Bisan diin subong may inhustisya ukon wala sing katarungan. Ari ang duha ka halimbawa sang mga tawo nga ginpriso bisan wala sila sing ginhimo nga sala:

•   Sang Enero 2018, ang isa ka judge sa United States nagmando nga paguaon ang isa ka tawo nga ginpriso sing halos 38 ka tuig. Napamatud-an nga inosente sia bangod sa isa ka ebidensia paagi sa DNA.

•   Sang Septiembre 1994, tatlo ka pamatan-on nga lalaki sa isa ka pungsod sa Africa ang ginpriso kay nagpangindi sila nga magsoldado bangod sa ila konsiensia. Sang Septiembre 2020, napriso na sila sing 26 ka tuig bisan wala sing krimen nga ginsumbong batok sa ila kag wala man sila ginbista sa korte.

 Kon nakaagi ka sang inhustisya, mahimo nabatyagan mo man ang pareho kay Job sa Biblia, nga nagsiling: “Nagapangayo ako sing bulig, apang wala sing katarungan.” (Job 19:7) Bisan pa daw imposible ang matuod nga hustisya, ang Biblia nagapromisa nga magaabot ang tion nga mahatagan sing sabat ang mga nagapangayo sang hustisya. Dugang pa, ang maalamon nga mga impormasyon nga mabasa mo sa sini makabulig sa imo nga maatubang ang inhustisya subong.

 Ang inhustisya ginahimo sang mga tawo nga wala nagasunod sa Dios. Ginapakita sang Biblia nga ang matuod nga hustisya ukon katarungan halin sa Dios. (Isaias 51:4) Sa Biblia, ang mga tinaga nga gin-translate nga “katarungan” kag “pagkamatarong” may koneksion sa isa kag isa. (Salmo 33:5) Kay man, ang mga buhat nga matarong, ukon husto kag insakto base sa mga pagsulundan sang Dios, nagadala sang hustisya. Sa pihak nga bahin, ang inhustisya halin sa sala, nga amo ang paglapas sa matarong nga mga pagsulundan sang Dios. Binagbinaga ang pila ka halimbawa:

•   Pag-una sa kaugalingon. Ang kailigbon kag sala may koneksion sa isa kag isa. (Santiago 1:14, 15) Para makuha ang ila gusto, madamo nga mga tawo ang nagapamentaha. Pero gusto sang Dios nga unahon naton ang kaayuhan sang iban.—1 Corinto 10:24.

•   Wala nakabalo sang ila ginahimo. Mahimo wala narealisar sang iban nga indi gali maayo ang pagtrato nila sa iban nga tawo, pero sala gihapon ini sa pagtan-aw sang Dios. (Roma 10:3) Ang matuod, bangod sa kakulang sa ihibalo, nahimo sang mga tawo ang pinakadaku nga inhustisya sa tanan—ang pagpatay kay Jesucristo.—Binuhatan 3:15, 17.

•   Indi masaligan nga mga organisasyon kag mga ideya sang mga tawo. Ang pulitika, negosyo, kag relihion sini nga kalibutan nagasiling nga patas kag may hustisya ang pagtrato nila sa mga tawo. Pero ang matuod, sila pirme ang kabangdanan sang sala nga mga buhat, korapsion, diskriminasyon, kakagod, tuman kadaku nga antad sang mga manggaranon kag mga imol, kag pagkapanatiko—nga mahimo tanan magresulta sa inhustisya. Ang pila sini nga mga organisasyon ginasuportahan sang mga indibiduwal nga maayo man ang intension. Pero ang tanan nila nga panikasog indi magmadinalag-on kay wala nila ginasunod ang Dios.—Manugwali 8:9; Jeremias 10:23.

 Ginadumtan sang Dios ang inhustisya kag ang mga motibo kag mga buhat nga ginabangdan sini. (Hulubaton 6:16-18) Ginsugo niya si manalagna Isaias nga magsulat: “Ako, si Jehova, a nagahigugma sang katarungan; ginadumtan ko ang pagpangawat kag ang pagkadimatarong.”—Isaias 61:8.

 Base sa Kasuguan nga ginhatag sang Dios sa mga Israelinhon sadto, maathag nga gusto niya nga magpakita sila sang hustisya. Ginsugo niya ang ila mga hukom nga indi magbaton sang mga hamham kag indi maghimo sing mga buhat nga makapatiko sang hustisya. (Deuteronomio 16:18-20) Ginkondenar niya ang mga Israelinhon nga wala nagtuman sa iya kay ginhingalitan nila ang mga imol kag mga kubos, kag ginlaglag niya sila sang ulihi kay wala nila gintuman ang iya mga pagsulundan.—Isaias 10:1-3.

 Huo. Paagi kay Jesucristo dulaon sang Dios ang sala, nga amo ang panguna nga rason sang inhustisya, kag ibalik ang mga tawo sa pagkaperpekto. (Juan 1:29; Roma 6:23) Magatukod man sia sing isa ka Ginharian nga magadala sang matarong nga bag-ong kalibutan diin mabatyagan sang tanan ang hustisya. (Isaias 32:1; 2 Pedro 3:13) Para mahibaluan mo sing dugang pa ang parte sa sining Ginharian sa langit, tan-awa ang video nga Ano ang Ginharian sang Dios?

 Kon may hustisya na sa bilog nga duta, may paghidait na kag seguridad para sa tanan. (Isaias 32:16-18) Importante sa Dios ang kabuhi sang tanan nga tawo, gani mangin patas na ang pagtrato sa tanan. Ang kasubo, paghibi, kag kasakit bangod sa inhustisya madula na sing dayon, kag bisan ang masakit nga mga eksperiensia sang inhustisya amat-amat nga malimtan. (Isaias 65:17; Bugna 21:3, 4) Para sa dugang nga detalye, tan-awa ang artikulo nga “Ano ang Himuon sang Ginharian sang Dios?”

 Huo. Ang Biblia may rekord sang masaligan nga mga tagna, sibu nga mga detalye parte sa kasaysayan kag siensia, kag wala nagasumpakilay ang mga libro sini. Ini tanan nagapakita nga masaligan mo ang mga promisa sini. Ang masunod nga mga artikulo nagahatag sing dugang nga mga impormasyon:

•   Ngaa Makasiguro Kita nga Husto ang Ginasiling sang Biblia? (video)

•   “Mga Tagna nga Natuman”

•   “Tagna—Nagakatuman Tanan”

•   “Mga Rason Kon Ngaa Masaligan ang Biblia”

 Sa Biblia, ang maayo nga mga tawo sadto nagpanikasog gid nga indi mahimuan sang inhustisya. Halimbawa, posible tani nga maeksperiensiahan ni apostol Pablo nga bistahon sing indi makatarunganon kag pamatbatan sing kamatayon. Pero imbes nga batunon lang ini nga inhustisya, gingamit niya ang kasuguan kag nag-apelar sia sa Cesar.—Binuhatan 25:8-12.

 Ang tanan nga panikasog sang mga tawo nga tadlungon ang inhustisya sa sini nga kalibutan, indi gid magmadinalag-on. (Manugwali 1:15) Pero naeksperiensiahan sang madamo nga tawo nga ang pagtuo sa promisa sang Dios nga matarong nga bag-ong kalibutan nakahatag sa ila sang malinong nga panghunahuna bisan pa ginamaltratar sila sang iban.