Sang Mayo 19, 2022, sobra 75 ka mataas nga opisyal ang nagreport sa United Nations Security Council nga “ang kakulang sa pagkaon sa bilog nga kalibutan, nga ginpalala na sang COVID-19 nga pandemic kag pagbag-o sang klima, nadugangan pa gid bangod sang inaway sa Ukraine, gani posible nga may matabo nga tiggulutom sa pila ka lugar.” Wala madugay pagkatapos sini, ang The Economist nagsiling nga “sa sini nga kalibutan nga damo na problema, mas madamo pa gid ang magutman bangod sang inaway.” Gintagna sang Biblia nga ining kakulang sa pagkaon matabo subong. Pero may ginahatag man ini nga bulig kon paano naton atubangon ang kakulang sa pagkaon.

•    Gintagna ni Jesus: “Magailinaway ang mga pungsod kag subong man ang mga ginharian, kag may kakulang sa pagkaon.”—Mateo 24:7.

•    Ang libro sang Bugna ukon Pahayag sa Biblia nagasugid parte sa apat ka manugkabayo. Ang isa sa sini nagarepresentar sang inaway. Ginasundan sia sang isa nga nagarepresentar sang tiggulutom. Amo ini ang tion nga ang pagkaon ginarasyon kag ginabaligya sa mahal katama nga presyo. “Nakita ko ang itom nga kabayo. Ang nagasakay sini may ginauyatan nga kilohan. Pagkatapos may nabatian ako nga daw sa tingog . . . nga nagasiling, . . . ‘Ang bili sang tatlo ka litse nga harina nga trigo bali isa ka adlaw nga suhol, kag ang isa ka gantang nga harina nga barley bali isa man ka adlaw nga suhol.’”—Pahayag 6:5, 6, Ang Pulong sang Dios, APD.

 Ining mga tagna sa Biblia parte sa kakulang sa pagkaon nagakatuman na subong sa panahon nga ginatawag sang Biblia nga “katapusan nga mga adlaw.” (2 Timoteo 3:1) Para sa dugang nga impormasyon parte sa “katapusan nga mga adlaw” kag sa pagsakay sang apat ka manugkabayo nga ginsambit sa Bugna, tan-awa ang video nga Nagbag-o ang Kalibutan Sugod sang 1914 kag basaha ang artikulo nga “Ang Apat ka Manugkabayo—Sin-o Sila?”

•    Ang Biblia may praktikal nga mga laygay nga makabulig sa aton sa sining mabudlay nga sitwasyon, pareho abi kon magmahal ang pagkaon kag kon ginakulang ang pagkaon. Tan-awa ang pila ka halimbawa sa artikulo nga “Ano ang Himuon Mo Kon Kulang ang Imo Ginakita?”

•    Ang Biblia nagahatag sa aton sang paglaum nga sa ulihi magaayo ang aton sitwasyon. Nagapromisa ini nga maabot ang tion nga “mangin bugana ang mga uyas sa duta” kag bastante na ang pagkaon para sa tanan. (Salmo 72:16) Para sa dugang nga impormasyon parte sa paglaum nga ginasugid sang Biblia kag kon ngaa mapatihan mo ini, basaha ang artikulo nga “Makalaum Kita nga Mangin Maayo ang Aton Sitwasyon sa Palaabuton.”