Ang inaway sa Ukraine kag ang mga epekto sang pagbag-o sang klima nagapalala pa gid sang kakulang sa suplay sang pagkaon sa bilog nga kalibutan. Amo gid sini ang nagakatabo sa nagauswag pa lang nga mga pungsod kay madamo ang nabudlayan nga makakuha sang bastante nga pagkaon.

•   “Nagabudlay ang produksion kag pagtigayon sang pagkaon bangod sang inaway, pagbag-o sang klima, pagmahal sang elektrisidad, petrolyo kag iban pa.”—António Guterres, UN secretary-general, Hulyo 17, 2023.

•   “Nagasiling ang mga eksperto nga bangod indi na bahin sang grain export agreement ang Russia, mas magalala pa gid ang kakulang sang pagkaon kag magamahal pa gid ang presyo sini sa pigado nga mga pungsod, ilabi sa North Africa kag sa Middle East.”—Atalayar.com, Hulyo 23, 2023.

 Hibalua ang ginasiling sang Biblia parte sa kakulang sang pagkaon kag sa aton palaabuton.

•   Gintagna ni Jesus: “Magailinaway ang mga pungsod kag subong man ang mga ginharian, kag may kakulang sa pagkaon.”—Mateo 24:7.

•   Ginlaragway sang libro sa Biblia nga Bugna ang apat ka simbuliko nga manugkabayo. Ang isa sa mga manugkabayo nagarepresentar sa inaway. Ginasundan sia sang isa pa nga nagarepresentar sa tiggulutom, sa diin limitado ang pagkaon kag ginabaligya ini sing sobra kamahal. “Nakita ko ang isa ka itom nga kabayo. Ang nagasakay sini may ginauyatan nga timbangan sa iya kamot. Nabatian ko ang daw tingog. . . . Nagsiling ini, “Ang isa ka salmunan nga trigo para sa isa ka adlaw nga suhol [ukon sueldo], kag tatlo ka salmunan nga sebada para sa isa ka adlaw nga suhol.”—Bugna 6:5, 6, Maayong Balita nga Biblia.

 Ini nga mga tagna sa Biblia parte sa kakulang sang pagkaon nagakatuman na subong. Ang tion nga ginatawag sang Biblia nga “katapusan nga mga adlaw.” (2 Timoteo 3:1) Para sa dugang nga impormasyon parte sa “katapusan nga mga adlaw” kag sa pagsakay sang apat ka manugkabayo sang Bugna, tan-awa ang video nga Nagbag-o ang Kalibutan Sugod sang 1914 kag basaha ang artikulo nga “Ang Apat ka Manugkabayo—Sin-o Sila?”

•   Ang Biblia may praktikal nga laygay nga makabulig sa aton nga maatubang ang mabudlay nga mga sitwasyon, lakip ang pagmahal sang presyo sang pagkaon ukon ang kakulang sang pagkaon. Basaha ang pila ka halimbawa sa artikulo nga “Ano ang Himuon Mo Kon Kulang ang Imo Ginakita?”

•   Ang Biblia nagahatag man sa aton sing paglaum nga mangin maayo ang aton sitwasyon. Nagapromisa ini nga maabot ang tion nga “mangin bugana ang mga uyas sa duta” kag may bastante na nga pagkaon para sa tanan. (Salmo 72:16) Para sa dugang nga impormasyon parte sa sini nga paglaum sa palaabuton kag kon ngaa masaligan mo ini, basaha ang artikulo nga “Makalaum Kita nga Mangin Maayo ang Aton Sitwasyon sa Palaabuton.”