Suno sa World Health Organization (WHO), base sa report asta sang Mayo 23, 2022, 6.27 ka milyon na ka tawo ang napatay bangod sa COVID-19. Pero sa isa ka balita sang Mayo 5, 2022, ginabulubanta sang WHO nga mas madamo pa gid ang aktual nga nagkalamatay. Ginapatihan nga sang 2020 kag 2021, “ang kadamuon sang mga napatay bangod sa COVID-19 nga pandemic ukon sa indi direkta nga mga resulta sini . . . mga 14.9 ka milyon.” May ginasiling bala ang Biblia parte sa sining masakit nga mga trahedya?

•    Gintagna ni Jesus nga may mga balatian, ukon mga epidemic sang “grabe nga mga balatian,” sa panahon nga ginatawag “katapusan nga mga adlaw.”—Lucas 21:11, Contemporary English Version; 2 Timoteo 3:1.

 Nagakatuman na subong ina nga tagna ni Jesus. Para sa dugang nga impormasyon, basaha ang artikulo nga “Ano ang Tanda sang ‘Katapusan nga mga Adlaw,’ Ukon sang ‘Katapusan nga Panahon’?”

•    “Ang Dios nga nagahatag sang tanan nga sahi sang lugpay . . . nagalugpay sa aton sa tanan naton nga mga pagtilaw.”—2 Corinto 1:3, 4.

 Madamo sang napatyan sang pinalangga ang napaumpawan sang mensahe sang Biblia. Hibalua ang dugang nga impormasyon sa mga artikulo nga “Pag-atubang sa Kasubo—Kon Ano ang Mahimo Mo” kag “Ang Pinakamaayo nga Bulig sa mga Nagalalaw.”

•    “Magkari ang imo Ginharian. Matuman ang imo kabubut-on sa duta subong sang sa langit.”—Mateo 6:10.

 Sa indi madugay, pat-uron sang “Ginharian sang Dios” nga “wala sing pumuluyo nga magasiling: ‘Nagamasakit ako.’” (Marcos 1:14, 15; Isaias 33:24) Tan-awa ang video nga Ano ang Ginharian sang Dios? para mahibaluan mo ang parte sa sini nga gobierno sa langit kag kon ano ang himuon sini.

 Ginaagda ka namon nga tun-an pa gid kon ano ang ginasiling sang Biblia, para ikaw kag ang imo pamilya makabenepisyo sa maalamon nga mga laygay kag matahom nga mga promisa sini.