Base sa report sang Catholic News Service, sa isa ka seremonya sa St. Peter’s Basilica sang Marso 25, 2022, si Pope Francis nagtindog sa atubangan sang imahen ni Maria “nga nagapiyong kag nagaduko samtang nagapangamuyo sing hipos.” “Nagpakitluoy [sia] kay Maria” para sa paghidait. Ang Vatican News nagreport man nga “nangamuyo [sia] sang Pagtangdo sa Immaculate Heart of Mary para sa kaayuhan sang katawhan, ilabi na para sa Russia kag Ukraine.”

 Ano sa banta mo? Dapat bala nga mangamuyo sa mga imahen ukon maggamit sing mga imahen sa pagsimba? Binagbinaga ang masunod nga mga bersikulo sa Biblia:

•   “Indi kamo maghimo sing tinigib nga imahen ukon sing bisan ano nga nagarepresentar sang butang nga yara sa langit ukon sa duta ukon sa tubig. Indi kamo magyaub sa ila ukon mag-alagad sa ila, bangod ako si Jehova nga inyo Dios isa ka Dios nga nagapatuman nga ako lang ang dapat simbahon.”—Exodo 20:4, 5. a

•   “Ang ila mga diosdios human sa pilak kag bulawan, nga ginhimo lang sang tawo. May baba sila, apang indi makahambal; may mga mata sila, apang indi makakita; may mga dulunggan sila, apang indi makabati; may ilong sila, apang indi makapanimaho; may mga kamot sila, apang indi makauyat; may mga tiil sila, apang indi makalakat; wala sing tingog nga nagagua sa ila tutunlan. Ang mga tawo nga nagahimo sa ila mangin kaangay nila, amo man ang tanan nga nagasalig sa ila.”—Salmo 115:4-8.

•   “Ako si Jehova. Amo ina ang akon ngalan; indi ko pag-ipaambit ang akon himaya sa kay bisan sin-o, ukon ang akon kadayawan sa tinigib nga mga imahen.”—Isaias 42:8, footnote.

•   “Indi kamo magsimba sa mga diosdios.”—1 Corinto 10:14.

•   “Magbantay kamo batok sa mga diosdios.”—1 Juan 5:21.

 Para sa dugang nga impormasyon sa kon ano ang ginasiling sang Biblia parte sa paggamit sang mga imahen sa pagsimba, basaha ang artikulo nga “Ang Pagtamod sang Biblia—Imahen” ukon tan-awa ang video nga Gusto Bala sang Dios nga Maggamit Kita sing mga Imahen sa Aton Pagsimba?

 Basi gusto mo man mabal-an ang ginasiling sang Biblia parte sa sini nga mga topiko:

• “Ang Birhen nga si Maria—Ano ang Ginasiling sang Biblia Parte sa Iya?”

• “Dapat Ka Bala Mangamuyo kay Birhen Maria?”

• “Mga Milagro kag mga Aparisyon—Mga Tanda Bala Gikan sa Dios?”

• “Paghidait sa Duta—Paano?”

Photo credit: Vincenzo Pinto/AFP via Getty Images