“Gusto naton tanan nga mangin normal liwat ang aton pagkabuhi.”—Angela Merkel, German chancellor.

 Padayon gihapon ang COVID-19 nga pandemic sa bilog nga kalibutan, gani mahimo nga ugyon ka gid sa iya ginsiling. Pero ano ang buot silingon sang “normal” nga pagkabuhi? Ano ang gusto himuon sang mga tawo?

•   Mabalik sa ila pagkabuhi antes sang pandemic. Nahidlaw na gid ang iban sa kabuhi nga makaupdanay ang mga tawo, makahaksanay, makakamustahanay, kag makakadto sa iban nga lugar. Para sa ila, nalakip sa “pagbalik sa normal nga pagkabuhi” ang “pagkaon sa mga restawran, pagtan-aw sing sine, kag iban pa nga pareho sini,” siling ni Dr. Anthony Fauci. a

•   Mas mapauswag ang ila pagkabuhi. Para sa iban, bangod ang aton sitwasyon nangin “new normal” na, ginkabig nila ini nga kahigayunan nga mapauswag pa ang ila pagkabuhi. Nagapati sila nga dapat bag-uhon ang pila ka butang pareho sang sobra nga pressure sa trabaho kag pagpasulabi sa mga tawo bangod sa rasa ukon tindog sa pangabuhi. Gusto man nila nga buligan ang mga tawo nga may balatian sa hunahuna. “Ini nga pandemic,” siling sang founder of the World Economic Forum nga si Klaus Schwab, “isa ka talagsahon kag malip-ot nga kahigayunan para mahunahuna naton ang aton kabuhi kag kon ano ang gusto naton nga matabo sa aton kalibutan, kag dayon himuon ina nga mga pagbag-o.”

 May mga tawo man nga naapektuhan gid sang pandemic amo nga para sa ila indi na magbalik sa normal ang ila pagkabuhi. Halimbawa, madamo sa ila ang nadulaan sang obra, nadulaan sang balay, nagmasakit, kag mahimo nga napatyan pa sang ila pinalangga.

 Ang matuod, wala sing bisan isa sa aton ang nakahibalo kon ano ang sitwasyon sang aton kabuhi pagkatapos sini nga pandemic. (Manugwali 9:11) Pero ang Biblia makabulig sa aton nga indi magpaabot sing sobra kag maatubang kon ano man ang matabo. Dugang pa, ginasugid sang Biblia ang isa ka sigurado nga palaabuton nga mahimo wala mo ginapaabot.

 Sadto pa gintagna sang Biblia ang paglapta sang “mga balatian” nga matabo sa “hingapusan sang sistema sang mga butang.” (Lucas 21:11; Mateo 24:3) Kon nahibaluan naton ina, maintiendihan naton nga ang COVID-19 nga pandemic, pati man ang iban pa nga mga hitabo pareho sang mga inaway, mabaskog nga mga linog, kag kakulang sa pagkaon, bahin sang katumanan sini nga tagna sa Biblia.

 Kon paano makabulig sa imo ini nga impormasyon: Bisan pa maghaganhagan ang sitwasyon sa sini nga pandemic, ang Biblia nagapaandam nga nagakabuhi kita sa “makahalanguyos nga mga tion nga mabudlay atubangon.” (2 Timoteo 3:1) Makabulig ini sa aton nga indi magpaabot sing sobra sa sining mabudlay nga mga tion.

 Ginabuligan kita sang Biblia para mangin husto ang aton pagtamod: Ang aton kalibutan nga puno sang nagadamo kag nagadamo pa gid nga kabudlayan magabag-o sa indi na lang madugay. Ano nga pagbag-o ang matabo?

 Gintagna sang Biblia indi lang ang mabug-at nga mga problema nga ginaatubang naton subong kundi ang mas maayo nga palaabuton nga dali na lang mag-abot. Ginasugid sini sa aton ang isa ka mas maayo nga palaabuton nga indi mahatag sang mga gobierno sang tawo bangod ang Dios lamang ang makahatag sini. “Pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”—Bugna 21:4.

 Si Jehova b nga Dios nagpromisa: “Yari karon! Ginahimo ko nga bag-o ang tanan nga butang.” (Bugna 21:5) Solbaron niya ang mga problema sini nga kalibutan, lakip na ang mga problema nga ginpalala sang pandemic. Ihatag niya ang masunod:

•   Perpekto nga panglawas kag panghunahuna, kay wala na sang balatian kag kamatayon.—Isaias 25:8; 33:24.

•   Makalilipay nga trabaho, indi trabaho nga makapa-stress kag sobra ka makapakapoy.—Isaias 65:22, 23.

•   Bastante nga kinahanglanon, kay dulaon na ang kapigaduhon kag gutom.—Salmo 72:12, 13; 145:16.

•   Paumpaw sa masakit nga inagihan sa kabuhi, kag paglaum nga makita nga mabanhaw ang napatay nga mga pinalangga.—Isaias 65:17; Binuhatan 24:15.

