Base sa report sang United Nations:

•   Halin sang Oktubre 7 asta Oktubre 23, 2023, ang inaway sang Gaza kag Israel nagresulta sa pagkapatay sang sobra 6,400 ka tawo kag 15,200 ang nasamaran, kalabanan sa sini mga sibilyan. Dugang pa, linibo ang nagbakwit.

•   Asta sang Septiembre 24, 2023, ang inaway sang Russia kag Ukraine nagresulta sa pagkapatay sang 9,701 ka sibilyan kag 17,748 ang nasamaran sa Ukraine.

 Ano nga paglaum ang mabasa sa Biblia para sa mga nagaantos bangod sang inaway?

 Ginasugid sang Biblia nga ‘pauntaton sang Dios ang mga inaway sa bug-os nga duta.’ (Salmo 46:9) Buslan niya sang isa ka gobierno sa langit, ukon ginharian, ang tanan nga gobierno sang tawo. (Daniel 2:44) Ang Ginharian sang Dios magahatag sang paumpaw sa mga tawo.

 Talupangda kon ano ang himuon ni Jesucristo, ang Hari sa Ginharian sang Dios:

•   “Kay luwason niya ang imol nga nagapangayo sing bulig, amo man ang kubos kag ang bisan sin-o nga wala sing nagabulig. Kaluy-an niya ang kubos kag ang imol, kag luwason niya ang kabuhi sang mga imol. Luwason niya sila sa pagpamigos kag sa pagpamintas.”—Salmo 72:12-14.

 Paagi sa iya Ginharian, dulaon sing bug-os sang Dios ang pag-antos nga resulta sang inaway kag pagpamintas.

•   “Kag pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”—Bugna 21:4.

 Sa indi madugay, ang Ginharian sang Dios magahimo sang dalagku nga mga pagbag-o sa duta. Gintagna sang Biblia ang mga “inaway sa nagkalainlain nga lugar” nga nagakatabo subong. (Mateo 24:6) Ini kag ang iban pa nga mga nagakatabo nagapakita nga nagakabuhi na kita sa “katapusan nga mga adlaw” sang paggahom sang tawo.—2 Timoteo 3:1.