Ano ang Ginasiling sang Biblia Parte sa Kakulang sa Pagkaon Subong?

I-PLAY

“Wala sing ginagutom.” Ina ang gusto matabo sang mga lider sa kalibutan sa isa sa pinakadaku nga problema sang mga tawo, nga amo ang paghatag sing pagkaon sa tanan nga tawo sa bilog nga planeta. a Pero maabot ayhan ang tion nga wala na gid sing ginagutom sa bilog nga kalibutan? Ano ang ginasiling sang Biblia?

Ginasugid sang Biblia ang kakulang sa pagkaon subong

Gintagna sang Biblia nga may kakulang sa pagkaon sa aton panahon subong, nga gintawag nga “katapusan nga mga adlaw.” (2 Timoteo 3:1) Indi ang Dios ang may kahimuan sining kakulang sa pagkaon, pero ginpaandaman niya kita parte sa sini. (Santiago 1:13) Binagbinaga ining duha ka tagna sa Biblia.

“May kakulang sa pagkaon . . . sa nagkalainlain nga mga lugar.” (Mateo 24:7) Ginasugid sini nga tagna sa Biblia nga may gutom sa madamo nga lugar. Sining karon lang, ang isa ka report sang mga tawo nga nagatuon parte sa suplay sang pagkaon, nagasiling: “Nagalala na gid ang sitwasyon sang kalibutan parte sa gutom, sa kakulang sa masustansia nga pagkaon ukon sa bastante nga suplay sini.” b Minilyon ka tawo sa madamo nga pungsod ang indi makakuha sang pagkaon nga kinahanglan nila. Bilang resulta, madamo sa ila ang napatay.

“Nakita ko ang isa ka itom nga kabayo, kag ang isa nga nagasakay sa sini may timbangan sa iya kamot.” (Bugna 6:5) Sa sini nga tagna, ang kabayo kag ang nagasakay sa sini nagarepresentar sang tiggulutom sa katapusan nga mga adlaw. c Ang timbangan sa kamot sang nagasakay sa kabayo ginagamit para takson ang ginarasyon nga pagkaon. Samtang nagasakay sia sa kabayo, may tingog nga nagasiling nga magasaka gid ang presyo sang pagkaon kag ginpaandaman ang mga tawo nga indi pag-usikan ang pagkaon. (Bugna 6:6) Ginapakita gid sini ang nagakatabo nga krisis sa pagkaon sa kalibutan subong, sa diin ang mga tawo indi makakita ukon makasarang magbakal sang masustansia nga pagkaon.

Kon paano madula ang kakulang sa pagkaon

Ang mga eksperto nagasiling nga ang aton planeta nagapatubas sang bastante nga pagkaon para mapakaon ang tanan nga nagaistar sa sini. Gani, ano ang mga rason kon ngaa may kakulang sa pagkaon? Kag ano ang ginasiling sang Biblia nga himuon sang aton Manunuga, nga si Jehova, d para solbaron ini nga mga problema?

Problema: Indi madula sang mga gobierno ang kapigaduhon kag inhustisya nga rason kon ngaa ginagutom ang mga tawo.

Solusyon: Buslan sang perpekto nga gobierno ukon sang Ginharian sang Dios ang indi perpekto nga gobierno sang tawo. (Daniel 2:44; Mateo 6:10) Subong, madamo nga pigado nga mga tawo ang indi makasarang magbakal sang pagkaon, pero kon maggahom na ang Ginharian sang Dios indi na ini matabo. Ginasugid sang Biblia ang himuon ni Jesucristo, ang Hari sang Ginharian sang Dios: “Luwason niya ang imol nga nagapangayo sing bulig, amo man ang kubos kag ang bisan sin-o nga wala sing nagabulig. . . . Mangin bugana ang mga uyas sa duta; sa putukputukan sang kabukiran magahapayhapay ini.”—Salmo 72:12, 16.

