Kon pamensaron mo ang isa ka tawo nga may ginakabalak-an, a posible nga maimadyin mo ang isa nga wala na gid sing mahimo bangod sa sobra nga kahadlok, ang isa nga daw haluson makabangon kon aga, ukon ang isa nga puro na lang niya problema ang iya ginaistorya.

 Amo sina ang reaksion sang iban kon nagakabalaka sila. Pero nakita sang mga researcher nga may iban—ilabi na ang mga lalaki—nga mahimo lain ang ila reaksion. Suno sa isa ka report, ang mga lalaki “labanlaban nga mag-inom kag mag-drugs para maatubang ang ila kabalaka. Gani may mga sitwasyon nga ginahunahuna sang iban nga palainom ang isa ka tawo, pero ang matuod gali may ara sia anxiety disorder ukon grabe nga kabalaka. Kag ang kabalaka sang mga lalaki pirme ginapaupok sa pagpangakig kag pagkairitable.

 Siempre, sarisari man ang reaksion sang kada lalaki. Pero bisan ano man ang reaksion sang isa ka tawo sa sini, ang kabalaka isa sa nagalapnag nga problema sa sining “makahalanguyos nga mga tion nga mabudlay atubangon.” (2 Timoteo 3:1) Kon may ginakabalak-an ka, makabulig bala sa imo ang Biblia?

 Ang Biblia madamo sing masaligan nga laygay nga makabulig sa aton kon nagakabalaka kita. Binagbinaga ang tatlo ka halimbawa:

1.  1. “Indi gid ninyo pagkabalak-i ang buas, kay ang buas may kaugalingon nga mga kabalaka. Ang tagsa ka adlaw may kaugalingon nga mga palaligban.”—Mateo 6:34.

    Buot silingon: Mas maayo kon indi naton pagkabalak-an sing sobra ang mga butang nga mahimo matabo (ukon indi matabo) sa palaabuton. Sa masami, ang ginakahadlukan naton wala nagakatabo. Kag sa pila ka sitwasyon, gulpi lang nga mas maayo ang nagakatabo sangsa ginapensar naton.

    Testingi ini: Dumduma ang mga tion sadto nga sigurado ka gid nga may malain nga matabo, pero wala man natabo. Dayon, binagbinaga ang imo mga ginakabalak-an subong kag hunahunaa sing maayo kon bala mangin daku gid ini nga problema sa ulihi.

2.  2. “Subong nga ang salsalon mapatalom sang salsalon, mapatalom man sang tawo ang iya abyan.”—Hulubaton 27:17.

    Buot silingon: Mabuligan kita sang iban nga tawo nga maatubang ang aton mga kabalaka, kon magpabulig kita sa ila. Basi may mahatag sila nga praktikal nga mga panugda base sa ila mismo mga inagihan sa kabuhi. Ukon indi gani, basi mabuligan ka nila nga tan-awon ang imo sitwasyon sa lain nga anggulo.

    Testingi ini: Pensara kon sin-o ang mahimo makahatag sa imo sing maayo nga laygay. Mahimo isa mo sia ka abyan nga nakaagi na sang problema nga ginaatubang mo subong. Pamangkuta sia kon ano ang nakabulig ukon wala nakabulig sa iya.

3.  3. ‘Itugyan ninyo sa iya ang tanan ninyo nga kabalaka, kay nagaulikid sia sa inyo.’—1 Pedro 5:7.

    Buot silingon: Nagaulikid gid ang Dios sa mga nagaantos. Ginaagda niya kita nga ipangamuyo sa iya ang bisan ano nga ginakabalak-an naton.

    Testingi ini: Ilista ang mga butang nga imo ginakabalak-an. Dayon, ipangamuyo ini sa Dios, nga isaisa nga ginapaathag ang imo mga problema kag mangayo sing bulig sa iya kon paano ini atubangon.

 Indi lang laygay sa pag-atubang sang kabalaka ang mahatag sang Biblia. Nagpromisa man ini nga sa indi madugay madula na ang tanan nga ginakabalak-an naton. Paano ina matabo?

 Dulaon sang Ginharian sang Dios ang tanan nga kabangdanan sang kabalaka. (Bugna 21:4) Gani kon maggahom na ina nga Ginharian, ang tanan nga kabalaka kag stress nga aton naeksperiensiahan indi na pagdumdumon ukon makapasakit pa sa aton.—Isaias 65:17.

 Amo sina nga palaabuton ang ginatigana sa imo “sang Dios nga nagahatag sing paghidait.” (Roma 16:20) Ginapasalig kita niya: “Nahibaluan ko kon ano ang himuon ko sa inyo, . . . hatagan ko kamo sing paghidait kag indi sing kalaglagan, agod may maayo kamo nga palaabuton kag paglaum.”—Jeremias 29:11.