PADAYON NGA MAGBANTAY!
Pagpamintas Bangod sa Pulitika—Ano ang Ginasiling sang Biblia?
Nagakabalaka gid ang mga tawo kay nagadamo na gid ang pagpamintas bangod sa pulitika sa bilog nga kalibutan.
Sa Mexico, ginpamatay ang 39 ka kandidato sa pulitika kag amo ini ang pinakamataas nga rekord sang pagpamintas. Bangod sini kag sang iban pa nga klase sang pagpamintas nga may koneksion sa pulitika, hinadlukan gid ang mga tawo kag may epekto ini sa ginhiwat nga 2023-2024 nga eleksion sa sina nga pungsod.
Sa Europe, madamo man sang natabo nga pagpamintas bangod sa pulitika. Lakip na diri ang pag-attempt nga patyon ang prime minister sang Slovakia sang Mayo 15, 2024.
Sa United States, na-shock gid ang mga tawo sang gin-attempt nga patyon ang presidente anay nga si Donald Trump sang Hulyo 13, 2024.
Ngaa nagadamo na gid ang pagpamintas bangod sa pulitika? Madula pa bala ini? Ano ang ginasiling sang Biblia?
Natagna na ang pagbahinbahin sang mga tawo bangod sa pulitika
Gintagna sang Biblia nga sa aton tion, nga ginatawag “katapusan nga mga adlaw,” ang batasan sang mga tawo amo ang mangin rason sang pagpamintas kag indi pag-intiendihanay.
“Sa katapusan nga mga adlaw magaabot ang makahalanguyos nga mga tion nga mabudlay atubangon. Kay ang mga tawo mangin . . . indi mapinasalamaton, indi mainunungon, . . . indi magsugot sa bisan ano nga kasugtanan, . . . mabangis, . . . maluib, matig-a sing ulo, nagapahambog.”—2 Timoteo 3:1-4.
Gintagna man sang Biblia nga ang mga kinagamo pareho sang pagrebelde sang mga tawo sa gobierno kag pag-ilinaway sa pulitika palatandaan sining katapusan nga mga adlaw. (Lucas 21:9) Pero, ang pagpamintas bangod sa pulitika kag ang pagbinahinbahin madula sa ulihi.
Madula na ang pagpamintas bangod sa pulitika
Ginasiling sang Biblia nga buslan sang Dios ang tanan nga gobierno sang mga tawo sang iya gobierno sa langit.
“Ang Dios sang langit magatukod sing isa ka ginharian. . . . Dugmukon sini kag laglagon ining tanan [nga iban pa] nga ginharian, kag ini lamang ang magapabilin sing dayon.”—Daniel 2:44.
Paagi sa Ginharian sang Dios, mahiusa na ang tanan nga tawo kag may kalinong na sa bilog nga kalibutan.
Ang Manuggahom sini, nga si Jesucristo, ginatawag nga “Prinsipe sang Paghidait,” kag siguraduhon niya nga “ang paghidait mangin wala sing katapusan.”—Isaias 9:6, 7.
Bisan subong pa lang, ginatun-an na sang mga sakop sini kon paano magkabuhi sing mahidaiton. Amo nga ang Biblia nagsiling: “Salsalon nila ang ila mga espada nga mangin mga punta sang arado kag ang ila mga bangkaw nga mangin mga garab nga inughagbas. Ang pungsod indi na makig-away sa iban nga pungsod, indi na sila magtuon sa pagpakig-away.”—Isaias 2:3, 4.
Para sa dugang nga impormasyon, basaha ang artikulo nga “Ano ang Himuon sang Ginharian sang Dios?” kag tan-awa ang video nga Ano ang Ginharian sang Dios?