Sa Haiti, grabe ang epekto sang pagpamintas sang mga gang. May malala nga krimen nga nagakatabo sa South Africa kag Mexico pati man sa iban nga mga pungsod sa Latin America. Bisan sa mga lugar nga indi na tanto ang pagpamintas, ang mga tawo nagabatyag sang kabalaka kag wala sing kasiguruhan bangod nakabati sila sang mga krimen pareho sang pagpangawat, bandalismo, kag pagpangsunog.

 Ano ang ginasiling sang Biblia parte sa kalainan nga nagakatabo sa bilog nga kalibutan?

 Ginasugid sang Biblia nga ang kalainan mangin isa sa mga tanda sang “hingapusan sang sistema sang mga butang.” (Mateo 24:3) Sang ginsugid ni Jesucristo ang mga hitabo nga bahin sina nga tanda, sia nagsiling:

•   “Bangod sang pagdamo sang kalautan, ang gugma sang madamo nga tawo magabugnaw.”—Mateo 24:12.

 Ginasugid man sang Biblia nga “sa katapusan nga mga adlaw” ang mga tawo “wala sing pagpugong sa kaugalingon, mabangis, wala sing gugma sa kon ano ang maayo.” (2 Timoteo 3:1-5) Ini nga mga batasan nga nagapokus lang sa kaugalingon nagaresulta sa kalainan nga makita naton subong.

 Pero may paglaum kita. Ginapromisa sang Biblia nga sa indi madugay dulaon na ang kalainan.

•   “Sa indi na lang madugay, madula na ang mga malauton; pangitaon mo sila sa ila nahamtangan, kag wala na sila didto. Apang ang mga mahagop magapanubli sang duta, kag mangin malipayon gid sila sa bugana nga paghidait.”—Salmo 37:10, 11.

 Hibalua ang parte sa mensahe sang paglaum nga ginasugid sang Biblia kag kon ngaa makasigurado ka nga ang mga nagakatabo subong katumanan sang mga tagna sa Biblia. Binagbinaga ang masunod nga mga artikulo.

 “Makalaum Kita nga Mangin Maayo ang Aton Sitwasyon sa Palaabuton”

 “Ano ang Tanda sang ‘Katapusan nga mga Adlaw,’ Ukon sang ‘Katapusan nga Panahon’?”

 “Gintagna Bala sang Biblia ang Panghunahuna kag Paggawi sang mga Tawo Subong?”