Ano ang Ginasiling sang Biblia Parte sa Kakulang sang Matinlo nga Tubig sa Bilog nga Kalibutan?

I-PLAY

Tanan kita nagakinahanglan sang matinlo nga tubig para mabuhi. Pero “bangod padayon nga nagadamo ang nagakinahanglan sang tubig sa bilog nga kalibutan,” paandam sang UN Secretary-General nga si António Guterres, “nagaatubang kita sang serioso nga krisis sa tubig.” Binilyon ka tawo sa bilog nga kalibutan ang indi dayon makakuha sang matinlo kag mainom nga tubig.

Strdel/AFP via Getty Images

Maabot ayhan ang tion nga may bastante nga tubig para sa tanan? Ukon pirme na lang kita makaeksperiensia sang krisis sa tubig? Ano ang ginasiling sang Biblia?

Kon ano ang promisa sang Biblia parte sa suplay sang tubig

Nagsiling ang Biblia nga maabot ang tion nga wala na sang kakulang sa tubig. Mangin bugana na ang matinlo kag mainom nga tubig.

“Magasagawak ang tubig sa kamingawan, kag magailig ang mga sapa sa desyerto nga kapatagan. Ang kigas nga duta mangin punong sang mga tabun-ak, kag ang mamala nga duta mangin mga tuburan sang tubig.”—Isaias 35:6, 7.

Ngaa mapatihan ta gid ining promisa sang Biblia? Binagbinaga kon ano ang ginasiling sang Biblia parte sa isa ka detalye kon paano gindesinyo ang aton duta.

Kon ano ang ginasiling sang Biblia parte sa duta kag sa water cycle

‘Wala gintuga sang Dios ang duta sa wala sing pulos, kundi ginbuhat ini agod puy-an.’—Isaias 45:18.

Bangod gintuga sang Dios ang duta para mabuhi ang tanan nga tinuga, gindesinyo niya ang natural nga mga sistema para makahatag sang bugana nga matinlo nga tubig.

“Ginapasaka [sang Dios] ang tubig halin sa duta; ginahimo niya ang ulan halin sa iya alisngaw; dayon ginabubo ini sang panganod; kag nagaulan sing bugana sa mga tawo.”—Job 36:27, 28.

Sa simple nga hambal, ginasugid sini nga teksto nga gindesinyo sang Dios ang natural kag wala untat nga water cycle kag pagsuplay sang tubig. Ang tubig nagaalisngaw halin sa duta kag dagat, nagaporma nga panganod, kag nagatupa bilang ulan, nga amo ang nagahatag sang sigesige nga suplay sang matinlo, kag mainom nga tubig para sa mga tawo kag mga sapat.—Manugwali 1:7; Amos 5:8.

“Mapaulan ako sa inyo sa nagakaigo nga tion, kag magapatubas ang duta, kag magapamunga ang mga kahoy sa latagon.”—Levitico 26:4.

Nagpromisa ang Dios nga pakamaayuhon niya ang mga Israelinhon sadto sang bugana nga patubas paagi sa paghatag sa ila sang bastante nga suplay sang tubig. Ang mga Israelinhon sadto isa ka pungsod sang mga mangunguma. Kabalo ang Dios nga para magtubo ang mga pananom, kinahanglan ang bastante nga ulan sa insakto nga tion.

Kon ano ang ginhimo sang Dios sa Israel sadto, amo man sina ang himuon niya sa indi madugay sa bilog nga duta. (Isaias 30:23) Pero samtang wala pa ina, madamo nga lugar sa kalibutan ang nakaeksperiensia sang dugang nga krisis sa tubig, kag ang talagsa nga pag-ulan isa lang ka parte sang problema. Ano pa ang ginasiling sang Biblia parte sa solusyon sa problema sa tubig subong?

