Sang 2022, ang mga gobierno sa bilog nga kalibutan naggasto sang $2.24 ka trilyon (U.S.) para sa militar, nga amo ang pinakadaku nga narekord nga gasto. Ang panguna nga rason amo ang pag-atake sang Russia sa Ukraine. Base sa report sang Abril 2023 sang Stockholm International Peace Research Institute (SIPRI), sang 2022:

•   Ang gingasto sang Europe sa militar “nagdugang sang 13 porsiento sina nga tuig, nga amo ang pinakadaku nga gasto sang mga gobierno sang Europe sa isa lang ka tuig sugod sang 1991.”

•   “Ang Russia...nagdugang sing mga 9.2 porsiento nga gasto, gani imbes nga ikalima nangin ikatlo na ini sa may pinakadaku nga gasto sa bilog nga kalibutan.”

•   Ang United States gihapon ang may pinakadaku nga gasto sa militar, “bangod ang ila ginagasto 39 porsiento sang total nga gasto sang kalibutan para sa militar.”

 “Ang sigesige nga pagdaku sang gasto sang mga gobierno para sa militar sa nagligad nga mga tinuig, nagapakita nga nagakabuhi na kita sa kalibutan nga wala na gid sing kasiguraduhan,” siling ni Dr. Nan Tian, nga awtor man sang report sang SIPRI.

 Ginatagna sang Biblia nga ang pinakagamhanan nga mga gobierno sa kalibutan padayon nga magainaway. Ginasugid man sang Biblia kon ano lang ang makadala sang matuod nga paghidait.

•   Nagsiling ang Biblia nga nagakabuhi na kita subong sa“tion sang katapusan.”—Daniel 8:19.

•   Gintagna sang libro sang Daniel nga sa sini nga tion, magakompetensiahanay ang mga kagamhanan sa kalibutan. Ini nga mga kagamhanan sa kalibutan “magadis-uganay” ukon magasumpunganay sa paggahom sa kalibutan. Sa ila pag-inaway, magagasto sila sang madamo nga mga “bahandi,” ukon kuarta.—Daniel 11:40, 42, 43.

 Para sa dugang nga impormasyon parte sa sining makapainteres nga tagna sa Biblia, tan-awa ang video nga Natuman nga Tagna—Daniel kapitulo 11.

•   Ang Biblia nagasiling nga islan sang Dios ang mga gobierno sang tawo. Sia “magatukod sing isa ka ginharian nga indi gid malaglag. Ini nga ginharian indi pag-ihatag kay bisan sin-o nga tawo. Dugmukon sini kag laglagon ining tanan nga ginharian, kag ini lamang ang magapabilin sing dayon.”—Daniel 2:44.

•   Sa indi madugay, himuon ni Jehova a nga Dios ang indi mahimo sang tawo. Matabo ang matuod nga paghidait nga wala sing katapusan. Paano? Paagi sa iya Ginharian nga isa ka gobierno sa langit nga magadula sang tanan nga kagamitan sa inaway kag pagpamintas.—Salmo 46:8, 9.

 Para sa dugang nga impormasyon parte sa himuon sang Ginharian sang Dios, basaha ang artikulo nga “‘Magabugana ang Paghidait’ sa Paggahom sang Ginharian sang Dios.”