Sang Mayo 23, 2023, ang isa ka mataas nga health official sa United States nagpaandam sa publiko parte sa malain nga epekto sa madamo nga pamatan-on sang paggamit sang social media.

•   “Bisan pa ang social media may mahatag man nga benepisyo sa pila ka kabataan kag pamatan-on, madamo sang ebidensia nga may daku ini nga halit sa hunahuna kag panglawas sang kabataan kag mga pamatan-on.”—Social Media and Youth Mental Health: The U.S. Surgeon General’s Advisory, 2023.

 Ginsambit sini nga report ang mga research nga nagapaathag kon ngaa dapat naton ini hatagan sang atension.

•   Ang mga pamatan-on nga nagaedad 12 asta 15 anyos nga “nagagamit sang social media sing sobra tatlo ka oras kada adlaw mahimo nga doble ang risgo nga makaeksperiensia sang problema sa mental health, pareho sang depresyon kag anxiety.”

•   Kon ang mga 14 anyos, “pirme nagagamit sang social media, masami nga kulang ang ila tulog, gina-bully sila online, nalaw-ayan sila sang ila kaugalingon, nagabatyag nga wala sing pulos, kag na-depress. Kag mas nagakatabo ini sa mga babayi sangsa mga lalaki.”

 Paano maproteksionan sang mga ginikanan ang ila mga kabataan sa sini nga mga halit? Ang Biblia may praktikal nga mga laygay.

 Indi magpabaya. Bilang ginikanan binagbinaga ang mga katalagman kag magdesisyon kon bala pasugtan mo nga maggamit sang social media ang imo bata ukon indi.

•   Prinsipio sa Biblia: “Hanasa ang bata sa husto nga dalanon.”—Hulubaton 22:6.

•   Para sa dugang nga impormasyon, basaha ang artikulo nga “Dapat Bala nga Maggamit sing Social Media ang Akon Bata?”

 Kon pasugtan mo nga maggamit sang social media ang imo bata, mangin alisto sa mga katalagman kag indi pagpagustuhi ang imo bata sa iya paggamit sini. Paano mo ini mahimo?

 Proteksioni ang imo bata sa indi maayo nga mga content sa social media. Tudlui ang imo bata kon ano ang indi maayo nga mga content sa social media para malikawan niya ini.

•   Prinsipio sa Biblia: “Ang seksuwal nga imoralidad kag ang tanan nga sahi sang kahigkuan ukon kakagod indi gid paghinambitan sa tunga ninyo. . . . Wala sing makahuluya nga paggawi, binuang nga hambal kag malaw-ay nga linahog sa tunga ninyo.”—Efeso 5:3, 4.

•   Para sa praktikal nga mga tip, basaha ang artikulo nga “Pagtudlo sa Imo Tin-edyer Kon Paano Mangin Safe sa Paggamit sing Social Media.”

 Magbutang sang limitasyon. Halimbawa, maghimo sang mga pagsulundan kon san-o kag kon daw ano kalawig nga makagamit sang social media ang imo bata.

•   Prinsipio sa Biblia: ‘Padayon nga bantayi sing maayo nga ang inyo paglakat kaangay sang maalam nga mga tawo, nga nagagamit sing maayo sang inyo tion.’—Efeso 5:15, 16.

•   Gamita ang whiteboard animation nga Mangin Maalamon sa Paggamit sang Social-Network para mabuligan ang imo bata nga maintiendihan kon ngaa kinahanglan magbutang sang limitasyon sa paggamit sang social media.