Ang korap nga mga opisyal sang gobierno isa ka problema sa bilog nga kalibutan kag daku gid ang halit sini. a Halimbawa, sa tion sang COVID-19 nga pandemic, ginsumbong ang mga opisyal sang isa ka pungsod nga nagmanggaranon sila bangod ginpalapaw nila ang mga pondo nga para tani sa pandemic. Bangod sini nga korapsion, madamo ang wala mabulong sing insakto, gani madamo man ang nag-antos kag napatay.

 Madamo gid ang apektado sang korapsion sa gobierno. Si David Cameron, nga prime minister sadto sang United Kingdom, nagsiling: “Ang korapsion daw isa ka daku kag gumon nga lawa, kag ang tanan nga pungsod nagtapik sa sini.”

 Pero, makasiguro kita nga dali na lang madula ang tanan nga korapsion sa gobierno. Ngaa? Talupangda kon ano ang ginasiling sang Biblia nga himuon sang Dios.

 Mabasa sa Biblia ang ginsiling sang Dios: “Ako, si Jehova, nagahigugma sang katarungan; ginadumtan ko ang pagpangawat kag ang pagkadimatarong.” b (Isaias 61:8) Kon nagaantos ang mga tawo bangod sa korapsion sang iban, nahibaluan ini sang Dios. (Hulubaton 14:31) Nagpromisa sia: “Bangod sang pagpamigos sa mga nalisdan, . . . magatindog ako agod magpanghikot.”—Salmo 12:5.

 Ano ang himuon sang Dios? Imbes nga bag-uhon ang mga gobierno subong, buslan niya ini sang iya kaugalingon nga gobierno sa langit, nga ginatawag “ang Ginharian sang Dios.” (Marcos 1:14, 15; Mateo 6:10) Ang Biblia nagasiling: ‘Ang Dios sang langit magatukod sing isa ka ginharian nga . . . magadugmok sini kag magalaglag sining tanan [iban pa] nga ginharian, kag ini lamang ang magapabilin sing dayon.’ (Daniel 2:44) Gani dulaon sang Dios ang korapsion nga nagakatabo subong.

 Ngaa makasiling kita nga indi mangin korap ang gobierno sa Ginharian sang Dios? Binagbinaga ang masunod.

1.  1. Gahom. Ang gahom sang Ginharian magahalin sa Labing Gamhanan nga Dios.—Bugna 11:15.

    Kon ngaa importante ini: Para makapanghikot, ang mga gobierno sang tawo nagasalig sa kuarta nga halin sa mga pumuluyo. Gani may mga kahigayunan pirme para mag-bribe, mangawat, kag gamiton ang pondo nga kuarta sa personal nga kaayuhan. Pero, ini nga Ginharian ginasuportahan sang Labing Gamhanan nga Dios, gani mahatag gid sini pirme ang mga kinahanglanon sang mga sakop sini.—Salmo 145:16.

2.  2. Manuggahom. Si Jesucristo ang ginpili sang Dios bilang Manuggahom sang Ginharian.—Daniel 7:13, 14.

    Kon ngaa importante ini: Bisan ang pinakamaayo nga manuggahom nga tawo puede maimpluwensiahan sang iban nga maghimo sing malain. (Manugwali 7:20) Pero ginpakita ni Jesus nga indi sia ma-bribe. (Mateo 4:8-11) Dugang pa, palangga gid niya ang iya mga sakop kag nabalaka gid sia sa ila kaayuhan.—Salmo 72:12-14.

3.  3. Kasuguan. Ang mga kasuguan sang Ginharian sang Dios perpekto kag malipayon ang mga nagatuman sini.—Salmo 19:7, 8.

    Kon ngaa importante ini: Ang mga kasuguan sang tawo komplikado, mabudlay tumanon, ukon wala ginapatuman sing maayo, amo nga posible gid nga magresulta ini sa korapsion. Pero ang kasuguan sang Dios praktikal kag mapuslanon. (Isaias 48:17, 18) Dugang pa, ini nga mga kasuguan indi lamang para tumanon kundi nagadalahig man ini sang mga motibo. (Mateo 22:37, 39) Mabasa sang Dios ang mga tagipusuon kag masigurado niya nga ini nga mga kasuguan mapatuman sing maluluy-on.—Jeremias 17:10.

 Ginaimbitar ka namon nga tun-an pa gid ang mga promisa sang Biblia parte sa palaabuton nga wala na sing korap nga gobierno.

•   Basaha ang artikulo nga “Ginharian sang Dios—Gobierno nga Wala sing Korapsion” para mabal-an mo ang tatlo pa ka rason kon ngaa indi gid mangin korap ang Ginharian sang Dios.

•   Tan-awa ang video nga Ano ang Ginharian sang Dios? para mabal-an mo pa gid ang parte sa gobierno sang Dios kag kon ano ang himuon sini sa duta.

•   Testingi ang amon libre kag interactive nga pagtuon sa Biblia para mabal-an mo kon paano ka makabenepisyo sa mga promisa sang Biblia.