Sang Oktubre 9, 2024, may makapasubo nga report ang World Wildlife Fund parte sa epekto sang ginahimo sang mga tawo sa ilahas nga mga sapat. Nagsiling ini nga “sa nagligad nga 50 ka tuig (1970-2020), ang populasyon sang ilahas nga mga sapat nagnubo sing 73%.” Ang report nagsiling: “Makasiling gid kita nga ang palaabuton sang kabuhi sa Duta nagadepende sa mga matabo sa sunod nga lima ka tuig.”

 Madamo nga tawo ang nagalalain sa sini nga mga report kay nanamian gid kita sang aton matahom nga planeta kag indi gid naton gusto nga may indi maayo nga matabo sa ilahas nga mga sapat. Normal lang nga mabatyagan naton ini, kay gindesinyo kita sang Dios nga atipanon ang mga sapat.—Genesis 1:27, 28; Hulubaton 12:10.

 Posible mamangkot ka, ‘Maproteksionan gid bala naton ang ilahas nga mga sapat sa duta? Ano ang ginasiling sang Biblia?’

 Bisan ano pa ang himuon naton para masalbar ang mga sapat, ang Dios lang gid ang makahatag sang matuod nga proteksion sa ila. Gintagna sa Biblia, base sa Bugna 11:18, nga ‘laglagon sang Dios ang mga nagalaglag sang duta.’ May duha ka punto kita nga matun-an sa sini nga bersikulo:

1.  1. Indi pagpasugtan sang Dios nga gub-on sang mga tawo ang bilog nga duta.

2.  2. May himuon gid ang Dios sa indi madugay. Ngaa masiling naton ina? Bangod subong, grabe na gid ang halit nga ginahimo sang mga tawo sa mga sapat.

 Ano ang himuon sang Dios para masolbar ini nga problema? Gamiton niya ang iya gobierno sa langit, ukon Ginharian, nga maggahom sa bilog nga duta. (Mateo 6:10) Kon maggahom na ina nga gobierno, tudluan kag i-train ang matinumanon nga mga tawo kon paano nila atipanon kag proteksionan ang ilahas nga mga sapat sa duta.—Isaias 11:9.