 Kon paano makabulig sa imo ini nga impormasyon: Ang Biblia nagasiling: “Ini nga paglaum nga yara sa aton daw kaangay sang angkla para sa aton kabuhi.” (Hebreo 6:19, footnote) Ini nga paglaum makapabakod gid sa aton. Makabulig ini sa aton nga maatubang ang mga kabudlayan subong, mabuhinan ang kabalaka, kag mangin kalmado kag malipayon gihapon.

 Pero mapatihan mo gid bala ini nga mga promisa sang Biblia? Tan-awa ang artikulo nga “Ang Biblia—Nagasugid Gid sang Kamatuoran.”

•   Pabalori ang kabuhi

   Teksto: ‘Ang kaalam makatipig nga buhi sa tawo nga may yara sini.’—Manugwali 7:12.

   Ang buot silingon sini para sa imo: Magdesisyon sing maalamon para mabuhinan ang tsansa nga malatnan ka. Hibalua ang sitwasyon sa inyo lugar. Tun-i ang mga protocol sa kapagros kag safety, hibalua ang kadamuon sang nagakalatnan, kag ang kadamuon sang populasyon nga fully-vaccinated na.

•   Padayon nga maghalong

   Teksto: “Ang tawo nga maalamon nagahalong kag nagalikaw sa kalautan, apang ang buangbuang harasharas kag sobra ang pagsalig sa kaugalingon.”—Hulubaton 14:16.

   Ang buot silingon sini para sa imo: Padayon nga himua kon ano ang kinahanglan para proteksionan ang imo panglawas. Ginapaabot sang mga eksperto nga ang coronavirus magaluntad sa malawig pa nga tion.

•   Mangita sang masaligan nga impormasyon

   Teksto: “Ang tawo nga mapinatihon, nagapati sa bisan ano nga mabatian niya, apang ang tawo nga maalamon nagabinagbinag sang tagsa niya ka tikang.”—Hulubaton 14:15.

   Ang buot silingon sini para sa imo: Pilia sing maayo kon ano nga laygay ang sundon mo. Importante gid ini kay basi mahalitan ang imo panglawas kon sala nga impormasyon ang basihan mo sang imo desisyon.

•   Padayon nga mangin positibo

   Teksto: “Indi ka magsiling, ‘Ngaa mas maayo sang una sangsa subong?’ kay indi ina maalamon nga pamangkot.”—Manugwali 7:10.

   Ang buot silingon sini para sa imo: Himua kon ano ang pinakamaayo sa imo sitwasyon subong. Likawi ang pagpamensar nga mas maayo ang kabuhi mo antes sang pandemic, kag indi pagpamensara ang mga butang nga wala mo mahimo bangod sang mga restriksion.

•   Respetuha ang iban

   Teksto: “Padunggi ninyo ang tanan nga sahi sang tawo.”—1 Pedro 2:17.

   Ang buot silingon sini para sa imo: Sarisari ang reaksion sang kada isa sa pandemic kag sa epekto sini. Respetuha ang ila opinyon, pero indi pagbag-uha ang maayo nga mga desisyon nga ginhimo mo. Magpakita sing konsiderasyon sa mga wala na-vaccine, sa mga tigulang, kag sa mga may malala nga balatian.

•   Magpasensia

   Teksto: “Ang gugma mapinasensiahon kag mainayuhon.”—1 Corinto 13:4.

   Ang buot silingon sini para sa imo: Kon ang iban nakulbaan sa paghimo liwat sang mga buluhaton nga normal lang man antes sang pandemic, mangin mainayuhon. Kon mag-ayoayo na ang sitwasyon kag puede mo na mahimo ang pila ka buluhaton, amat-amata lang ini.

 Bal-an sang mga Saksi ni Jehova ang promisa sang Biblia nga matahom nga palaabuton kag nagapaumpaw ini sa ila. Gani wala sila nagapokus sa pandemic. Ginapabakod man nila ang isa kag isa paagi sa pagtuman sang sugo sang Biblia nga magtipon sing regular para magsimba. (Hebreo 10:24, 25) Ginaagda ang tanan nga magtambong sa mga miting sang mga Saksi ni Jehova. Padayon nila ini nga ginahimo bisan pa may pandemic paagi sa videoconference.

 Madamo ang nagasiling nga ang pag-upod sa mga Saksi ni Jehova para magsimba nakabulig sa ila sa sining mabudlay nga tion sang pandemic. Halimbawa, ginbaton sang isa ka babayi nga nalatnan sang COVID-19 ang imbitasyon nga mag-upod sa miting sang mga Saksi ni Jehova paagi sa videoconference. Nakabulig gid ini nga magbakod ang iya buot bisan pa madamo sia sang ginabatyag sa lawas bangod sa virus. Sang ulihi nagsiling sia: “Nabatyagan ko nga bahin man ako sini nga pamilya. Nagatawhay ang akon hunahuna kag nagakalma ako kon magbasa ako sang Biblia. Nakabulig ini sa akon nga magpokus sa paglaum imbes nga sa akon mga problema. Salamat gid sa pagbulig sa akon nga mangin suod sa Dios. Amo gid ini ang gusto ko halin pa sang una.”