Kon paano solbaron ang krisis sa tubig

Ginasugid sang Biblia nga solbaron sang Dios paagi sa iya Ginharian ang mga problema sa aton duta, lakip na ang krisis sa tubig subong. (Mateo 6:9, 10) Ang Ginharian sang Dios isa ka gobierno sa langit nga magagahom sa bilog nga duta. (Daniel 2:44; Bugna 11:15) Dugang pa, himuon sang Ginharian sang Dios ang indi mahimo sang gobierno sang tawo. Ang pagdula sang mga rason sang aton problema sa tubig.

Problema: Ang pagbag-o sa klima nagadugang sa mga rason kon ngaa nagakadula ang balanse sang water cycle. Ang resulta sini nagalakip sang grabe nga tigpalamangag pati man ang grabe nga pagbaha, nga halin sa mabunok nga ulan ukon pagtaas sang nibel sang dagat.

Solusyon: Kay-uhon sang Ginharian sang Dios ang natural nga balanse sang palibot para makay-o ang mga naguba sa aton duta. Ang Dios nagpromisa: “Yari karon! Ginahimo ko nga bag-o ang tanan nga butang.” (Bugna 21:5) Ang mamala nga duta mapuno sang matinlo nga tubig, mabuhi ang mga tinuga sa mga lugar nga indi maistaran subong. (Isaias 41:17-20) Kon maggahom na ang Ginharian sang Dios, kontrolon ni Jesucristo ang natural nga mga puersa diri sa duta.

Sang ari si Jesus sa duta, ginpakalma niya ang makahaladlok nga bagyo kag paagi sini ginhatagan niya kita sang gamay nga ideya sang gahom sang Dios nga ginhatag sa iya. (Marcos 4:39, 41) Kon maggahom na ang Cristo bilang Hari sa Ginharian sang Dios, madula na ang mga kalamidad. May ara na sang matuod nga kalinong kag seguridad ang mga tawo, kag indi na sila mahadlok sa bisan ano nga kalamidad.

Problema: Ang mga tawo nga wala nagapamensar sang resulta sang ila mga ginahimo kag ang mga sakon nga mga korporasyon nga nagahigko sang mga suba, linaw, kag sang mga ginatipunan sang tubig sa idalom sang duta, nagadugang sa problema sa kakulang sang matinlo nga tubig.

Solusyon: Tinluan sang Dios ang duta kag ibalik ang katinlo sang mga suba, mga linaw, dagat kag sang duta. Ang duta mangin paraiso. Ang Biblia nagsiling: “Ang kamingawan kag ang kigas nga duta magahugyaw, kag ang desyerto nga kapatagan magakalipay kag mapuno sing mga bulak.”—Isaias 35:1.

Ano ang matabo sa mga wala nagaulikid sa ila palibot ukon sa ila isigkatawo? Nagpromisa ang Dios nga ‘laglagon ang mga nagalaglag sang duta.’—Bugna 11:18; Hulubaton 2:21, 22.

Problema: Ginausikan sang mga tawo ang suplay sang tubig, kag bilang resulta, mas madasig ini nga maubos sangsa masuplay liwat sang duta.

Solusyon: Paagi sa Ginharian, “matuman . . . sa duta” ang kabubut-on sang Dios, indi sang sakon nga mga tawo. (Mateo 6:9, 10) Hatagan sang Ginharian sang Dios ang mga tawo sang pinakamaayo nga edukasyon. “Ang duta mapuno sang ihibalo tuhoy kay Jehova,” siling sang Isaias 11:9. a Bangod sina nga ihibalo, kag sang daku nga gugma sa Dios kag sa iya mga tinuga, perpekto na nga maatipan sang mga tawo ang aton matahom nga duta kag ang mga ginakuhaan sang aton mga kinahanglanon.

Para sa dugang nga impormasyon parte sa himuon sang Ginharian sang Dios, tan-awa ang artikulo nga “Ano ang Himuon sang Ginharian sang Dios?”
Buksi ang libro sa Biblia nga Isaias, sa kapitulo 35, para mabasa mo kon paano himuon ang duta nga isa ka paraiso.
Tan-awa ang video nga Ngaa Gintuga sang Dios ang Duta? para mahibaluan sing dugang ang katuyuan sang Dios sa duta kag sa mga tawo.