Sang 2023, ang mga doktor nagsiling nga ang kasubo isa gid ka serioso nga problema sa panglawas nga dapat solbaron. May solusyon bala sa kasubo?

•   “Kon nagabatyag kita sang kasubo kag nagapain kita sa iban nga tawo, makahalit gid ini sa aton panglawas kag madula ang aton kalipay,” siling ni Dr. Vivek Murthy, U.S. surgeon general. Nagsiling pa sia: “Pero may mahimo kita para mapakigbatuan ini.” Paano? “Puede kita makahimo sing simple nga mga butang kada adlaw para mapabakod ang aton pagpakig-abyan sa iban nga tawo.” a

 Wala lang kita nagabatyag sang kasubo kon napain kita sa iban. Ang iban nasubuan bisan upod nila ang madamo nga tawo. Bisan ano man ang rason nga nasubuan kita, puede makabulig ang Biblia. May ara ini sang praktikal nga laygay kon paano pabakuron ang aton pagpakig-abyan sa iban. Makabulig ini nga mga laygay para maghaganhagan ang aton kasubo.

 Tinguhai nga mangin maayo magkomunikar sa iban. Nagalakip ini sa pagsugid sang imo nabatyagan sa iban kag pati man ang pagpamati sing maayo sa ila nabatyagan. Kon ginapakita mo sa iban nga interesado ka sa ila, ang inyo pagpakig-abyan mas magabakod.

•   Prinsipio sa Biblia: ‘Pangitaa ninyo indi lamang ang inyo personal nga kaayuhan, kundi ang iya man sang iban.’—Filipos 2:4.

 Magpakig-abyan sa sarisari nga mga tawo. Tinguhai nga magpakig-abyan sa mas magulang ukon mas bata sangsa imo ukon sa iban nga may lain nga kultura ukon halin sa iban nga pungsod.

•   Prinsipio sa Biblia: “Buksi . . . sing masangkad ang inyo mga tagipusuon.”—2 Corinto 6:13.

 Para sa dugang nga impormasyon kon paano mapabakod ang aton pagpakig-abyan sa iban, basaha ang artikulo nga “Satisfying Our Hunger for Friendship.”