Problema: Ang mga inaway nagaresulta sa pagkaguba sang palibot kag mga kagamitan kag nagapaluya sang ekonomiya, gani nagahinay ukon nagauntat ang suplay sang pagkaon.

Solusyon: “Ginapauntat [ni Jehova] ang mga inaway sa bug-os nga duta. Ginabali niya ang pana kag ginautod ang bangkaw; ginasunog niya ang mga kangga sang mga hangaway.” (Salmo 46:9) Gub-on sang Dios ang mga kagamitan sa inaway kag laglagon ang mga tawo nga nagaumpisa sang inaway. Gani, ang tanan mahapos na makakuha sang pagkaon nga indi mabutang sa delikado ang ila kabuhi. Ang Biblia nagapromisa: “Magalambo ang matarong, kag magabugana ang paghidait.”—Salmo 72:7.

Problema: Ang indi normal nga tiempo kag ang mga kalamidad nagaguba sang mga pananom kag nagapatay sang mga kasapatan.

Solusyon: Kontrolon sang Dios ang mga puersa sa duta, gani mangin manami na ang kondisyon para sa produksion sang pagkaon. Ang Biblia nagasiling: “Ginpauntat [ni Jehova] ang unos; naglinong ang mga balod sang dagat. . . . Ginahimo niya ang desyerto nga mangin punong sang tubig, kag ang mamala nga duta nga mangin mga tuburan sang tubig. Didto ginapapuyo niya ang mga gutom . . . Nagsab-ug sila sa mga latagon kag nagtanom sing mga puno sang ubas nga nagpatubas sing bugana.”—Salmo 107:29, 35-37.

Problema: Ang mga sakon kag korap nga mga tawo nagaprodukto sang mga pagkaon nga delikado kaunon ukon ginapunggan nila ang suplay sang pagkaon gani indi ini makalab-ot sa mga nagakinahanglan sini.

Solusyon: Dulaon sang Ginharian sang Dios ang tanan nga tawo nga sakon kag korap. (Salmo 37:10, 11; Isaias 61:8) Nagasiling ang Biblia nga si Jehova nga Dios amo “ang Isa nga nagahatag sing hustisya sa mga gindayaan, ang Isa nga nagahatag sing pagkaon sa mga gutom.”—Salmo 146:7.

Problema: Sobra 30 porsiento sang suplay sang pagkaon sa bilog nga kalibutan ang nagakausik ukon nagakapierde kada tuig.

Solusyon: Kon maggahom na ang Ginharian sang Dios, madumalahan na sing maayo ang suplay sang pagkaon. Sang ari si Jesus sa duta, ginsigurado niya nga wala gid sing mausik nga pagkaon. Halimbawa, isa ka bes, ginpakaon niya ang sobra 5,000 ka tawo paagi sa milagro. Dayon, ginsugo niya ang iya mga disipulo: “Tipuna ninyo ang nabilin nga mga tinipik agod wala sing mausik.”—Juan 6:5-13.

Bangod dulaon sang Ginharian sang Dios ang mga kabangdanan sang gutom, ang tanan nga tawo magabenepisyo gid sa bugana, masustansia kag manamit nga pagkaon. (Isaias 25:6) Para mahibaluan kon san-o ini himuon sang Ginharian sang Dios, basaha ang artikulo nga “San-o Magagahom sa Duta ang Ginharian sang Dios?”

a Ang 2030 Agenda for Sustainable Development, nga ginkasugtan sang tanan nga ara sa United Nations Member States sang 2015.

b Report sang Food and Agriculture Organization of the United Nations, sang International Fund for Agricultural Development, sang United Nations Children’s Fund, sang United Nations World Food Programme, kag sang World Health Organization.

c Para sa dugang nga impormasyon parte sa apat ka manugkabayo sa Bugna, basaha ang artikulo nga “Ang Apat ka Manugkabayo—Sin-o Sila?”

d Si Jehova ang personal nga ngalan sang Dios. (Salmo 83:18) Tan-awa ang artikulo nga “Sin-o si Jehova?”