responsibilidad bilang mga Cristiano. Halimbawa, kon ang mga ginikanan indi kabalo magbasa, mabudlayan gid sila magtudlo sa ila mga kabataan parte sa Biblia. (Deuteronomio 6:6, 7) Kag kon indi kabalo magbasa ang bag-o nga mga Saksi, indi nila matudlo sing maayo ang Biblia sa iban.

 Sang mga dekada 1940 kag 1950, si Nathan H. Knorr kag Milton G. Henschel, nga duha sa mga nagapanguna sadto sa mga Saksi ni Jehova, nagkadto sa sarisari nga mga pungsod para mag-organisar sang pagbantala. Sa mga pungsod nga madamo ang indi kabalo magbasa kag magsulat, ginpalig-on nila ang lokal nga branch nga maghimo sang mga klase sa mga kongregasyon.

 Ang mga branch nagpadala sa mga kongregasyon sing instruksion kon paano hiwaton ang mga klase. Sa pila ka pungsod, ang mga gobierno may ara na mga programa sa pagtudlo kag mga libro nga puede gamiton sang mga Saksi. Halimbawa, sa Brazil, ang branch nakabaton sang mga suplay kag mga libro halin sa gobierno kag ginpadala ini sang branch sa mga kongregasyon. Sa iban naman nga pungsod, ang mga Saksi mismo ang naghimo sang ila kaugalingon nga programa sa pagtudlo.

 Ang bisan sin-o puede makaeskwela sa sini nga mga klase—lalaki, babayi, bata, kag tigulang. Katuyuan sini nga tudluan ang mga tawo nga makabasa sa lenguahe nga ila namat-an, amo nga may mga kongregasyon nga nagatudlo sa sarisari nga mga lenguahe.

 Paano nakabenepisyo ang mga tawo sa sini nga programa sa pagtudlo? Ang isa ka Saksi sa Mexico nagsiling: “Maintiendihan ko na subong ang ginatudlo sang Biblia, kag nalab-ot gid sini ang akon tagipusuon. Sang kabalo na ako magbasa, mas may kompiansa na ako sa pagpakig-istorya sa iban, kag mas madamo na ang akon nabantalaan sang mensahe sang Biblia.”

 Ang programa sa pagtudlo nagbulig sa mga tawo indi lang para mabal-an ang ginatudlo sang Biblia. Si Isaac nga taga-Burundi nagsiling: “Sang kabalo na ako magbasa kag magsulat, nakatuon ako sang mga ikasarang nga magamit sa konstruksion. Nag-obra ako sa konstruksion, kag subong, superbisor na ako sang dalagku nga mga proyekto.”

 Si Jesusa, nga taga-Peru, 49 anyos na sang nag-eskwela sia sa sini nga programa. “Bilang iloy,” siling niya, “importante para sa akon nga mabal-an ang mga presyo kag ang mga ngalan sang balaklon kon nagapaninda ako. Sang una, nabudlayan gid ako sini. Maayo lang kay may programa sa pagtudlo. Subong, may kompiansa na ako kon maninda ako para sa amon pamilya.”

 Sa sulod sang mga tinuig, nagdayaw gid ang mga opisyal sang madamo nga pungsod sa mga Saksi ni Jehova bangod sa ila pagtudlo sa mga tawo kon paano magbasa kag magsulat. Padayon gihapon ini nga ginahimo sang mga Saksi ni Jehova subong sa bulig sang mga programa kag kagamitan nga mas ginpanami pa gid sa pagligad sang panahon. Naghimo man sila kag nag-imprinta sing halos 224 ka milyon nga brosyur sa 720 ka lenguahe para buligan ang mga tawo nga makatuon magbasa kag ang mga diutay lang ang ineskwelahan. a