Sa sining 2024 Summer Olympics, ginabulubanta nga mga lima ka bilyon ka tawo ang matan-aw sa mga atleta halin sa 206 ka pungsod nga mapartisipar sa mga hampang. “Bahin kita sang isa ka event diin ang mga tawo sa kalibutan magahiusa kag may paghidait,” siling ni Thomas Bach, presidente sang International Olympic Committee. “Iselebrar naton ang ideya nga ginapakita sang Olympics nga ang tanan nga tawo dapat magkabuhi nga may paghidait kag paghiusa, bisan pa indi pareho ang isa kag isa.”

 Mahimo gid bala sang Olympics ining mabudlay lab-uton nga mga goal? Matigayon gid bala naton ang matuod nga paghidait kag paghiusa?

 Ang Olympics sini nga tuig indi lang parte sa sports. Ginpakita man sang mga hampang ang mga isyu sa komunidad kag pulitika nga nagapabahinbahin sa mga tawo. Nalakip sa sini nga mga isyu ang mga kinamatarong sang mga tawo, diskriminasyon sa rasa, diskriminasyon sa relihion, kag indi patas nga pagtrato.

 Ang mga sports event nga ginaentrahan sang sarisari nga pungsod pareho sang Olympics, makahatag sang kalingawan sa mga tawo. Pero, ginapakita kag ginasuportahan sini nga mga event ang mga batasan kag mga buhat nga nagapabahinbahin sa mga tawo imbes nga magdala sang paghidait kag paghiusa.

 Gintagna sang Biblia ang mga batasan nga amo ang rason kon ngaa mabudlay gid matigayon ang paghiusa subong. (2 Timoteo 3:1-5) Para sa dugang nga impormasyon parte sa sini nga tagna sang Biblia, basaha ang artikulo nga “Gintagna Bala sang Biblia ang Panghunahuna kag Paggawi sang mga Tawo Subong?”

 Mabasa sa Biblia ang matuod nga paglaum nga may paghidait kag paghiusa sa bilog nga kalibutan sa ulihi. Nagapromisa ini nga ang tanan nga tawo sa duta mahiusa paagi sa paggahom sang gobierno sa langit nga ginatawag “Ginharian sang Dios.”—Lucas 4:43; Mateo 6:10.

 Ang Hari sini nga Ginharian amo si Jesucristo kag himuon gid niya nga malinong ang bilog nga duta. Ari ang ginasiling sang Biblia:

•   “Magalambo ang matarong, kag magabugana ang paghidait.”—Salmo 72:7.

•   “Luwason niya ang imol nga nagapangayo sing bulig . . . Luwason niya sila sa pagpamigos kag sa pagpamintas.”—Salmo 72:12, 14.

 Bisan subong pa lang, ang mga panudlo ni Jesus nagpahiusa sa minilyon ka tawo sa 239 ka pungsod. Bilang mga Cristiano, natun-an sang mga Saksi ni Jehova sa bilog nga kalibutan nga mangin mahidaiton. Para mahibaluan mo kon paano, basaha ang isyu sang Lalantawan nga magasin nga may tig-ulo “Pagtapos sa Wala Untat nga Pagdumtanay.”