“Ara naman sa peligro ang ekonomiya sang kalibutan,” paandam sang presidente sang World Bank Group sa report sini sang Hunyo 2022. “Kay man, sigesige ang pagmahal sang mga balaklon, pero nagadiutay ang kuarta nga ginakita sang mga tawo.”

 “Kadasig gid sang pagmahal sang gasolina kag pagkaon kag ang natam-an gid sini amo ang mga tawo sa pigado nga mga pungsod,” siling sang International Monetary Fund.

 Ginabuligan kita sang Biblia nga maintiendihan kon ngaa grabe gid ang kapigaduhon subong, kon ano ang aton himuon sa sini nga sitwasyon, kag kon ano ang permanente nga solusyon sa sini nga problema.

•   Ginatawag sang Biblia ang aton panahon nga “katapusan nga mga adlaw.”—2 Timoteo 3:1.

•   Si Jesus nagsiling nga may “makahaladlok nga mga talan-awon,” ukon makahaladlok nga mga hitabo sa sini nga panahon. (Lucas 21:11) Ang sigesige nga pagmahal sang mga balaklon nagapahadlok sa mga tawo. Kay man, ginakabalak-an nila kon ano ang matabo sa palaabuton kag kon bala masarangan pa nila nga saguron ang ila pamilya.

•   Sa Biblia, ang libro sang Bugna ukon Pahayag nagtagna sang pagmahal sang mga pagkaon sa sini nga panahon. “Pagkatapos may nabatian ako nga daw sa tingog . . . nga nagasiling, ‘Ang bili sang tatlo ka litse nga harina nga trigo bali isa ka adlaw nga suhol, kag ang isa ka gantang nga harina nga barley bali isa man ka adlaw nga suhol.’”—Pahayag 6:5, 6, Ang Pulong sang Dios, APD.

 Para sa dugang nga impormasyon parte sa “katapusan nga mga adlaw” kag sa mga tagna sa libro sang Bugna, tan-awa ang video nga Nagbag-o ang Kalibutan Sugod sang 1914 kag basaha ang artikulo nga “Ang Apat ka Manugkabayo—Sin-o Sila?”

•   “Magapatindog sila sing balay kag magapuyo sa sini, kag magatanom sila sing mga ulubasan kag magakaon sang bunga sini. Indi sila magpatindog kag iban ang magapuyo, ukon magtanom kag iban ang magakaon.”—Isaias 65:21, 22.

•   “Mangin bugana ang mga uyas sa duta; sa putukputukan sang kabukiran magahapayhapay ini.”—Salmo 72:16.

•   “‘Bangod sang pagpamigos sa mga nalisdan, bangod sang pagpanghayhay sang mga imol, magatindog ako agod magpanghikot,’ siling ni Jehova.”—Salmo 12:5. a

 Sa indi madugay, dulaon sang Dios ang kapigaduhon, indi lang sa isa ka pungsod kundi sa bilog nga kalibutan. Para mahibaluan mo kon paano, basaha ang artikulo nga “Posible Bala ang Patas nga Sistema sa Ekonomiya?”

 Pero bisan subong pa lang, mabuligan ka sang Biblia kon ano ang himuon mo sa tion nga magmahal ang mga balaklon. Paano? May praktikal ini nga mga laygay kon paano ka mangin maalamon sa paggasto. (Hulubaton 23:4, 5; Manugwali 7:12) Para sa dugang nga impormasyon, basaha ang mga artikulo nga “Proteksioni ang Imo Palangabuhian” kag “Ano ang Himuon Mo Kon Kulang ang Imo Ginakita?”